UPC nih Bible Cawnpiaknak An Ipalh Taktak Mi

Home

Dr.PC Biaksiama nih Mizo ca in a tialmi copy paste kan tuah. Hi Bible cacang kong ahrilhfiahmi ah Mizo holh/ca lungfiang lomi kan um sual i, Lai ca/holh tein theihfian ka duh ko atimi kan um ahcun Laiholh in tling tein lehpiak kan in zuam than lai. 

MIZO- Christian Research Centre (CRC), PIANNA DIK: Tuia pian tur nge Thlarauva pian tur? Joh. 3:5-ah, *“Mi tupawh tuiah leh thlarauva an pian loh chuan Pathian ramah an lut thei lo vang,”* tia Isua sawi hi kan unau UPC ten tuia baptisma chan tur emaw an ti tlat mai a. Pianthar dan dik lo an inzirtir hi ngawi renga lo thlir liam reng thei lovin min siam ta a nih hi.

*Heng chângah te hian Baptisma sawina ṭawngkam a awm zeuh lo tih chhinchhiah ila.* Mahse tuisik baptisma uartu kan unaute chuan ‘tuia baptisma’ tihna emaw an ti tlat mai a; he lai châng hian *“Baptisma chan chu Pathian rama luh theihna a ni a; baptisma chang lo chu van ramah an lut thei lovang,” tihna angin an ngai a, an inzirtir tlat mai hi an tisual nasa hle a ni.*

Hetiang taka zirtirna kalsual hian thlarau tam tak chu boralna kawngah a hruai bo duah duah a ni tih hre chiang tur leh vei turin Lalpan min tir tlat si a. Sawi tam tlangrêlah ka hlawh phah ta a, min rêl phâr zo ta vek mai a, ka lû-ah te hian sawichhiatna leh chirhthehna hi a vûmin a vûm thûr tawh a. Mahse Lalpan a hmangaih si a, sawichhiat leh tihmualphona chu pawisa zo lovin, mi pahnih khat talin *Nunna Kawng Dik, Isua chhandamna* chu tuia baptisma tel lova rinna zawka an chan phah dawn phawt chuan hmingchhiat huamin kan chawl thei lo a nih hi.

Isuan thusawi dan tak hi i lo zir chiang teh ang aw. *“Mi tupawh tuiah leh Thlarauvah an pian loh chuan Pathian lalramah an lut thei lo vang.”* Helai changah hian *Isuan a sawi tel loh baptisma hi an zep lut tlat mai* a, chu chuan kan Upc unaute rilru a hruai bo tlat mai zu nia. *I Bible kha han bih chiang la, thupui bera in neih Baptisma a sawi tel em le?* Bible thu belhchhahtu leh paih ṭhentu hi Pathianin a hrem dawn tih in hre lo vem ni? (Thup 22:18 chhiar teh). Chuvangin baptisma a sawi tel lohna hmuna i belhchhah chuan Pathian thu belhchhahtu i ni dawn asin! I fimkhur ang u. ‘Tuiah leh Thlarauva pian’ tih hian tuia baptisma a kawk lo; baptisma chungchang sawina pawh a ni hek lo. ‘Tuiah’ tih pawh ni se baptisma a sawi tel lo hrim hrim.

*Zawhna:* Chuti chu, *‘Tuiah leh Thlarauva Pian’* (born of water and Spirit) tih chuan eng ber nge sawi a tum le?

*Chhanna*: Johana 3:5-in a sawi chu *tisaa pian leh thlarauva pian a ni* tih a dawt chiah chang 6-na hian a tichiang reng: “Tisaa piang apiang tisa, thlarauva piang apiang thlarau a ni,” tia a sawi zui hi. Tichuan, tui chhung (chhûl) aṭanga nausen lo piang, ‘tui aṭanga piang’ hi *tisaa piang* sawina a ni a; a pakhat zawk chu *thlarauva piang* sawina a ni (3:6). Nu leh pa kâr aṭanga nau lo piang chu Pathian lalrama lut tur chuan thlarauva piannawn leh a ngai. Chu piannawn lehna chu *Thlarauva piantharna* a ni. Tuia inhnim phûma baptisma chan lam a ni lo.

Chuvangin *Johana 3:5 behchhana kan unau UPC-ten baptisma thurin innghahna chang pui bera an hman hian an thurin hi a support tlat lo;* chumi awmzia chu – an thurin hian innghahna a lo nei lo a nih chu! Nghahchhan nei lo thurin a nih avangin pawm tlak a ni lo tih hi in ngaihtuah harh thei hrâm se, an mi leh sate hi kawng dik lova an hruai bo zel loh nan, tih hi an hotu leh hruaitute duhsak takin Pathian hmingin ka chah mawlh mawlh a ni, Pathian rorelna hmaa an mawhphurhna a la rip dâwn êm mai!

Chhandamna atan tui baptisma chan hi ṭul ni se Bible-ah hian châng hnih khatah tal fiah taka sawina a awm tur a ni a; a awm mang si lo. Hmun dangah dap kual ta ila a teuh ber leh an hman rim em em chu Marka 16:16 bawk, ‘A ringa baptisma chang chu chhandamin an awm ang a, a ring lo chu thiam loh changin an awm ang,” tih hi a ni leh mai a. Hemi châng lah hian baptisma chan hi chhandamna a ni, a lo ti dawt bawk si lo. ‘A ringa, baptisma chang chu chhandam an ni ang; a ring lo chuan thiam loh an chang ang,’ a tih aṭang hian thiam loh channa hi baptisma chan loh vang ni lovin, rin loh vang a lo ni zawk tih a chiang leh tlat mai si a.

Anmahni pawhin rinna tel lo baptisma chu awmze nei lo angin an sawi tho bawk si a. Chuvangin kan UPC unaute chhandamna thurin hi Bible chang hian a thlawp lo. Puibawmtu leh kawppui châng dang a awm loh avangin innghah chhan nei lo thurin an lo kalpui ṭhin a lo ni. Thurin anga hmang meuh tur chuan chiang taka Bible-in a sawina châng kawppui nei a awm ngei tur a ni asin le; an tlakchham êm avangin an ngaihdan awm saah an ṭang nghet bur ringawt mai a nih hi. Lehlamah chuan, baptisma sawi tel lova Isua rin mai hi chhandamna a ni tih nemnghehna Bible bung leh châng tam takah kan hmu thung (Joh. 3:16; 3:36; 5:24; 6:47; Tirh. 15:11; 16:30-31; Eph. 2:8-9; Tita 3:5 etc.).

Chhandamna indawt dan pawh hetiang hi a ni: Chhandamna hi (1) Pathian khawngaihna thilpek a ni a, (2) miin a lo ring a; (3) chhandamin a awm ta a, (4) a remchan dan angin tuia baptisma a chang zui ta ṭhin a ni tih Tirhkohte Thiltih buah Kornelia chhungte leh Paula pianthar dan aṭangin a chiang reng a ni. Kan upc unauten a hmasak dan indawta an sawi dan chu: – ‘rinna–baptisma-chhandamna’ tiin an dah a; hei hi chu Bible record nen a inrem thei lo: *rinna-chhandamna-baptisma* a ni zawk tih hi lo inenfiah ve se kan va ti êm! Chatuan nunna leh chatuan thihna khawih thil a ni si a, pawl pawl ang zawnga la lovin, chhandamna kawng dik tak chu Isua Krista hi lal leh Chhandamtu atana rin mai hi a ni zawk e. Baptisma chan hi tel ta se *thiltih* a tel dawn si a. Mahse Paulan, “Thiltih avang a ni lo ve” a lo ti bawk si a (Eph. 2:8-9).

*Piantharna dik* tak Bible sawi dan chu: *Pathian thu nung reng leh chatuana awm reng laka chi chhe thei lova piantharna zawk a ni.* (1 Petera 1:23). Tuisik baptisma a lang lo. Chhandamna dik tak Bible-in min hrilh chu : *Kan thiltih ṭhat vang ni lovin, a khawngaihna avang zawkin min chhandam a, piantharnain min silfai a, Thlarau Thianghlimin min siam thar leh ta,* a ti a ni (Tita 3:5).

Lal Isua i nei tawh em? Chatuan nunna i chang tawh em? Thi dawn ta la, vanramah i kal dawn tih i inhre chiang em? I thla a muang tak tak em, nge hlauhthawnna i la nei? Chhandam i ni ngei tih mahniah inhriatna i nei nge nei lo? Thih thlamuanna pawh i la nei lo a nih chuan a hnuaia hming leh phone number ah hian mi rawn call la, Lalpa hnenah ka lo thlen sak ang che. Nang, Kristaa ka unau duh tak, nangmah ngei kha Thutak hre tur leh chhandamna a thlawna i tana pek tawh hi chang turin Lalpan a la nghak reng a che. – Dr PC Biaksiama