Ukraine Dirhmun Achia Taktak Khomi Asi Cang

Home

Zelenskiy: “EU nih Ukraine Cohlan a Timh in cun Kahdohnak Fak Chinchin Tlung kho mi a si” Monday khan cun nichuahlei Ukraine ah a ummi tiva hrawn ralhauka velchum vialte cu Russia nih an lak dih cang. EU chungtel sikhawhnak lam Ukraine caah awn dingin meeting an tuah hlan dungdang ah Russia nih fak taktak in kahdohnak a tuah lai, tiah Zelensky nih a chim. Siverskyi Donets tiva in nitlaklei le Sievierodonetsk in chaklei ah a ummi Toshkivka khua hi Ukraine nih kut ah a ummi a si ngawt ko nain, nizan nai khan cun Russia tanhtu tapung kut ah a phan cang. Hi khua hi nai zarh chung vialte biatak tein an i kahnak hmun a si, tiah theih a si. Toshivka ah Russia nih hlawhltinnak an hmuhmi cu biadik a si. Donbas pengkulh chung i Ukraine nih an ukmi hmunhma vialte lak an duh caah a tu bantuk in hranhramlo in Toshivka an lak hi a si, tiin Ukraine lei nih an chim. Sievierodonetsk in nichuahlei ah a ummi Metyolkine zong Russia kut a phan cang, tiah Ukraine nih fehternak a tuah.

“Tuzarh chungah hin fak taktak in Russia nih kahdohnak a tuah te lai, tiah zumhnak kan ngei. Kan i timlam ve ko. Timhcia kan si,” tiin Zelensky nih a chim. EU hmunhma nih a kulhmi Baltic Sea ah a ummi Russia sakhan umnak Kalinigrad lei ah duhherhmi tete kuat ti lo dingin EU chungtel Lithuania ram nih biachahnak a tuahmi cu Russia nih an rem lo ngaingai. Kuat ti lo dingin an ti mi thilri hna cu, meihol, thir, innsaknak thilri le advanced technology pawl an si hna.
“A tu bantuk i biachahnak an tuahmi hi phung he ai kalh, lakhruak thil a si. A rauhhlan ah lehrulhnak kan tuah colh lai,” tiin Kremlin aiawhbiachimtu Dmitry Peskov nih a chim. Tuzarh chungah hin EU chungtel sikhawhnak lam cu EU hruaitu hna nih Ukraine kutah an ap lai. Cucu Ukraine caah cun teinak nganpi pakhat bantuk a si. EU chungtel tling si khawhnak dingah kum tampi a rau rih ding a si. Cold War hnu in Soviet Union chungtel EU a lutmi vialte lakah Ukraine hi a nganbik a si te lai, tinak a si.

Putin nih Ukraine a luhhnawh nili hnu ah Ukraine nih EU luh a sok colh ve. “Russia nih ai tinhmi taktak cu Ukraine uk i, Ukraine i ram pakhat a sinak a min pi hi a hloh bak in vun hloh a duh caah a si,” tiin Ukraine nih zumhnak an ngei.
Post-Soviet Russia rammi nih an chuahmi cauk le hlaphel paohpaoh cu Ukraine ram chungah kham (ban) dih dingin Sunday ah khan Kyiv nih nawl a chuah. Zelensky i a minthut ai telmi thil le ri lawng onh a si lai i, Russia nih an ram a luhhnawh hnu in an ram ah a hung lutmi Russia ram chuak thil paohpaoh cu kham dih dingin bia kan chah, tiah Ukraine Culture Minister Oleksandr Tkachenko nih a chim.

Toshkivka i hmunhma khuarnak- March ah khan Kyiv ah Russia pawl ceilak in an sung. Cu hnu cun nichuahlei tu ah an i mer. Heh tiah miakpi le bomb in Donbas pengkulh chungum khua le ram vialte cu kah thlorh in an kah. An i kahdohnak bik hmunhma cu Siverskyi Donets riva hrawn ah a si. Monday ah khan Toshkivka a ningpi in kan lak khawh cang, tiah Russia tanhtu Luhansk People’s Republic cozah nih Russia TASS news ah a chim. Hi khua hi tiva kam te ah a ummi a si i, Ukraine ralhruang nganbik an umnak hmun a si.

Toshkivka ah Russia pawl an hlawh a tling taktak ko, tiah Gaidai nih a chim. A khuainnpa Ustinovka tiangin Russia nih hmunhma khuar an i timh caah, tanks pawl telh in hriamnam ngangan ai ken hna, tiah Gaidai nih a chim. “Metyolkine khua zong kan kut a phan cang,” tiin Russia nih an chimmi zong biahman a si, tiin Gaidai nih a chim. “Vanchiat e tiah, nihin cu Metyolkine kan humhak kho ti lo e,” tiin Gaidai nih a chim. Donbas pengkulh hi a ningpi in lak a duh caah Russia nih a ralkap pawl cu Ukraine lei ah a hunghung in a kuat tualmal ko rih hna, tiah theih a si. “Asinain kan i chang ko rih lai i, hriamnam thazang in kan thawndeuh tikah cun, khua chuahtak thai hau lo tein kan lak than te ko lai,” tiin Gaidai nih a chim.

Russia nih a khammi Ukraine facang kuatnak kongah vawleipi a lungre a thei peng ko rih. Ukraine hi vawleicung ah tirawl ramdang a kuabikmi ram ah ai tel ve bangin, an tirawl kuatnak lam a pih in cun vawlei cungah tamhalnak le pam a tlung cuahmah manh cang, tiah theih a si. “Facang kuatnak tilawng dinhnak cu awn than dingin Russia cungah kan duhnak kan langhter. Hi ti thil a tuahmi hi ruahngam ding hmanh khi a si lo. Vawleipi a hrapcheu tluk tirawl ei awk ngei lo in an um lio ah, facang million 4 tons cu Ukraine ah ai dil phut ko rih mi cu, minung a si mi nih zeitindah a ruah khawh ning a si hnga. Hi tuahsernak hi war crime pakka a si. Cucaah hi bantuk tuahsernak thalo hi cansau a rau sual lai, ti lawng a phang” tiin Luzembourg i EU foreign ministers meeting tuahnak ah EU foreign policy chief Josep Borrell nih thawnglatu sinah a chim.

Western nih ka cungah phihkharnak nan tuah caah, nanhmah le nanmah vom rem in an i rem a si ko hme cu, tiin Russia nih sual a phawt hna. Russia zinan le gas EU lei kuatnak kong telhchih in, tutan ral nih hin vawleicung zinan markets a hnuarsuan ngaingai. Russia zinan le gas hi EU nih ai hngatchanbikmi a si i, anmah Russia zong nih income hmuhnak ah ai bochanbikmi a si ve thiamthiam.“Nanmah EU pawl nih phihkharnak nan ka tuah ruangah gas kuatnak pipeline vialte thitha in a kalpi kho ti lo. Ai rawkmi zong ka remhsiam kho ti lo,” tiin Russia nih EU lehlam cu sual a phawt hna. chelseabawi

Sonhtarh- Miphun dang hi cu sonhtarh an hman le hman lo ka hngal hna lo. I sonhtarh an hman lai zong ka zum fawn lo. Lai mi tu hi sonhtarh a hmang ngaimi kan si rua tiah ka ruah. A herh lomi ah sonh lo i sonh kan hmang ngaingai. Lai mi nih kan ruah ngaimi pakhat cu kum thar zing ah ahodah a kan leng hmasa bik lai tiah a hngah bakin hngah kan hmang. Min țha maw a si lai min chia dah tiah. Phun dang in chim ahcun kum thar zing ah thluachuah ngeitu Pathian tu sawm le bawh loin sonhtarh ding tu a bawh in kan bawh, kum khat chung kan kal nakding caah.
Kum thar a hung chuah zaan ah cun kum khat chung kan kal nakding caah Pathian sinah thluachuah bongmal za kha hal in thlaza cu kan cam cio hna. Asinain khua a hung dei i ahodah a kan leng hmasatu a si lai tiah i sonhtarh ding lawng kan hngak i kan bawh colh hna. Pathian sin thlaza kan cammi kan philh colh diam. Kum khat chung kan lam a tluan ahcun kum thar zing ah min țha nih a kan len ruangah kan ti. Kan lam a tluan lo le kum thar zing ah min chia nih a kan len ruangah a si tiah sonh lo le sonh lo i sonh kan hmang tawn.

Kan minung hawi ahohmanh nih a kan len hlan ah a zaan in a nung kan biak Pathian nih a kan len i a kan umpi diam cang ti hi kan philh sual tawn. Sonhtarh hman hi zumlotu hmanh nih an hmang lo, Khrihfa, zumtu ai timi lai mi lawng hi a hmangmi kan si ko rua dah ka ti. Hi ruangah hin a si men lai, ” Ka fa thi kaw, sonh lo le sonh lo kai sonh,” tiah an chim tawn. Sonhtarh a hmangmi cu thil pakhat khat paoh an i donhter zungzal. An thil tuahmi a tlamtlin lo tikah cu ruang, kha ruangah tiin phunzai le chim an hmang. Voikhat cu khua pakhat ah sonhtarh a hmang ngaingaimi mipa pakhat a um. Nikhat cu zingka tein lo ah a kal i lampi ah thiahlei nih lam a tan lio a hmuh. Aaa… thiahlei lam tan cu a țha lo a ti i a kir. A thaizing ai thawh țhan i rul nih lam a tan, rul lam tan chacha cu țih a nung tuk a ti i a kir țhan. A ni thumnak lo a kal ah thli nih a rak khiahmi thingpi lam cungah a tlu i lam a kham ai. Aaa… hi hi cu a si ti lo, thingkung kiak hmanh nih lam a ka kham va si kaw, hi bu i lo ka kal chih ahcun pakhat khat ka tong sual lai a ti i inn ah a kir țhan diam.

Cuticun nifatin lo rian țuan loin inn ah a kir peng. Nirukni (Zarhteni) ah lo kal cu ai thawh țhan i lampi ah zei taktak hmanh nih lam an tan a hmu ti lo. Va awnh thawng le thareng awnh thawng zong a thei ti lo. Cucaah cun nihin nikhua hi zeitindah a si hnga? Zei bantuk va awnh thawng zong ka thei lo i, sachia zuu va nih lam an tan zong ka hmu ti lo. Aa… a si lo, thil pakhat khat a cang ding a um ruangah ram sa nih an theih chung i dai tein an um dihnak hi a si ko lai. Hi bu i lo ka kal a si ahcun vanchiatnak hna ka tong sual ko lai a ti i lodiam inn ah a kir țhan ko.
Cuticun nikhatni in nirukni tiang zeihmanh tuah bak loin inn ah a um i, a thaizing, zarhpini ai din huar hehehe…
Sonhtarh hmanh cu rian tlolhnak a si. Sonhtarh hman cu țhanchonak dawntu a si. Cucaah sonhtarh hman cu a țha hrimhrim lo. Lai mi kan țhancho khawh lonak bik le țhanchonak a kan dawntu bik cu sonhtarh kan hmanmi hi a si.
Hi ca a reltu Bawipa nih thluachuahnak in pe ko hna seh. Dinnak kha a cat lomi tiva bantukin luanter camcin ko u (Amos 5:24). Salai K. Biak Lian Thawng