Thantlang Khua Cu Ralhrang Lentecelhnak Tual Bantuk Ah Aa Caang Cang

Ralhrang nih Thantlang an khangh ruangah cheukhat Laimi bia le hla cu ngaih ngam ding hmanh asi lo. Mipi kan ralkap santlaihlo le zeihmanh a tuah kholomi, ka lawngin a aukhuang sawhsawh mi bantuk ah an  chiah hna.  Ralhrang kuttang ah um ko I, inn le lo him maw a tha deuh, chikhat caankhat te chung cu inn le lo ngei loin, inn le lo sungh viar I, techin fapar chan tiang a nguhmi uknak tha le zalonnak hmuh dah? A taktak ahcun kan ralkap CNA le CDF hna hi meithal aa tlaih sawhsawh mi ah aruatmi Laimi chungin tamtuk kan um rih ko rua.

Dawtnak lakah a sangbik cu midang caah nunnak pek asi. Cu cu kan theih ko ahcun mipi kan ralkap hna hi soisel ngam ding, mawhchiat ngam ding kan si hrimhrim lo. Alang tlang I burbuk phen in aukhuan hi kan hman awk hrimhrim asi ti lo. Nihin ni tiang Thantlang khangh ruangah FB in mipi ralkap mawhchiat le soiseltu kan tam  rih, ningzak ngai kan si. Kan inn le lo cu phaisa in cawk khawh, sak than khawmi asi, nihin kan caah hriam atlaimi kan pasaltha hna pakhat an nunnak  hi Thantlang khuapi inn vialte nih a  caw kho lo, vawlei chawva nih a cawk khawhmi nunnak a si lo zong hi I fiang pah tuah hna usih.

Thantlang khua ah hriamtlai pazeizat dah hliam an tuar cang, nunnak an pek cang timi zong hi tuaktan thiam pah hna usih. Kan biachim holhrel hi Ui voihvoih in Voih sawhsawh ding kan si lo. Kan hriamtlai an hmai tal kan khap hna maw? Cu caah Laimi kan si ko ahcun, dohthlennak ah itel dih, hriamtlai pasaltha hna thazaang pek, dirkamh hi nihin kan rian ngan bik cu asi ko.