Rakhine ah Tanghra Camipuai Tuahmi Minung 17000 Tluk An Si
Rakhine Ah Tanghra Camipuai Phimi 16,000 Leng An Si. 2022-2023 Rakhine ramkulh chung camipuai tuahnak hmun 60 ah siangngakchia 16,928 nih tanghra camipuai an phi tiah Rakhine ramkulh, fim cawnnak zung cazin ning ah theih a si. Camipuai tuah ding in min cazin a petu dihlak hi 19,290 an si nain cu chung ah minung 16,928 lawng nih camipuai an tuah i, 2362 an bau tiah an cazin ah an langhter.
Rakhine ramkulh in tanghra camipuai a tuahmi hna lakah hin Paletwa peng Seinhnginwa(စိမ်းညှင်းဝ) khua in Sittwe ralzaam dornak camp ah ralhrial in aa dor mi hna zong an i tel tiah theih a si.
“Cawnning hlun in a cawngmi siangngakchia ca ah cun tutan hi kum donghnak tanghra camipuai an tuah a si cang lai tiah cazoh nih a thanh, tukum i vanchiat ah tanghra camipuai a sungmi hna ca ah cun hmaikum cun cawnning thar grade 12 tiang a si cang lai caah, camipuai an tuah kho ti lai maw, asiloah tang zeizat in dah an cawn lai timi kong ah fiang tein an thanhciami a um lo, ati tiang an thanhning ah cun tukum tanghra camipuai a tuahmi hi a donghnak caan ṭha an ngeihmi a si ko” tiah private siangsangrun uktu U Win Kyaw Lin nih a chim. 2021-2022 cacawn kum Rakhine ramkulh ah tanghra camipuai a tuahtu hi minung 41000 peng an si i 47.25 nih awnnak an rak hmuh.
Mindat Ah Tanghra Camipuai Tuahmi 80 Tluk An Si. 2022-2023 Cacawn kum Mindat khuachung ah tanghra camipuai phitnak cu nihin March ni 8 in an thawk i a phimi siangngakchia hi 80 tluk an si tiah theih a si. SAC nih hramhram in uknak a laak kum hnih chung ah tutan hi a voi khatnak Mindat ah tanghra camipuai phitnak an tuah hi a si. Ram pumpi huap in nihin March ni 8 ah SAC kuttang sianginn ah tanghra camipuai phitnak an tuah hi a si i, Chin ramkulh Mindat no.1 siangsangrun zong ah tanghra camipuai a tuahmi siangngakchia an um tiah theih a si.
Mindat khuachung no.1 siangsangrun ah a ni khatnak Myanmar subject an phi, camipuai a phitu cu an tlawm ngai tiah Mindat khuachung fim cawnnak zung rianṭuantu hna he naihniam in a ummi pakhat nih a chim. A luancia 2021-2022 ah SAC ralkap nih hramhram in uknak a rak laak ruang ah Mindat zong ah tanghra camipuai tuah a rak si lo.
Tukum 2023, tanghra camipuai cu March ni 8 in 18 tiang an tuah lai tiah theih a si, Chin ramkulh chung ah Kanpetlet le Thantlang telh lo pengkulh a dang ah cun tanghra camipuai an tuah kho hna tiah theih a si. 2022-2023 cacawn kum ca ah tanghra camipuai tuah ding in min cazin a petu hi 179,742 an si tiah SAC nih cathanh an chuak. The Mindat Post, The Chin Post