Thaizing Cu Ahohmanh Tlolh Bak Lo Ding Si Lai

Home

GRCM- Debate hi zaan hnih asi lai i, zaan khatnak hi Tipil kong i ruah asi lai, zaan hnihnak hi Trinitirian le Oneness kong asi lai. Tutan debate ding ahhin khat lei veve in main debater le assistant debater an um lai i, biahaltu minung 4 veve an um fawn lai.

Tutan kan debaters hna cu Trinity leiin siseh, Oneness leiin siseh, a thabik bik bak thim mi an si ko hna hi. Moderator zongah mino asi tung, hmuhtheih tampi a ngei tung, cawnnak ah le ai za bakin Pastor Hram Bik Lian nih a ka tuan piak lai. International rule ning bantuk in a si khawh chungin kalpi asi lai i, caan vialte hi moderator le Admin nih control asi lai.

Cucaah hi debate hi a tanglei ni le caan ah khin na umnak hmun tein nan rak zoh cio nak lai, Bawi Khrih min in kan in sawm hna. Time and date- July 30th-31th, 2022-US: 8:30 pm (EST)- Myanmar: 7:00 am-Australia: 10:30 am Miphun hawi nih an theih cio khawh nak lai, rak kan share piak cio hram u.

Trinity team hna:

  • Main debater: Rev. Dr Aung Myint Thang
  • Co-debater (asst): Rev. Dr. Benjamin Kham Bawi
  • Team: Pastor Abraham Aungte
  • Team: Saya Hrang Lian Cung (M.Th)
  • Team: Saya Tial Sang Ling (B.Th)
  • Team: Saya Johnly Fambawl (B. Th)

Oneness team hna:

  • Main debater: Rev. Sui Maung
  • Co- debater (asst) Evan. NT Hnuna
  • Team: Saya Van Nun Lian (MSc)
  • Team. Saya Paul Siang
  • Team: Saya Bawi Thawng
  • Team: Saya Tluang Hei Nawl

John Fready – July 30,31 , 2022 caan a phak tik ah, Khah! Zei kong dah debate an i timh mi cu si 1. Pathian kong ah Pathian pakhat ti le Pathian pakhat ah Mi pathum tihi si. 2. Tipilingnâk le khamhnâk kong ah Aho min in dah tipil cu kan ing lai. ti hi si fawn.

TAN DAN DIK LE DIK LO- Dr. Rualuk nih Samuel kha Pathian pakhat ah Mi pakhat a um tiah a rak tanter cang i, anih tu kha Pathian pakhat ah Mi pathum an um, tiah a rak tang ve. A ngai ngai tiah cun Pathian pakhat ah Mi pakhat tihi Bible nih a chim ning a si bal lo. BAWIPA hi Pathian a si, BAWIPA lawnglawng hi, tihi a chim ning tu a si caah, Pathian pakhat ah Mi pakhat ti si loin, Pathian cu pakhat lawnglawng a si, tihi Oneness zumhnâk tlaihtleng hrampi chim dan ding cu si deuh dawh a si.

CHEUH MI RUAHNÂK DIK LO- Tutan zong ah Israel R Thang nih trinity le oneness debate tuah ding cu ruahnâk a vun cheuh ve hna i, Pathian pakhat lawng a um ( God is one ) ti cu kan zumh ve ve. a ti. Asinain TRINITY NIH FIANH DING, a ti mi ah, Pa, Fa Thiang Thlarau cu pum dang cio an sinâk nan langhter lai, a ti than hna. Pum dang cio pathum a si ko mi Pathian pakhat lawng a um, ti cu kan zumh ve ve, hei ti than zong cu mah le mah i hlen tluk si ko . Pum dang cio in pathum a si ko mi cu Pathian pathum ti law law ah a tha deuh. A si lo hmanh ah, BAWIPA pathum ti tal in.

ONENESS = Pathian pakhat Mipum pakhat. TRINITY = Pathian pakhat Mipum pathum. Mah tihin ruahnâk a rak cheuh hna i, Oneness lei caah Pathian pakhat Mipum pakhat tiah a ti. Pathian pakhat ah Mi pum pakhat ticu ka voi khat theihnâk a si. Cun, a nolh than mi cu, ONENESS NIH FIANH DING a ti than i, Pathian cu pumkhat lawng a si. ( One person ) a ti than. Zeitik hmanh ah Bible nih Pathian cu pumkhat lawng a si, tiah a ti bal lo. Bible merh i fial le lih chim i forh si. Bible nih cun BAWIPA pakhat lawng a um, tiah a ti. Cu BAWIPA cu Pathian a si i, cu Pathian pakhat cu, Three distinctive attribute’s = Sinak phunthum ngei, Pa, Fapa le Thiang Thlarau sinâk a ngeitu kha Pathian cu a si ko.

Pa Fa Thiang Thlarau ti cu, Three persons maw an si ? Three title ? titu in Bible debate hau lai cu ! Trinity lei nih Pa Fa Thiang Thlarau cu pum pathum bak an si ko, tiah an chim lai i, Oneness lei nih Pathian cu Minung i â can caah Pa Fa Thiang Thlarau sinâk cu Jesuh ah a tling ko, tiah an chim ve lai. tiah kei cu ka zumh.

Israel R Thang nih hin Oneness lei an mual pho hna seh tihi a rak duh tak tak tinâk si dawh si. Tutan zong hi sawmmi ah â tel kho men, Amah nih cun debate ka uar lo â titer. debate uar tung lo ah, debate tuah ning cang ruahnâk kan cheuh hna ticu, Global Rawn Chin nih maw debate tuah ning cang ruahnâk a hal hnga ? Ruahnâk hal tung lo i mi ruahnâk va cheuh a hmang tawnmi laimi hi kan fim kan ti lai maw, kan i sawhkalh kan ti lai dah. Amah Israel R Thang cu Oneness kan hawi pa nih debate na ngamh lo nak a ruang cu fake account na si caah si ka ti le, thih a ngamh a ti.

AHO NIH DAH TEINÂK CO TE HNGA ? Tutan trinity le oneness online debate tuah ding cu GRC nih moderator a fialmi in control an tuah hna lai caah bia chim holh-rel kong ah zohchia tuk a um kho lem lai lo. Cu bantuk a um sual ah cun an aw kan thah ( mute ) piak colh hna lai, ti si. Trinity lei an si ah Oneness lei an si ah mah le zumhnâk kong ah cun Keimah â ti ve cio mi an si hna tik ah teitu ding um in an um cia cang theu hna lai dah ka hei ti.

Bia-chim holh-rel ah cun Trinity lei nih an tei deuh te hna lai ka zumh, a ruang cu Oneness lei debater hna khi Laitlang lairam ah a um ve bal lomi an si i, mizo holh tu a hmang kho deuh mi le a thiam deuh mi ve ve an si caah lai holh, lai bia te in lungdiriam lak i mah zumhnâk kong vun chim kha an i harh deuh te kho men. Debate a dih te lai i, caan a tawi tuk, zei ngai ngai kan chim manh tung lo an ti te theu hna lai tiah ka ruah.

Anmah lak hmanh ah cun, an team chung ah minung 4, bia a hal ve te ding mi hna an um ve i, cu hna ko cu an lungsivang in an ai puang nawn te men lai dah tiah ka hei ruah fawn hna. Mah le zumhnâk kong chim ahcun Oneness nih an tei deuh te hna lai tiah ka zumh ko. Asinain mi zumhnâk kong palh phawt ah cun trinity lei an duai te lai lo, (mah zumhnâk kong chim kho hua ha tung lo ah, mi zumhnâk kong soisel lawng thiam cu mark hmuh har ngai la 😁 ) Oneness lei zong chim awk hngal lo lung ar tukcun an um cu ka zum ve hlei lo.

Bia halnak caan khi zapi nih kan rak i ngaih bak mi caan a si lai nain, tuchan cu bia hi a chimtu nakin a ngaitu an thiam deuh cang ti theu kha chuak lai i, cu deuh cu a hal lo, cu ti deuh cun hal ding si nain, tiah, kan lung rak tling hawi te lo kho men. Debate a dih tik ah zei thil dah cang hmasa bik te lai ? ( mah le ruahnâk cio ) Debate nâk ah lungkhan in a cawlcang kho lomi paoh cu fb kuang ah ca tial le ca post in an i la colh than te hna lai. A donghnâk ah GRC nih a hlawknak cu a va co dih ding khi si thiam ko caah Trinity he Oneness he GRC nih a tei te ko hna lai.