Salai Lungthli Tum Cingcing Asi Ko Hih, Malaysia Phaisa in 1000 Abawmh

Home

Malaysia ah tutan vanchiatnak kan tonmi cu ngaih a chia hringhran ko. Ngakchia pahnih le an pa cu an nunnak a liam nain ngakchia pate cu Pathian nih a nunnak a khamh i siizung ah tuhi dam lei a panh, a mit zong a au kho cang. Tuan ah damnak tlamtling hmu hram ko seh. Siizung a umnak caah tiah kei zong nih tuanvo a latu Mara Community Malaysia sin ah Rm 1,000 (500,000 MMK) ka bawmh ve. Mah le ti khawh tawk in rak bawm cio ve hram u. LTT

ATU TIANG KA PHILH LO- 1994-95 sianginn kum Lungler sianglairun sianginn (Middle school) ah tangsarih ka rak kai. Nikhat zarhpini cu kawl ralkap nih volleyball bengh an rak kan zuam i anmah ralkap kamp ah ka hawile he tiin ralkap he cun volleyball kan rak beng hna. Kan bengh canceo ah saihak hling nih volleyball cu a rak chunh i a rak kek. Cu ah cun kan dihlak in ralkap nih an rak kan tlaih i lawi an rak kan sianh ti lo. A thar nan kan cham hnu lawngah nan lawi kho lai an rak kan ti.

Atu tiang ka philh lo.Tangka kan la lai i a thar kan cawk lai, cun kan ra in cham hna lai kan ti hna zongah an rak duh lo. Nan zaam sual lai an rak ti. A si kun ahcun nanmah nih kan zul u law kan inn cio ah tangka kan la lai kan rak ti hna hnuah an rak kan zulh i kan inn cio ah tangka cu kan rak lak cio. Cu hnuah Lungler mino haotu (Patei atu Norway) sinah volleyball a tharte ks 200 in kan rak cawk hna i ralkap pawl cu kan rak cham hna. Cu hnu lawngah an rak kan thlah ṭhan i kan rak lawi kho. Atu tiang ka philh lo.

A taktak le ngaingai ti ahcun anmah ralkap zong nih khan tangka an rak thawh ve ding a si ko. Asinain annih nih cun an rak tho duh lo. An rak sual kho taktak. Nanmah leiah a awt ruangah a kekmi si an rak kan ti. A taktak ahcun anmah nih an sap i kanmah leiah a awt i a rilmi khi a si. An rak sual kho taktak. Atu tiang ka philh lo.

1995-96 ah Thantlang chaklei sang sianglairun sianginn ah tangriat ka rak kai ( TABC kan rak um lio). Nikhat zing cu khua lei tlung dingin kai thawh. Thantlang khualai ka phak ah kawl ralkap pahnih nih an rak ka tlaih. An kamp leiah an rak ka kalpi i lamkam ah kuva an caw pah. Cu lioah cun ralkap pakhat lawng nih a rak ka tlaih chung. Caan ṭha ka ti i ka rak i sual i ka rak zamtak diam hna. An ka dawi i an rak ka tlai kho thai ti lo. An ka dawi pah ah thang taktak in an ka pamhvolh len khi ka zampah in ka rak theih thluahmah. Atu tiang ka philh lo.

1996-97 Thantlang thlanglei sang siangsangrun sianginn ah tangkua ka rak kai. December thla Christmas laiah ni khat zing cu khua leiah ka rak tlung ṭhan. Khua ka phanh lai meng hnih hrawng a duh ah Lungler hrambunh kawl ralkap he kan rak i tong. A dang nih cun an rak ka chawn lo, nain an lakah senthum tarpa zu a ri taktakmi nih a rak ka tlaih.

Na kut na lu cungah khing law ṭhu a rak ka ti i ka rak duh lo. A ka bengh i a kut ka rak tlaihpiak, a thin a khenh chinchin. Cu ruangah cun a meithal in a rak ka tukput i a meithal ka rak tlaihpiak țhan. A meithal ka rak tlaihpiak pah in kai phet caah amah tu lamthlang ah tlaak a rak i tim. Ralkap tarpa cu ka rak tlaih manh i a rak tla thai lo. Cu lioah cun a kuttang sen ngei lo pa nih ngaithiam ko, zu a rit tuk ruangah a si tiah a rak ka nawl len. Atu tiang ka philh lo.

1998-99 cacawm kum Thantlang sianginn sang Odyssey boarding school pakhat ah ka rak um. Zankhat cu ca kan zoh lio zan suimilam 10:30 dinh caan ah khin zu a ri ngaingaimi kawl ralkap pakhat a ra i a rak kan hro. A kan tlaih i kan hawipa pakhat hoi hna cu a kaa chungah meithal peeng in a sawh i kah a rak timh. A țih tuk i pasalpi a rak țap len ko. Tlawmpal ah amah ralkap pa tu cu kan tlaih i an umnak ralkap camp ah kan rak ap i kan lawi țhan. Kan lawi hnuah zei ti an vun tuah timi cu kan hngal ti lo. Atu tiangin ka philh lo.

-Kan Rak Tuah Huam Lo Tuk, Nain Tuah Lo A Rak Ngah Lomi Thil- Kum 2001-2002 ah Shan ram nichuahlei Thailand ramri milutchuak cheknak, gate pakhat ah M-22 (AK-47) meithal i put in nifatin le zaanfatin dinh caan um loin kan rak hngak. Khualtlawng mațaw lutchuak paoh kan rak chek i mawțaw khaltu min, mawțaw number le khualtlawngmi minung (Pa zeizat, nu zeizat) zat le an phurhmi thil min vialte kha ralkap kamp (Office of Military Strategy) ah hrelh lo bakin thawng nan kan pek lai an ti i kan rak pek.

Anmah ralkap cu an ra fawn lo i kanmah palik tu kha an kan hngahter i duh zong duh lo zongah le huam zong huam lo zongah cuticun thawng cu kan rak thanh peng hna. Zanlei gate khar hnu zongah chunnitlak milutchuak cazin kha ca in țial țhan u law kut in ra kan pe u an ti hoi i zanlei chiar gate khar hnuah lawi loin cazin cu kan tuah ta i kan rak pek rih hna.

Ke in suimilam pakhat hrawng kal a rak si i tlangcung ah an um hoi i a rak cho taktak khi a si chinchap rih. Anmah uk lio cu si kaw tuah u an timi paoh kha tuah a rak hau cu mu. A rak fawi lo taktak khi si. Atu tiang ka philh kho lo. Ralkap uknak paohpaoh a țhami um ballo. Dinnak kha a cat lomi tiva bantukin luanter camcin ko u (Amos 5:24). Salai K. Biak Lian Thawng