Ramdang Phak Hnu ah Laica Cawng Chommi Cathiamlo Kan Tam

Home

Laimi (Chinmi) kan chambau ngaimi pakhat cu carel dan kan thiam lomi hi a si. Carel dan thiam lo zonghi tthangcho lo pakhat a si ve. Carel dan kan thiam lo ahcun catialtu kha a si lo ningpi puhter a fawi tuk. Tahchunhnak ah Dalaan a si lomi hna Dalaan puh a fawite. Misual a si lomi hna misual puh a fawite. Social media chan kan phan I a mikip in catial cio a si.

Lai Media I comment tambik a petu pawl zong cathiam lo deuh le carel dan a thiam lomi deuh lawngte an si ti khawh a si. Ramdang ah kan phan I duh tawk in internet kan hmang kho. Facebook kan ong peng hna. Laitlang ah tang 4 zong awng loin ramdang phak hnu ah Laica ttial a cawngchom mi kan tor/ramdang phak hnu ah Laica tial thiammi kan tam. Ca tampi kan rel lo. Cauk ukkhat zong kan rel fawn lo/kan lim lo.

Carel dan a thiam lomi cu ca an relmi a tlawmtuk ruangah a si ko. Thawngpang rel tuktak vial lawng cun a za bak lo. Cauk ningpi tal na lim ve bak a hau. Ca na relmi a tlawmtuk ahcun catial thiam pakhat nih ca a ttialmi kha zeidah a tinhmi a si I zei hi dah a ttanh I zei hi dah a dirpi lomi a si ti kha fiang tein na thei kho lai lo. Laimi tampi cu catialtu nih a tinhmi le a dirpi mi le a sawh duhmi le a tial hnawhchan pawl kha fiang tein kan thei kho ti hna lo/kan i fiang hna lo.

Cun a biafang ning bak in fawituk in lak kan hmang. A sullam zong thuk deuh in kan ruat huam lo. A tial hnawhchan mi le a sullam pawl kha tuaktan kan hmang lo/kan huam lo. Cheukhat catial mi cu voikhat rel in a sullam a fiang colh ko nan catialtu tampi ruahnak cu voihnih le voithum rel hnu lawng hna ah a sullam le a tinhmi pawl theih khawh an si ve. A bik in cathiam sang pawl tialmi rel tik ah an duhnak le an sullam kha theih zau a har ngai.

Bible sianginn a kaimi cu cauk tamtuk kan rel. Philosopher, scholar le theologian min thangthang pawl catialmi kha tamtuk an kan relter hnu ah an chambaunak le an tthawnnak le an derthawmnak le an tanhmi le an kalpi mi le an dirmi pawl kha theih khawh kan I zuam. Mah pawl fiang tein kan theih khawh lo ahcun kan sayate/professor nih hmak (mark) tam an kan pe duh lo.

Aruang cu catialtu I a pommi le a ruahnak le a tinhmi pawl kha fiang tein kan theih lo ruangah a si. Tahchunhnak ah sianginn kan kai lio ah kan professor pa nih John Ratzinger (Pope Benedict XVI) cauk cu zarhchiar te ttialding (weekly essay) caah a kan relter. Mah cu caan ka nei lo I kan lim thlu lo tik ah a tialmi a sullam le a ruahnak le a pommi pawl kha fiang tein ka thei kho ti lo. Mah tik ah ka professor nih hmak (mark) tlawm deuh a ka pek. Aruang cu a catialmi fiang tein na thei lo/na fiang lo a ka ti ruangah a si ko.

Cataang nei le cathiam deuh pawl nih ca an ttial tik ah fawi tuk in biakhiahnak tuah piak lo a tha. Voihnih voithum zong relpiak than ah a tha. Mah tik ah a tinhmi le a pommi le a ruahnak le a dirpi mi le zeidah a duhnak a si timi cu kan theih khawh lai. Catialtu pa nih a tinhmi le a tialmi sullam fiang tein na theih lo ahcun catialtu pa kha a si lo ning piin puh a fawite.

Cucaah cun cauk tampi rel ve hna uh sih law carel dan thiam zong cawng ve hna uh sih. Kan I fiang set lomi cu voihnih voithum zong relthan ko hna uh sih. Kanmah cauk tamtuk a rel cangmi hmanh nihhin theologian le philosopher pawl catial mi khi voikhat relnak lawng in an sullam cu kan theithlu colh ve hna lo. Kan nolhthan hnu lawngah a sullam tha tein kan I fiang ve. Carel danthiam zong hi tthangcho pakhat a si ve.

Laimi (Chinmi) lak ah Lai Media le midang tialmi tangah comment a pe tambik pawl khi 100 chungah 85 hrawng cu cathiam lo le ca tampi a rel lomi deuh an si lai. Cauk pakhat zong a lim bel lomi an tam. Mah tik ah an duhning poah in comment an pek lai, catialtu ruahnak le a tinhmi kha fiang tein an thei fawn lai lo.

Laimi carel danthiam lei ah kan chambau tuk rih. Cauk tampi kan rel a hau. Lai Media I comment tamtuk pek a hmangmi le mi tialmi tangah comment pek a hmangmi Laimi tamdeuh cu sianginn kai uh law nan sayate nih hmak 100 chungah 50 hrawng lawng an in pek hna lai. Kan zate cun kan si ka ti bak lo. Carel danthiam mi cu kan tlawmtuk rih. update- Saya Vantum