Zeitluk In Dang Hringtu Nu le Pa Lungfah Lai

Nizan June 16 ah Siaha district, Lungbun khua ah aa dormi Chin ralzaam ngakchia pahnih cu  Ainak tiva an dilmi ah an tla i, an pahnih in an nunnak a liam tiah theih asi. Chin ralzam hna hi Matupi peng Rezua in a rami an si hna. A thimi ngakchia hi Noe Shwe Hla May  le Paw San Lay Oo hna an si. Upa deuh hi Lungbun khua ah tangkhat a kai i, a ngakchia deuh hi tangcheu a kai ve.

Thawngpang theih ningah cun, ngakchia pahnih hi zanlei nitlak tiangah inn an hlam ti lo caah an nu le an pa nih Lungbun khua mino MTP sinah an chimh hna. Khuachung ah an kawl hna nain an hmu hna lo. Cu lio ah mi pakhat sinin an theihmi cu, tidil pawng ah ngakchia kedanh le angki tibantuk a um tiah a ti.

Cu cang kain khuapawng tidil cu an fuh colh. An kedanh cu ngakchia a tlaumi hna thil a si. Cu tidil chungah cun an kawl hna i an pahnih tein an hmuh hna hi asi.  Ainak tivate tidil cu pe 15 hrawng a thuk i, pe 60 kaumi asi. Ralzaam in Camp ah a um mi an si caah ruak hi camp ah thutpi awk, suan awk aa rem lo caah khuachung ah Hall ah suan an si tiah riantuantu lutlai nih an chim.