Thlichia Nih Sakta Khua Inn 30 Leng hrawh

dailychin

Mocha Thlichia Nih Sakta Khua Inn 30 Leng hrawh. May 14, nizan ah Mocha thlichia nih Hakha peng Sakta khua ah inn 30 leng cu umnak thalo in a hrawh tiah theih a si. A hrawhmi chungah biakinn, sianginn, quarter le zung zong an i tel. Minung aa hliami cu an um lo tiah theih a si.

Thlichia Ruang ah CDF Kanpetlet, Vakok Battalion le CDF Tongzaang Headquarter Inn A Rawk Dih.Tulio Myanmar ram chung ah a bualcam mi Cyclone Mocha thlichia le ruahchia ruang ah CDF Kanpetlet Vakok Battalion le CDF Tonzaang Headquarter an inn hna cu a rawk dih, tiah theih a si.

Vakok Battalion sakhan hi May 14 ni ahkhan minung umnak inn inn 17 cu a cungcih a hawh dih i bomb hrialnak khor pawl zong ti an luh dih ca ah a rawk dih ve, tiah theih a si.Cun, CDF Tonzaang zong hi an headquarter umnak inn inn 6 hrawng a rawk dih cikcek ve, tiah theih a si.Mocha thlichia le ruahchia nih hin Chin Ramkulh chung inn 200 fai a hrawh i hi chung ah a cheu hi cu minung um khawh ding a si ti lo, a thar in remh ṭhan dih an hau, tiah theih a si.

Thlichia Nih Chinram A Lonh Cang, A Hrawhmi Tlawmpal An Um. Kan ṭih tukmi Mocha thlichia nih Rakhine le Chinram cu a lonh cang i a tha zong a ṭum deuh cang caah a hring muici ah kan chiah cang tiah SAC tang khuacaan zohnak zung nih May 15, tuzing ah an thanh. A hringmi muici cu ṭihphan ding a um ti lo tinak a si caah a rawkmi fimtawl rian le mibawmhchanh rian ṭuan khawh a si cang tinak a si. Thlichia cu Sagaing ramṭhen, chaklei Kahtha khua pawng in nichuah thlanglei ah a kal tiah theih a si. Chinram a lonh cang caah hnangam tuk ding a rih lo.

Thlichia hnuah a hnuzul thlichia le ruah fak in a sur kho tiah khuacaan zohnak zung nih cun an thanh. Mocha thlichia nih Hakha khuathar ah inn pahnih a hrawh i pehtlai in a sur rih, thli cu a dai ngai cang. Paletwa ah inn a hrawhmi a um lo nain phone line a ṭha rih lo. Sami ah inncung a hawhmi a um len. Matupi ah CDF battalion hmunpi pakhat fak ngai in a rawk. Kanpetlet ah inn pakhat, biakinn pakhat le sianginn khan pahnih a cungcih a hawh hna. Peng dang le hmundang thawngpang theihfian khawh a si rih lo. JOINT TYPHOON WARNING CENTER (JTWC) nih a hnubik an thanh ningah May 15, nihin zanlei 6:30pm ah thlichia cu a tha a ṭum lai i cuticun a dih lai ti a si.