Salai Van Lian Thang hi Lawmhpi Cio Hna Usih

Home

Cacawnnak kong ṭial le tulio kan boruak le ka nau le tampi ram le miphun caah rian an ṭuan lioah mah thawng hna hun ṭial hi ka sia a rem hrim lo nain sianginn ka kainak a sau pah ve cang i ṭial lioah sau deuhin ka hun ṭial ta ko lai i midang caah cun zeipi khi asi lo nain ka theithiam hram ko u, ti hun nawl hmasa ka duh ko.

Tlamtling tein MSc degree ka hun dih phawt ve. Pathian thawngin ka onnak mark zong a sang i kai lawm khun.
Yangon ah L.L.B. zong ka rak kai hnik bal ve cang nain Europe ah cun ka hman khawhnak zeihmanh a um lo caah lamphawk in cun a ngah fawn lo i a hram (zero) in kai thawk ṭhan caah pakhat hnu pakhat duhsah tein ka kai lengmang nak ah ka hun rauhnak asi. Cacawn ka duh ruangah ka duh tukmi ka kal taakmi le tuah ka duhmi ka hrialmi zong hi an tlawm te hna lo.

Language Program (DU3, kum 3), Gymnasium, Upper Secondary School Programme (HF enkeltfag, kum 1), BSc in Economics and Business Administration (kum 3), MSc in Development and International Relations (kum 2) tiah ka hun rau ngaingai ko. Asinain, caan cu la ko hmanhsehlaw ka ngakchiat tein kai rak tinh tawnmi nitlakram sianginn ṭha ah diriam tein a hram tein kainak caanṭha Pathian nih a ka onh ve caah ka lungdi cu a riam ko.

Ka Master’s Thesis cu tulio Kawlram ramkhel kong asinain ka specialization hi international relations le forced immigration and refugees lei asi caah a ka bawmtu ah a ṭhathnem ko lai, tiah University of Louvain, Belgium nih a tuahmi 𝐌𝐢𝐜𝐫𝐨 𝐌𝐚𝐬𝐭𝐞𝐫 – 𝐈𝐧𝐭𝐞𝐫𝐧𝐚𝐭𝐢𝐨𝐧𝐚𝐥 𝐋𝐚𝐰 (five master-level MOOC courses) zong kha zarhdongh le holiday ah ka tenh pah chih ve i kum khat ka kai hnuah ka hun lim chih ve. Hi program hi ka uar ngaimi asi i, a tanglei graduate-level courses panga (25 ECTS) an itel.

  • * International Law
  • * International Humanitarian Law
  • * International Human Rights Law
  • * International Investment Law
  • * Asylum and Refugee Law

Cun chimtlak lo khi asinain master program ka kai chungah Denmark University pa 7 ah a kai liomi international full-degree students a thong lakah kanmah bantuk zei silomi hna “specially selected” in an ka thim ve i, “Young Professionals in Denmark” roca zong an ka pek ve. Pathian thawng asi ko. Tuchun ka hun dih in “Ka pa ka dih ve cang e” tiah ka hun chimh i hmurka in a ka chawn kho lo nain siizung a ihnak in a kut tein a ka piah i aa lawmhnak mithmai ka hmuh tikah ka mitthli khi a tla.

Pathian nih a ka dawt i Bachelor Program kai dingin admission ka sok lioah university pahnih nih an rak ka cohlan veve i a thim kai rak harh ngaingai bal. Master Program zongah university pathum in admission an ka pek rih i a ṭha tiah ka sokmi cu si hna kaw a thim kai rak harh ngaingai ko. Vawleicung le Europe ah business cawnnak leiin sianginn ṭhabik lakah aa telmi Copenhagen Business School le University of Chinese Academy of Sciences nih komh in an tuahmi MSc in Public Management and Social Development (double master degree program) khi admission ka hmuhmi ahcun aa tel ve. Thim kai harh ko i chungkhar le hoi le ruahnak ka hal hna i atu ka dihmi te hi a tam deuh nih an ka duhpiakmi asi caah kaa thimmi le ka kaimi asi. Tuchun ah ruahnak a rak ka cheumi nan dih lak cungah khan ka lung aa lawm fawn.

Kum upat deuh hnuah a hram tein a thluak a tlimi le ca a thiammi mirang mino deuh pawl he tlawn len le dot khat hnu dot khat sianginn kai asi tikah competition a sang pah i, hoi nazi pakhat ca an zohmi kha nazi 2 hna zoh a hau tawn i ca a tam lio ahcun zan khua ka deimi hna hi a voi a tlawm lo. Kum sau nawn ramkhelrian ah kan u, kan pa le hnuzul in kan rak um ve hna i kum tampi cacawn ti lo hnuah mathematics hna tang 9-10 nih cawnmi in ka thawk ṭhan lio hrawng cu a fawi hrim lo. Nain, tinhmi cungah lungdong hin lo tein hacang rial bu tein izuam ko ahcun Pathian nih hlawhtlinnak a kan pek ko, ti ka hmuh caah a Cungah hin ka lung aa lawm.

“Cawnnak timi cu thih ni lawngah a dih” ti asi caah hmailei cawn rih nak kong cu Pathian nawl asi ko i, sianginn ka kai chungah thlacamnak le a phunphun in a ka bawmtu nan dih lak le a hleice in ka chuahka tein zingzan lucung kutchuan in thla a ka campiak i thluachuah a ka hal piaktu ka dawt tukmi hna hringtu ka nu (Sui Nawn) le ka pa (Nu Tlem Pa) cungah lunglawmhnak bia ka chim. salaivanlianthang