Ralhrang He Tonnak A Tuahmi Cu Mipi Ral Nan Si Ve

Home

3 July update – Ralhrang He Tonnak A Tuahmi Cu Mipi Ral Nan Si Ve- Ralhrang ralkap cu mipi ral an si. Cu bantuk in cun atu lioah ralhrang he ai tongmi cu ralhrang hawikom nan si ruangah mipi ral nan si ve. Toidor nun ngeih le nunnem cu a țha tukmi a si. Baibal ca zongah nunnem a țhatnak kong kan hmuh. Nun a nemmi cu lunglawmmi nan va si dah! Pathian nih an kamhmi hna kha nan co lai. (Matthai 5:5) tiah a ti.

Sihmanhsehlaw zeidang ah nunnem le toidor nun ngeih si loin mipi a that cuahmah i inn lo vialte a khang dihtu ralhrang sinah nun va nem ngai cu a țha lo. Toidor ngai in va um i, Thantlang khua kan sersiam țhan hna lai tiah ralhrang he ai chawnbiami hna khi nunnem le toidor nun ngeih a si lo. Cucaah nunnem man i co dingmi Pathian kamhmi an co lai lo. An co dingmi cu hell a si deuh lai. Toidor nun ngeih zong a si fawn lo i ralchiat tu a si deuh. Mi a cheu nih cun dawtnak an ngeih ruang le Thantlang mipi an dawt hna ruangah a si nan ti men ko lai.

Atu lioah hnawhnam ngai in Thantlang kan sersiam țhan lai tiah ralhrang ralkap he hrimhrim i ton a herh lo i anmah sin hrimhrim ah lungtlinnak lak zong a herhmi a si fawn lo. Cucaah cun ral cu ral an si ko i hawi nih nunnak pek in an doh cuahmah lioah ralhrang he ai tong i ai chawnbiami hna cu Pathian kamhmi an co lai lo.

Thantlang kan sersiam țhan lai tiah ralhrang he i tong in khuakhan ținak le lungtlinnak an ngeihmi cu ralhrang he lung khat in an dir ți khi a si. Cucaah ralhrang he ai tong i hmun khat ah rianțuan ți dingin khuakhannak le lungtlinnak a tuahmi paoh cu ralhrang an si ve i anmah ralhrang he an i khat bak. A donghnak ah cun Thantlang sersiam țhan nakding kong ah ralhrang he ai tongmi hna kha ralhrang nih mi tuknak tanbo ah an hman beh te hna lai. Atu hmanh ah Thantlang sersiamnak kong kan ceih lai tiin an thluak an leh hna hnuah an lung an lak hna i tonnak an tuahpi hna.

Atu dohthlennak tuah cuahmah lio i a karlak ah ralhrang he ai tong i khuakhan ținak a ngeimi paoh cu zei bantuk minung nan si le aho nan si hmanh ah nanmah tein kannih cu ralhrang leițang kan si i mipi ral kan si ve ti kha philh hlah u. Dinnak kha a cat lomi tiva bantukin luanter camcin ko u (Amos 5:24). Salai K. Biak Lian Thawng