Falam Phak Hlan Lampawng ah Ralhrang Athimi Ruak 20 Hrawng An Phum Hna

Ralkap Pawl Falam Khawpi An Pan, Kalay khawpi ihsin poksuaktu ralkap pawl cu March 18 zaan Vaar khua ah riak ih tuini March 19 zinglam suimilam 8:00 hrawngah ke 12 nei motor 23, Armour 2 le JCB 1 thawn Falam khawpi an pan tiah theih a si. Vaar khua ah bomb ih ngah siatmi ke 12 nei motor pakhat an tan ih, a dang Skart motor pakhat khal a hmailam a siat nasazet tiah tualsungmi pawlin an sim.

Tualsungmi pakhat in “mizaan cu tlawnginn, nikhua tahnak zung le palik zung ah an riak, Major 2 cu inn pakhat veve ah ţhen aw in an riak, khawsung cu an siatsuah lo, an hnen ih tel mi pakhat cun lamzin sirah ralkap 20 hrawng JCB in an phum a ti, Kalay khawpi ihsin an suah thok ih ralkap zat Vaar an thleng nawn lo, lamzin ah an tang tla a si thei” tiah a sim. March 18 ah ralkap pawl cu Vaar khua an thlen hlanah CNDF, CNA le CDF – Hualngo ţangkhawm in ţumhnih an kap. TCT