US Mid-Term Election ah Republican Party nih House Kan Lak Than Lai

US rampi mid-term thimnak a nai tuk cang. Democratic Party an thinphang cang. Mid-term  election ah hin Republicans nih House kan lak than lai tiah Donald Trump nih a chim. Atu hi US ramchung min ngei, riantuantu hna lakah mipi thinlung chung ah hmunhma ngeilo bik ah Biden aa tel cang. US President a si ve mi nengmang ah, midang vialte nakin polls ah rating a niam bik ti asi.

A tu hi Americans mipi nih an uar bikmi cu Donald Trump asi tiah an ti. Democratic Party members chung hrimhrim nih Donald Trump an uar tuk than cang. Biden nih US a hruai hnu in, US ramchung ah Khrihfa biaknak nih hmunhma a la kho ti lo. Khrihfa cawnpiaknak nih ramchung ah aw-ann a ngei kho ti lo.

Amah Biden hrimhrim hi nudok padok, nu le nu, pa le pa, thitumh, nauhrawh a cohlang mi asi tikah Americans minung taktak nih cun Donald Trump nih US hi hruai than seh ti an duh tuk cang. Biden atuan chung kumkhat tlawmpal ah US ramchung thilman vialte a kai dih, rian a tlawm tuk, ramchung runvennak thinphang dailo asi cang. Thil tampi ruangah Biden cu an duh hrimhrim ti lo.

Donald Trump nih keimah administration ah cun Taliban an cawl ngam lo, Russia a cawl ngam lo i, China zong a cawl ngam lo. Biden cu alungput an theih tukmi asi caah Taliban nih Aghanistan an lak colh, Russia nih Ukriane a tuk colh, China nih Taiwan tuk a tim rih. Cuhlan vialte US cu tihbikmi vawleicung ah cungcuang ram le bochan bik arak simi kha, Biden nih a thlak dih. Cu ruangah Taliban tiang nih US zei ah a rel ti lo a ti.