Suu Kyi cu Kum 17 Thongtla Dingin Ralhrang nih Biakhiahnak Atuah Piak Cang

Home

Suu Kyi kum 6 thong bia an khiah chap: Zapi fonh kum 17 tlak ding a si cang – ┬áRalkap ukmi biacaihnak nih zeihmanh lehrulhnak caan tha ngei lo in, Suu Kyi cu kum 6 thong thlak ding in an khiah chap tiah theih a si.

Tutan, cawn nikhat ni ah biacaihnak zung nih an khiahmi hi Nay Pyi Taw le Yangon ah Suu Kyi a nu philhlonak ah tuahmi Daw Khin Kyi Foundation zung vawlei hmunhma kong he pehtlai in a si. State Counselor Suu Kyi nih a nawlngaihnak buar in man fawi tein caan sau caah cozah vawlei cu [Daw Khin Kyi Foundation] a hlah hna timi he pehtlai in a si.

Nihin tiang ah Ralkap (SAC) nih Suu Kyi cu sualphawt in bia an caih i biakhiahnak an tuah mi ning ah kum 17 chung thongthlak ding a si cang tiah Irrawaddy nih a thanh. EU nih Suu Kyi nih a nawlngaihnak buar in ziknawh le eihmurnak a tuah tiah sual phawt in biakhiahnak an tuahmi kong ah duhlonak fakpi in an langhter.

Hi bantukin, Ralkap SAC nih Ramhruaitu tazacuai in biacahnak an tuah mi kong he pehtlai in le minung pali hrithlai in an thahmi hna kong ah Malaysia Ramleng Pehtlaihnak Lutlai (Foreign Minister) nih a duh lonak a langhter. Cun, ASEAN hnatlaknak panga (5PC) zeihmanh an rel lo a si tiah Malaysia Ramleng Pehtlaihnak Lutlai (Foreign Minister) nih a chimchap.

A hlei in, Malaysia nih Ramkomh Kawlram mipi lei tang in kan dir, Ralkap nih Suu Kyi an thlahnak ding le NUG, NUCC telh in zapi telhmi tonnak a um khawhnak hnga duhnak a langhter. Tu bantuk in, Ralkap SAC nih Suu Kyi bia an caih i, thong an thlak cuahmah lio ah UN Palai nih August 16 phanh ding Nyi Pyi Taw tlawn ding a thawh tiah thawng a chuah. Cc: BBC, Irrawaddy.TCP