Tipilin/baptisma Hi Jesuh nih Ka Min In Pe Uh Ati Bal Lo

dailychin Home

Jesuh nih ka min in baptisma va pe hna u tiah a ti bal hrimhrim hna loh;- Biahmaithi : Sermon thian phun in Bible cawnpiak lih le hrokhrol a tham pinah Bible leh palhmi tere zong a um caah hin hi biatak cawnpiaknak hi Bawi Khrih min in rak rel ve hrimhrim tiah kan sawm hna. A sau pah nain biatak hngalh na duh taktak ko a si ahcun na caan kha minutes 10 in pek khawh rak i zuam ve law tiah Jesuh Khrih min in kan nawl fawn rih hna.

✅ Dawtmi u le nau hna Jeush nih cun, “Cucaah khuazakip ah va kal u law miphun vialte kha a ka zultu va siter hna u. Pa le Fapa le Thiang Thlarau min in Baptisma va pe hna u; nawl kan pekmi vialte hna hi an zulh nakhnga va cawnpiak hna u. Zohhmanh u, nan sinah chan dongh tiangin ka um thluangthluan lai,” tiah a zultu hna cu a rak ti ta hna. ( Mathai 28 : 29 – 20 ). Cu a ti bantukin a zultu hna nih cun Pentekoste ni ah baptisma pek zong an rak ot taktak ve. Asinain Bible Cathiang chungah hin zeitindah Jesuh a rak zultu hna le lamkaltu Paul nih hin baptisma an pek hna tihi cu a lang bak loh..

✅ Jesuh nih amah a zummi Judah mi hna kha, “Ka cawnpiaknak kha nan zulh ahcun a ka zultu taktak cu nan si; biatak cu nan hngalh lai i biatak nih cun an luatter hna lai,” tiah a rak ti hna. ( Johan 8 : 32 ). Hika zawn teah chim ka van duhmi te cu Jesuh nih mi a rak cawnpiak lio hna ah hin a pawngah a zultu zong hi an um zungzal ve caah Jesuh a rak zultu hna nih baptisma an rak pekning kong hna Bible Carhiang chungah hin lang hmanh hlah sehlaw Jesuh zultu taktak an si a langhternak cu Jesuh nih a rak cawnpiakmi hna hrimhrim hi an zulh bakmi a si. Cu bangin Pentekoste ni zongah Peter nih mi thong 3 baptisma a pekmi hna zong hi Jesuh bia bangin Pa le Fapa le Thiang Thlarau min hrimhrim in a pek hna lai ti cu Bible ah a lang lo nain zumh a si fawn..

✅ Midang nih cun Pentekoste ni bakah hin Peter nih Jesuh Khrih min in baptisma a pek hna tiah an ti tawn. A taktak le a ngaingai tiah cun Bible leh palh sual cu a si lai loh. Mirang a thiam bak vemi a si ko lai caah hin muh. Bible Lih (or) Ziknawh in rak lehmi Holy Bible lawngah hin Bawipa Jesuh min lawngin in baptisma pek an si rih timi biafang pakhat te hi a um i a kan leh piaktu zong tleicia Rev. Sang Awi a si.

Cucu ( Lamkaltu 8 : 16 ) nak bia kha a si ko. Asinain kan zapi tein hngal hna u sih ti ka duhmi cu lih a si caah lih cu cohlan ding a si hrimhrim loh. Zeicatiah cun Jesuh nih ka min in baptisma va pe hna u tiah a ti bal hrimhrim hna loh caah a si. Jesuh nih cun Pa le Fapa le Thiang Thlarau min in nan pek hna lai tiah a timi hna a si. ( Mathai 28 : 19 )..

✅ Cu bantukin lamkaltu chungin zultu hna nih hin Jesuh Khrih min in baptisma an pe bal bak hna loh. Cucu Bible zongah a um fawn loh. Asinain Judah mi hna nih hin Pathian pakhat ah Mi pathum a ummi Pa – Jahovah kan Pathian cu an rak zumh. Cun Thiang Thlarau le a riantuannak zong kha an zumh in an rak cohlan cang caah khan annih nih Moses zultu si awkah minmei chung le rili chungah khan tipilnak an in. An dihlak in Thlarau changreu kha an ei i an dihlak in Thlarau ti kha an din. An sin i a kal lengmangmi Thlarau lungpi chung khan ti cu an din i cu lungpi cu Khrih kha a si. ( 1Korin 10 : 2 – 4 ).

Asinain Jesuh Khrih cu a takin a hi vawlei ah a rak rat tikah hin an rak cohlang lo i vailam ah an thahmi an sualnak hi ngeihthiam an si khawh ve nakhnga ding caah tiin Peter hrimhrim nih cun Bawi Jesuh min in baptisma ing zong a rak fialmi hna a si..

✅ Cucu Bible bak in kan zoh lai. Peter nih cun, “Israel mi vialte hna, nannih nih vailam tahnak thing cungah nan khenh chihmi Jesuh hrimhrim hi Pathian nih Bawipa ah le Messiah ah a ser cang, ti kha fiang tein hngal u,” tiah a ti. Hi kong kha an theih tikah an lungthin a hriah ngaingai hna i Peter le lamkaltu dang kha an thawh hna i, “U le nau hna, zeidah kan tuah kun lai?” an ti.

Peter nih annih cu a thawh hna i, “Nan dihlak in, PAKHAT HMANH BAU LOIN, NAN SUALNAK KHA I MER TUAH U, NAN SUALNAK KHA, NGAIHTHIAM NAN SI NAKHNGA NAN SUALNAK KHA I MER U LAW JESUH KHRIH MIN IN BAPTISMA ING U; cun Pathian laksawng Thiang Thlarau kha nan hmuh lai,” tiah a rak ti hna. ( Lamkaltu 2 : 36 – 40 )..

✅ Peter le zultu a dang hna nih cun Judah mi hna nih hin vailam ah an rak thahmi Jesuh Khrih hi zum hna sehlaw an sual ngeihthiamnak ca dingah amah Jesuh Khrih min bakin baptisma ing hna seh tihi a rak duhmi a si. Hika zawn bia hna hi Bawipa Jesuh min in baptisma peknak kong he pakhat te hmanh aa pehtlaihnak zong a um loh.

Cun kan Bawipa Jesuh Khrih min zongin baptisma hi vaikhat te zong an pe hna loh. Vailam ah Jesuh Khrih an thahmi an sual ngaihthiamnak catu dingah Jesuh Khrih min in baptisma ingtu kha an rak fial bikmi hna cu a si ko. Cu bantukin Judah mi hna nih Jesuh Khrih min in baptisma zong kha an ing ve taktak ko. Lamkaltu Pual zong nih hin Jesuh Khrih min in baptisma a pe bal hna loh. Cucu Bible te bakin van zoh rih hna u sih;-

  • * Lamkaltu 2 : 41- Mi tampi nih a bia cu an zumh i baptisma kha an ing; cu ni ah cun an bu ah mi thong thum tluk an i chap..*
  • Lamkatu 8 : 12- Sihmanhsehlaw Filip chimmi Thawngṭha, Pathian Pennak kong le Jesuh Khrih min kong kha an zumh tikah nu he pa he baptisma kha an ing..
  • * Lamkaltu 8 : 16 – Zeicahtiah Thiang Thlarau cu annih lakah khan aho cung hmanh ah a tlung rih lo; Bawipa Jesuh min in baptisma lawng an rak ing rih. ( Hihi bak hi Rev. Sang Awi nih palh cikcek in a palhmi a si caah Dr. Van Bik lehmi in ka van lakternak cu a si )..
  • * Lamkaltu 10 : 48- Cucaah Jesuh Khrih min in baptisma in awk kha a fial hna. Cun kan sinah tlawmpal in cam ko rih, tiah an nawl..* Lamkaltu 19 : 5 – Cucu an theih tikah annih cu Bawipa Jesuh min in tipilnak kha an ing..

✅ Kan bia dongh nakah chim ka duhmi cu Jesuh nih ka min in baptisma va pe hna u tiah a ti bal hrimhim hna lo caah hin kannih zong Pathian kan Pa nih a duhmi a Fapa Jesuh Khrih kan zumhnak in amah zultu tha taktak kan si ahcun amah cawnpiak kha zul ko hna u sih. Cun amah nih kan cawnpiak bantuk tein Pa le Fapa le Thiang Thlarau min in baptisma zong kha pe ko hna u sih. A biathiang aa hrawmmi zumtu nan dihlak sinah Thiang Thlarau um sehlaw cu Thiang Thlarau nih cun fimnak in pe hna sehlaw cuticun a biatak zong kha in hngalhter ve cang ko hna seh..
Thank You For All; Johnly Fambawl