Thianglawr Timi ah Aa Tel Ding Na Si Lai Maw… Bible nih Achimmi Hi Tha Tein Rel

Home

Lawrkhawm Kong ( Rapture) 1Korin 15:51,52 = Ngaihmanh u: biathli kan chimh hna: kan dihlak in kan i hngilh lai lo, sihmanhseh law kan dihlak in thlen kan si te lai. A hmanung bik muko tum tikah, mitthepkar, chikkhatte ah kan i thleng dih lai. Zeicahtiah muko an tum lai i mithimi kha a rawk kho lomi ah thawhter an si lai i, kannih zong thlen kan si ve lai.

Lawrkhawm ti cu kan Laiholh cu asi loh, Mizo holh asi nain kan hman ngaimi bia asi caah kan hngalh dih ko sawk tiin ka hman bia asi. Kanmah holh zongah lawr cu kan hman ve ko. Mirang in cun rapture an ti i Latin holh ‘ Raptu’ in arami bia asi. Dawh i hnuh vurmar heiti phun khi a sawh. A bik in ‘ Cunglei i cawi-laak’ tiah kan ti ko lai. Greek holh cun ‘ Hapazo’ ti asi. Lawrkhawm kan ti tikah Jesuh nih a mithiangmi hna kha vancung i thli lakah Amah he i tong
ding in a cawi hna te lainak asi.

Khrih ah a thimi kha an thlan in pumthar in an tho than lai i vawlei ah tlongleenh manh lo in vanah a laak hna lai. Kha lio caan i zumtu a nungmi hna tu cu mitthep karah an pum kha thlen an si lai i a thothanmi hna hnu zul in vanah thli lakah Jesuh tong ve ding in laak an si ve lai. Baibal hlun chung in Enok le Elijah hna kha kan hmanthlak an si. Thi lo in vanah Bawipa nih a lawr hna. Mah kong hi Paul thiam nih 1Thessalonica 4: 13-17 chung ah fiang ngai in a tial rih. Rel te hmanh. Atangleite lawng ka van tenh lai.

” Cun kannih a nung i a taang komi hna zong anmah ( mithi a thothanmi) he cun hmun khatte in Bawipa ton awkah khuadawm ah khin cawi kan si lai i, Bawipa he cun zungzal in kan umti lai,” 4:17. Mi tampi nih lawrkhawm le Jesuh vawihnih ratnak hi kan cawh tawn. Lawrkhawm le Jesuh vawihnih ratnak hi ai dannak pali ka van langhter lai.
Lawrkhawm Cu:

  • 1. Mithiangmi hna ca lawng asi lai.
  • 2. Jesuh kha thlilakah an ton lai.
  • 3. Mifir rat in ara lai. Ruah lopi ah asi lai.
  • 4. Harsatnak lianpi ( Great tribulation) hlan
    ah asi lai.

Jesuh Vawihnih Ratnak Cu:

  • 1. Mithiang hna he van in a rung tum lai.
  • 2. Thlilak si lo in vawlei a phan lai.
  • 3. Khrih nih vawlei a pen cawlh lai.
  • 4. Harsatnak lianpi a donghlei ah ara lai.

Hlan deuh lioah pastorpa pakhat nih lawrkhawm kong le Khrih ratthannak kong hi phungah a chim lengmang. Kha tikah tlangvalpa pakhat nih capo ah a saih tawn. Mipi hmai zongah ati hram tawn. Pastorpa nih ai in peng ko. Vawikhat cu a hawile zuri pawl he lamah pastorpa cu an ton i mah tlangvalpa nih cun, ” Saya, na chim lengmangmi lawrkhawm dahngai a um ne tung lo, Jesuh zong cu ziah a rat bal ne lo,” tiin bia a hal.  Cun kal thiam lo in bia cu an hal chih. Athin hun pah in tlangvalpa kha amit ah dengteo in a zoh i, ” Nangmah le nangmah bantuk pawl ruangah hmeteh lawrkhawr zong a um rih lo i Jesuh zong a rat rih lonak asi ko. Ra leh seh law nang hna hi hell ah hme na kal ko la cu,” ati. Cip-khap ti loin pastorpa cu lam an kianh.

Mah tlangval pa cu pastorpa bia nih a ciah tuk i a rauh hlanah a lung ai thleng. A hawile zong an i thleng ve. Aneh hnuah cun mah hna pawl kha an bu hruaitu an hung si hna. Biahalnak in donghter ning. Lawrkhawm um sehlaw nang nai tel hnga maw? Jesuh ra than seh law teh a pennak ram ah na lut ve lai maw? Atu kan vawlei cung thil sining cuanh tikah lawrkhawm a nai ko cang. Zeitik caan paohah si khawh asi cang. Timh ciaten um hna usih!!