Salai Aung nih Ralhrang Meeting Sawmnak le An Itinhmi Achim, Atha taktak

Home

Thantlang ah Chemical Weapon (Sii thalo hriamnam) hman i CNA-CDF vialte Thantlang in dawi dih dingin cunglei nih nawl an chuah cang tiah theih a si. Nizan nai te ah Ralhrang minung 30 a hun chiahchap hna. Tu ah Thantlang upa cheukhat auh in Thantlang sersiam tthannak kong an ceih pi hna. Ruah awk a um ngaimi cu Thantlang sersiam tthannak an hna a tlak lo ahcun Thantlang khuachung ummi kan ralkap vialte um kho loin dawi i anmah nih lak dih lawlaw itimhtuahnak an ngei lai ti ruah khawh a si.

Cun nihin Media pakhat ah Zaw Mee Lung nih tulio ahhin SAC Ralhrang nak in PDF pawl hi mizapi nih an ttih deuh hna tiah a chim. Tutan uknak an lak Ning le an i sersiam dan zoh tikah mizapi lungtluanh i an hram fehter kha an itim timi a fiangtuk. Cucaah tutan Thantlang kan sersiam lai an ti nak hi a si ko. An sersiam lai i an chim lai mi cu CDF le CNA ralhrang nih Thantlang an khanghmi kanmah SAC nih kan sersiam, Thantlang mizapi kan in dawt hna nan zawn kan ruah ti kha a si ko lai.

Thantlang cu kan Pu Miraltha Lal Luai khua a si. Kan pi le kan pu nih an thlanti he an rak tlak le sermi khua a si. Ralhrang nih an hrawh dih an khangh dih. Anmah nih sakpiak le serpiak kan hau lo i a duh zong kan duh lo. Kanmah kut bak in kan sersiam than lai. Inn le lo ti le mei menmen ruah ah kan nunnak pek in hriam kan tlai lo. Kanmah tein saknak nawl kan khua le kan ram i sersiamnak nawl kan Miphun kongah a ho tuahpiak hmanh hau loin kanmah tein itawlrel khawhnak nawl khi kan khelmi cu a si. Cucu Chin Miphun vialte nih kan ifian a hau.

Ti le mei, innlo le lamsul tuktak in an kan lem i kan izumh hoi ahcun vawlei caan dongh tiang Kawl ralhrang sal ah kan taang cang lai. Anmah Kawl hmanh dahkaw an lung a fim i Nunnak pek in an dohmi hna an si hih. (Kei cu Min Aung Hlaing le a minung pawl he cabuai pakhat ah thut in bia i ruah hrimhrim khi ka Ning a zak tuk. Khi nak in thih kaa thim deuh lai).Salai Aung

Thantlang Dirh Ṭhan Kongah Ramkulh SAC Cozah Le Thantlang Khuanu Khuapa Meeting An Tuah Pur (June ) 30, 2022, cawn ninga ni ah Hakha khuapi ramkulh cozah meeting hall ah Thantlang dirh ṭhannak kong meeting an tuah i Chin ramkulh SAC CM Pu Ngun San Aung nih a telpi hna. Pu Ngun San Aung nih cun biahmaiṭhi a chim hnuah atu i an tuah liomi meeting cu Thantlang dirh ṭhannak ding kong a sinak, meeting a kaimi ramkulh zungkip ṭuanvo ngeitu hna zong nih Thantlang hi a hlan bantukin a si khawh nakhnga chimrel cio ding,

cun meeting ah aa telmi Thantlang khuanu khuapa le Biaknak lei upa hna zong nih Thantlang dirhmun le dirh ṭhannak ah a herhmi zalong tein chuahpi cio ding, a bik in ralzam hna Hakha i ṭhialkamnak kongkau ah ruahnak chim ding, cuti ralzam ṭhialkamnak ah harnak a um ahcun mawṭaw timhtuah piak an si lainak kong le Thantlang dirh ṭhannak kongah a biapi bikmi cu i zumhnak a si caah pakhat le pakhat cungah zumhnak ngeih a herhnak kong a chim.

Cu hnuah North Western Command i Deputy Commander Brigader General Myo Htut Hlaing nih Thantlang kahdohnak ruangah ralzam in a ummi hna an umnak hmunhma ah chiah ṭhannak le Thantlang khuapi a daih khawhnak dingah khuanu khuapa le Biaknak lei hruaitu hna i bawm in rianṭuanṭi a herhnak kong a chim ve.
Cu khawh cun ramri runvennak vuanci Brigader General Han Win Aung le ramkulh cozah chungṭuan (Secretary) U Maung Maung San nih Thantlang dirh ṭhannak rian ṭuan khawhnak dingah zungkip i ṭuanvo ngeitu hna zong nih a hlankan in timhtuahnak ngeih chung a herhnak kong an chim ve.

Cu hnuah Thantlang lei in Rev. Dr. Lal Uk, khuanu khuapa in Pu Ngun Hram, Pu Ram Khar le Pu Lawm Bik hna nih ralzam hna an tlun ṭhan khawhnak ding le Thantlang dirh ṭhannak dingah ramkulh cozah le ramkomh cozah nih kan tuahpiak seh tiah an duhmi chimrelnak an ngei ve tiah theih a si. Meeting a kaimi ramkulh level zungkip ṭuanvo ngeitu hna nih Thantlang ṭhanchonak caah an ṭuan cangmi, an ṭuanlio mi le ṭuan an timhmi kong chimfiannak an ngeih hnuah North Western Command Deputy Commander Brigedier General Myo Htut Hlaing nih ruahnak peknak bia a chim hnuah SAC cozah Chin ramkulh CM Pu Ngun San Aung nih meeting kharnak bia a chim i an meeting cu an donghter tiah theih a si.