Sniper hi Tulio Ralhrang Teinak Dingah Kan Herh Bik Asi Ko

Nizan ah CNA Pu Hlah Htun le sniper Team biaruahnak ngaih tikah an kaa in a chuakmi lakah abiapi bik cu Sniper hi asi. An chimmi cu, Ralhrang kan nam khawhnak bik, ralhrang nih an tih bakmi cu Sniper hi asi. Alanghlat in khualak aa chawk mi hna lakah pakhat khat teng ko in an kah ahcun chun nitlak leng an chuak ngam ti lo. Cutikah drone team lei thawng kan thanh hna i an ithupnak hmun ah drone nih bomb a thlak chap hna. Cucu ralhrang nih an tih taktak mi asi. Cucaah mipi nih sniper le kuan zen hi nan kan cawk piak ahau ko. Mipi nih nan kawlhawl mi chawva hmangin thazaang chuah ulaw, Kanmah nih kan neih mi nunnak pakhat te pek in ralhrang kan doh ve lai i teinak kan hmu ko lai tiah an chim.

Thlichi Ruang ah Rakhine Ramchung Innzuat Saṭil a Thong Leeng An Thi. Rakhine ram, Yatehtaung peng chung ah May 14 ni i a hrang mi thlichia ruang ah innzuat saṭil caw le sia a thong leng in an thi, tiah theih a si. Innzuat saṭil an thihnak hmun hi Yatehtaung peng, peng kua chung ah a si i a tam deuh cu caw le na an si. “Innzuat satil a thimi nihin tiang kan hlat khawh mi cazin ah 3000 leng a si cang. Minung tu cu a himnak ah kan i ṭhial cang. Kan satil hna tu hi cu kan ṭhialpi kho rih hna lo. Kan hren hnanak hri tu cu kan phoih piak ko hna. Ti a kai a caan ah anmah te tlik le leek khawh ding in kan chiahpiak ko hna,” tiah khuami pakhat Ko Ting Lyin nih The Chin Post ah a chim. Mocha thlichia ruang ah Rakhine ram chung in minung 13 an nunnak a liam i inn rawkralmi a tam cemnak hmun zong a si, tiah theih a si.

Kokek Rawhralnak a Tong mi Myanmar Mi Hna Ca Ah India Nih Tilawng 3 In Bawmhnak A Pek. Mocha thlichia le ruahpi ruang ah harnak a tong mi Myanmar ram mi hna ca ah India Cozah nih eidin le sii-ai cu a voi khatnak tilawng pathum in Myanmar cozah sinah bawmhnak a pek. Hi bawmhnak hi Yangon Ramṭhen Chief Minister U Soe Thein le Yangon ramṭhen SAC ralbawizik U Zaw Heing hna nih an va don, tiah theih a si. Bawmhnak pekmi hna hi khouh-suai, changreu, ngakuang, buk (Tend) puan, dahmei, solar, mizaw namnak thirleeng (wheel chair), mei set, chain saw, sii-aii le pumpak thianhhlimnak thilri pawl an si, tiah theih a si.

SAC Ralkap Bawi Khual Tlawn Lio A Si Caah Hakha Peng chung Phone Line An Phih Dih, Thlichia nih Chinram a den hnu ah SAC ralkap bawi le SAC kuttang bawi hna cu Chinram an tlawn lio a si caah Hakha peng chung phone line an phih dih, tiah thawng theih a si. Hi kong he pehtlai in Falam um khumi pakhat nih, “Kan nih Falam hi MPT, Telenor cu an phih dih ve. Ooreedo hi a caan caan te ah a ngah. Internet line bal cu a ngah lo. Internet line hi an phihnak a sau cang. Zinghmuh Operation a um lio in khan a si cang. Tu hi Hakha lei zong cu an phih dih ve. Kan hei tuaktan ning ah SAC ralkap bawi le a kuttang rian a tuan mi pawl khual an tlawng ngai. An i chok ngai. Cu ruangah an phih i si men lai ti kan ruat. Cun, atu hi khuachung kip ah an duty ning a ṭha ngai hna,” tiah The Chin Post ah a chim.

May 18 ni kha kokek rawhralnak ruang ah harnak a tongmi Matupi peng mi hna sin ah, SAC nih Chinram Chief Minister rian a khinh mi Dr. Vun Suan Thang le SAC ralkap bawizik hna an tlawng. Anmah tlawn ruah ah Matupi khua luhchuah zong an phihkhar, tiah theih a si. Hakha khuapi chung hi phone line an phih dih lawng si loin khuachung lam aa tonnak kip le lamte kip ah SAC nih duty an laak dih ve, tiah theih a si.