Pyosathi pa Cu AK-47 Meithal Zunkhatte He CDM an Tuah

dailychin

Meithal He PDF Sinah A Lutmi Pyusawhti Pakhat Cu Kyats Sing 100 An Pek. Sagaing ramṭhen, Yinmarbin peng Banbuai khua um pyusawhti sakhan in pyusawhti pakhat cu May 20 zanlei suimilam 3:00 hrawng ah AK 47 meithal le zenkuan he kan sin i a rak luh caah phaisa kyats sing 100 kan pek i a chungkhar hna zong a himnak hmun ah kan chiah hna, tiah tualchung hriamtlai Bo Tauk Htun phu in ṭuanvo ngeitu pakhat nih a chim.

Hi kong he pehtlai in ṭuanvo ngeitu nih cun, “Anih hi chuah a duhnak a sau ngai cang nain caan rem a um lo caah tuan in a chuah khawh lonak a si. Atu zong dum ah mehhang ka zal lai tiin a hawile a hlen hna hnu ah a zam i, a chungkhar hi minung 9 hrawng an si caah mipi sin ah phaisa cawi chung in kyats sing 100 kan pek hna,” tiah a chim. Pyusawhti pa cu AK 47 zun 1, kuanbawm 3 le meithal kuan 90 he a zam, tiah theih a si.

Sagaing Peng Chaklei Kahdohnak Ah PDF Ralkap 4 Nunnak Liam. Sagaing ramṭhen, Sagaing peng chaklei ah SAC ralkap le PDF kar kahdohnak a chuak i, PDF ralkap 4 nunnak a liam, tiah theih a si. Cupinah SAC ralkap nih rallam an sial ruangah ralhrial in a zammi tualchung mi motor pakhat aa let i, nu 1 a nunnak liam pinah minung 6 hliamhma an pu, tiah theih a si.

May 19 zinglei suimilam 6:00 hrawng ah Sagaing peng, Padu khua ah rallam a sialmi SAC ralkap 30 hrawng cu PDF nih an kah hna. SAC ralkap nih PDF sakhan pakhat an khangh leng ah bomb an hmanhmi a puah ruangah PDF ralkap 4 cu an nunnak a liam, tiah Kyaukse PDF nih an langhter.
Kangyikone le Selaygyia khua kar, Kangyikone le Padu khua kar hrawng ah May 19 zan tiang kahdohnak a chuak i SAC ralkap nih hriamngan an kah ruangah Padu khua inn 1 a rawk, tiah tualchung mi hna nih an chim.

SAC Ralbawi Sai Kyaw Thu Thihnak Kong Ah Minung 10 Tlaih An Si! Aung San Suh Kyi le President Win Myint taza cuaitu a simi Sai Kyaw Thu thah a tonnak kong he pehtlai in Yangon khuapi chung dohthlennak tuahtu phu, Yangon Revolution Force(YRF) in ralkap 10 cu tlaih an si, tiah SAC nih an thanh.

Ralkap sianginn a dihmi, L.L.B, L.L.M degree a la i ralkap a tlami Deputy Colonel Sai Kyaw Thu cu a luancia 2022 April 22 zanlei suimilam 2:00 hrawng ah khan Yangon ramṭhen Tinkankyun peng 16/2 sang, Aungyadana sii-inn pawng ah thah a rak tong, tiah theih a si. Cu thahnak kong ah lunghrinhmi Yangon Revolution Force (YRF) chungtel Ar Kar Htet Kyaw, Ko Myo, Lah Pyi Eng, Ye Kyaw Paing, Ngein Maung, Zin Myo Oo, Kaung Way, Min Set, Chit Ko Ko le Kyaw Lwin Oo hna cu tlaih an si, tiah SAC nih an thanh.