Pogba nih Man Utd Chuahtak In Juve ah A Kal Cang Lai

Home

Dailymail nih alanghter ning ahcun, French midfielder Paul Pogba cu Juventus ah free tranfer in a kal lai tiah a ti. Mah hi hi tuzarh Saturday ah lungtlinnak minthut lai tiah achim.  Kan theih bantukin Pogba hi midfielder ahcun a tha bik tiah chim mi asi. 2013-2016 ah khan Juve ah a rak um cang mi asi. Juve in Reds ah aa thial. Tutan ah Pogba nih Reds chuahtak in Juve kal aa timnak hi Reds nih contact sign a tim ti lo ruangah asi.

Vawleipi Nih Hlanlio Bantukin An Tlaihchan Tilo Mi Kawlram Hruaitu Chuak Cam Tuak- 2022 June 19 cu Daw Aung San Suukyi 77 kum tlinnak Chuak cam Tuak asi. Vawlei kili ah aum mi Kawl mi vialte nih Amay Suu Chuak Cam Tuak cu hlunghlai ngai in an tuah cio hna. Mipi hruaitu cu Kan Pi lawng asi, a nun khua sau seh law, thong chung chuak zawk zawk seh tiah thla kan cam cio hna. Amah nih a dawt I a dawtu Kawlram mipi he a rau hlan ah dam tein tawnnak um hram seh tiah thlacam thawng cu khuari bang in a thang lulh ko.

Facebook, Instagram. Twitter, WhatsApp, News le Media kip cu Kan Pi Suu Chuak cam tuak nih a zelh dih hihiar ko. Capar, Biazai, Muiṭawn, hman thlak, le adang dang dawtnak he tuahserhnak tampi relcawk lo he, Kan Pi Suu Chuah ni lawmhnak le thlacam nak in, Vawleipi cu an khat dih ko. Cu nih a langhter mi cu Kawlram Ramkhel le kawlram hmai lei cu Kan Pi Suu lawng lawng nih a hip dih ko. Kawlte Politic a ngat nak cu Amyo, Bada, Thathana phun thum ah si ti loin, Kan Pi Suu a si cang kha 100% hngalh khawh asi.

Kawlram mipi lungthin ah Kan Pi Suu lawng lawng ti kha hmuh khawh asi. Hmai lei zong amah lawng asi ko lai. Kan Pi le NLD kan ṭanh paoh ahcun Politician Certificate ngah colh asi cang. Hmunhma le ṭhutdan sang hmuh colh asi ve, mipi lungthin ah. Cucu tulio Kawlram Ramkhel thlihran ning cu asi. Nain Hlanlio Bantukin Vawleipi hruaitu luban rual nih Kan Pi Suu HBD caah an tlo ti lo ti hi hngalh khawh asi ve. Hlan lio bang in Kan Pi Suu nun khuasau nak caah siseh, A luat nak ding caah siseh, thlacam piak nak le an saduhthah an phuang lem ti lo. An kaa aa cip mi Vawleipi hruaitu an tam deuh.

ASEAN hruaitu lak ah Singapore Ramdang Vuanci Vevian Balakasip lawng nih Kan Pi Suu HBD cu a lawmh pi. Vawleipi a hip dih baltu Kan Pi Suu caah thilṭha asi lo I Lungnuam asi ve lo. 1989 -2010 Inn chung thong an thlak lio ah: Kan Pi Suu HBD poah ahcun: Vawleipi nih amah an philh lo I an ṭanh pi nak le thlacam piaknak in Vawleipi le Vanchum pi khi a zelh dih hihiar tawn. Kan Pi Suu Ralṭhatnak, mipi le kawlram caah sifah Retheih zawnzai nak aa thimh I a tuar ning cang; tbk telin Kan Pi Suu limhang cawisan nak le paput lang cawih nak in a khat tawn.

Vawleipi kili ah khual tlawn mi Kawlram mi cu “KEI CU Kan PI Suu ram in a ra mi ka si” an ti ahcun Mithmai ṭha an hmuh I upat an tawn ve. Ramdang mi ko nih hin Kan Pi Suu hi an ṭihzah I an upat tuk ti cu hngalh khawh asi.
Sihmanhsehlaw, cu vialte cu biktaling in aa thlen dih I Zawng parathlei phun in thil a kal cang. Aruang bik kan kawl tikah: ICJ ah Rohingya Cihmih Thahnawn nak ruang ah asi. 2017 – 2018 ah Rakhine ram ah Rallokap nih nawl an buar mi Genocide (Rohingya Cihmih Thahnawn lio ah) he pehtlaih in a kaa aa cip.

ICJ ah Cihmih Thahnawn tu Rallokap cu a va khum zual hna caah, Vawleipi nih upat hmaizah nak cu zuur tiah hmakhat te ah an zawr dih. Vawlei kili um pangpar dum, Public Garden, Library, Museum tbk ah an chiah mi Kan Pi Suu hmanthlak tampi cu an lak ṭhan dih ngawt. An pek mi minṭhatnak le laksawng tam ial zong chut ṭhan asi. American Genocide Museum ahcun: Kan Pi Suu le Rallokap Bawizik hna hmanthlak cu aa lawh ko tiah hmunkhat te ah thanh nak tiang an tuah cang. An tar ṭi. Cu tluk tiang cu Kan Pi Suu limhang cu Genocide le Tlangcung mi Hnuchit ruang ah an tla cikcek. Apoi tak tak khi asi ko.

1988 in 2010 tiang Ramkhel ah a Hawikom asimi Tlangcung mi cu 2010 thawk in hnu a chit hna. Zei ah a rel ti hna lo. Reconciliation timi I rualrem ṭhan nak cu Tlangcung miphun he kawl lo in, Rallokap bawizik rual he a kawl. Tlangcung mi nih Kum 70 leng Ramkhel hnawh mi le hriam tlaih hnawh mi Federal kong cu hu achit diam. Democracy in kan kal hmasat lai; Hlutdaw in Rallokap 25% kan dawi hmasat hna lai; Cu hnu ah Democracy Federal in kan kal lai tiah a ti hna. Bahu ah power aum bak mi Federal tu kha Tlangcung mi cu kan pek hna lai ati. Cu hmanh ah biakam senthuhnak aum lo. Panglong biakamnak hi Kan Pi Suu nih atlin ter lai tiah Tlangcung mi le vawlei pi nih zumh mi le ruahchan mi cu asi. Nain a tlin ter duh ti lo.

NCA cu 21st Panglong tiah min a thlen I a can a sau ter. PEACE caah Ramdang le UN nih bawmh mi cu NCA hruaitu hna rumnak ah aa chuak diam ai. Ram nih zei dah a ka tuah piak lai timi nakin, Ram caah zeidah ka tuah khawh lai timi lawng hi ram daw tu le Phuntungtu vialte tuak uh law, ruat uh tiah John F. Kennedy bia roling cu aa hlan I, a chimh ve. Kawlram mipi cu kan carel atlawm tuk caah Kan Pi Suu bia roling ah kan ruah dih. Rohingya cu a zangfah hna lo pin ah, Rohingya Huatnak bia zong a holh rih. Rohingya cung ah dawtnak zangfah nak le thlachiat ruahnak pelte hmanh a ngeih lo tiah Vawleipi nih an mawtchiat ve. Rohingya hi hna an kan hnawk tuk le thah dih ah a ṭha deuh ti tiang thiamloco tertu zong an um.

Rakhine miphun cihmih awk ah Henry Van Ṭhio telin sen a thuh rih fawn. ICJ ruangah Kawlram pi le Kawlram minung zong Vawleipi hmai ah mithmai a bit I limhang a zawr cikcek. Rakhine nih tuanphung thar an chuak bak ve. Thakbere cu asen siseh, a hrin ah siseh, a thak ning a ziam hlei lo. Kan Pi Suu cu Voksa hang bak asi, I dinh sual cikcek ahcun kan loh lai an ti.

Cucaah Paucan Dohthlennak cu Rohingya cihmih nak tluk in vawlei pi nih apoi mawh mi ah an chiah ve tilo. A phi chuak ah NUG le PDF CDF cu an kan bawmh duh ti lo, an kan chan chuah duh ve ti lo. Aruang cu Rohingya kong ah Kan Pi Suu aa palh cikcek caah asi. Tlangcung mi he Reconciliation tuah lo in Rallokap bawizik rual he reconciliation atuah caah aa palh cikcek nak asi. KAPA I RALKAP BUPI ti tiang in a cawisan hna. Rakhine AA le Tlangcung hriamtlai bu he I doh nak ah a thih mi rual zong upat nak roca le laksawng, min ṭhat nak le Thura tiang apek hna.

Cucaah Paucan Dohthlennak ah siding tluk le dirhmun tiang kan phak khawh lo hi Chin Dr te pahnih santlaih lo asi hrim lo. Kanpi Suu nih palh lo awk a rak I palh caa tu ah asi. Tehte: 77th HBD ah thlacam piak tu le malsawm tu an um ti lo hi nan hngalh cio ko. Cucaah Paucan Dohthlennak cu American le Nitlak ram (EU) hna nih thazang an pek lem lo. Kawlram kong kan ti ahcun: Paucan Dohtlennak nakin Rohingya Cihmih nak kong tu a laar deuh cang.

American a holh lo ahcun Vawleipi cu zeihmanh asilo ti cu hngalh cio mi asi. Rohingya kong ah American a bia tam ning le Paucan Dohthlennak ah American an dai tuk ning hi tuak ko uh. UN American Palai pa nih U Kyaw Moe Tun cu bia a hal. NUG nih Dohthlennak nan tuah mi le Rohingya kong hi Zeitluk tiang in dah pehtlaih nak a ngei tiah bia a hal tikah, KMT ar ko in aum. Innchung Inn leng khi a hei hei cakhawng le asi cang. UN le KMT Online meeting an tuah lio ah a hal mi asi. Kan Pi Suu cu Kawlram mi lungthin ah Rampi Hruaitu asi zungzal, hmai lei a thih hnu zong ah asi lai nain; Rohingya le Tlangcung mi cung ah cun aa palh bak ve ko ti hi hngalh a herh hrinhran. Kan PI Suu nih hi vialte aa palh nak hi, remh khawh asi lo ahcun; Vawleipi ah Kan Pi Suu upat nak cu a zawr zungzal lai I, a limhang a tla zungzal lai ti hi kan philh lo ah a ṭha lai.

Kan Pi Suu cu Rampi ai awh tu in ICJ ah a kal I bia a chimh mi kha: Rampi ṭhat hnemh nak caah asi maw? Rampi caah Rallokap lei ah ṭanh in bia a chimh maw? Vawleipi nih sual phawt mi kha amah Kan Pi Suu nih a zumh bak lo asi sual maw? Genocide timi cihmih Thahnawn nak kha a zumh bak lo caah asi maw? Amah Kan Pi Suu hrim zong, Rohingya cung ah Genocide kan tuah bak lo a ti duh nak asi maw? Tbk cu amah Kan Pi Suu nih a hngalh bik ko lai.

Nang le kei te Kan Pi Suu thih ngam in a ṭanh tu pawl nih phisin khawh ci asi ti lo. Kan nih Kan PI Suu minung hna nih kan ti ve mi cu: 1nk: 2008 phunghrampi ah Rallokap cu Rallokap kong he pehtlaih in anmah nih anmah duh ning tein khuakhan Lairelnak le biachah nak tlin tein an ngeih. Kan Pi Suu nih a ti khawh ci asi lo kan ti ve. 2nk: Kan Pi Suu hi ahmunhma ah a sican mi thil dik le thawngpang dik kha an chimh lo. Thawng deu le thil sining dik lo kha a sin a tlunpi caah asi kan ti ve. Nain IT chan le Media chan ah kan minung hna chimh chawm mi lawng I rinh ti cu asi khawh ve lo mi asi.

NLD Upa Luban rual nih thildik le thawng dik an chimh lo mi hi apoi bik mi cu asi. Maha Biuha hmang in Phisin a herh tiah ruahnak an pek cio lo mi hi NLD Upa Luban le CEC an palh bik nak cu asi. Nain thil sining dik kan zoh ve tikah, NLD CEC le Upa Luban hna nih ruahnak chuahpi mi um lem loin Kan Pi Suu nih a ti ti mi lawng in an kal mi hi ICJ, Rohingya le Tlangcung mi kong ah aa chuah sual mi asi. Rallokap he Reconciliation a tuah mi Philosophy le Theory zong aa palh cikcek.

Kan Pi Suu nih achimh mi le ati mi cung lawng ah YES ati tu NLD CEC le Upa Luban an si nak nih apoi bik mi cu asi. Cucaah Rallokap nih an hngalh I Kan Pi Suu an tlaih colh hi asi. Kan PI kan tlaih ahcun an cang khawh lai lo ti kha an hngalh tuk. Paucan Dohthlennak tan ah Rallokap nih ruah bang lo mi, GZ thawng in Khuaruah har in revival a tlung ai. NLD upa luban rual le CEC nak in GZ hruaitu hna cu let 100 in an fit deuh ko. A pa nakin a fa thlakhat a upa deuh timi Kawlte tuanphung kha atak in atlung cang.

NLD party chung ah Kan Pi Suu nih Kutke le bochan ding mi an um lo I, bochan tlak si awk ah a remsiam hna lomi hi apoi bik mi cu asi. Kan Pi Suu lungput ka hngalh ti tu le amah duh ning ka hngalh ti tu belte thah cawk lo an si ve. Cucaah palh lo awk kha an I remh manh ve tilo I, Vawleipi nih Kan Pi Suu le NLD party cung ah an lung a tlin ti lo. Cucaah Paucan Dohthlen nak tan ah kan ruah ning le kan bochan hna ning tlukin, American le a hoikawm EU le Ramdang nih an holh tuk lomi asi. GZ nih Federal an ti mi zong an holh bal lo I, Kan Pi Suu luat ter ding zong an chimh tuk fawn lo. Rohingya kongkau tluk in Paucan Dohthlennak le Kan Pi Suu kong hi ruah awk ah an rel ti lo mi nih MAH kan tei rih lo nak cu asi.

2008 Phunghrampi ning in Tamada nin Ralbawizik cu nawl a pek khawh lo caah asi tiah Kannih NLD fan nih kan ti ve. Cucaah Rallokap cu sualnak, sual phawtnak le dantat nak in an luat zungzal (Impunity) tiah bia si kan phai I kan silh nalh ve. Rohingya cihmih nak bantuk tuksapur sualnak mangtara a buar nak zong cu ruang ah asi ko tiah Kannih vialte nih kan ti, kan I hlihphuah khawh dengmang ve. Sihmanhsehlaw, tuak awk le ruah awk aum ngai mi cu aum. NLD party cu aasem nak hrim in Democracy party le Pyithuh Party asi diam cang. 2017-2018 ah Rallokap nih Rohingya miphun cu tuksapur in cihmih Thahnawn nak cung ah mipi cozah pi nih hi tluk lawmmam in kaa cip awk asi lo, Khuk cung ah ke pahnih phir riang mang buin To ko in le Kut pahnih phir in Letpaih riangmang in zoh sawh awk cu asi awk asi hrim bak lo;

Vawleipi hngalh le khuaruah har tiang in Rallokap sualnak mangtara vialte cu khumzual awk asi hrim lo tiah Mi dinfel rual nih an ti ve bak ko. Kawlte paoh hi ma ṭhalo an si lo. Kawlte hi kan huat hna awk asi lo tiah Kei le NLD fans rual nih kan I phisin ve nain an kan zumh lai cu ka hngalh ve ti lo. NLD kong le Kan Pi Suu kong ah thih a ngamh mi kan nih vialte nih kan leh ve mi hna cu: Rohingya cihmih nak kong ah; Cozah luban rual le, Tamada le Amay Suu nih Rallokap cu fakpi in sual phawt hna sehlaw: a sual mi Rallokap bawizik rual cu dantat hna seh: 2018 kum thawk ka ah Rallokap Uknak an kan chut diam cang lai tiah kahcham le Ṭang phaw ah kan hmang.

Sihmanhsehlaw, 2018 ah khan Uknak rak lak sehlaw, Paucan Dohthlennak tluk in mipi kan harsa lo khawh men. Tu lio nakin fak deuh nak lam cu aum lem lo. Mipi sandah kan piah lai; Meithal in an kan kah lai; Mipi nih Hriam kan tlaih ve zong ah, sifak Retheih zawn zai nak kha tuan deuh in kan intuar ve lai; 2021 cu tuan tein kan phak ve lai I tutan hrawng cu Rallokap cu kan thluk khawh diam cang hnga. Tu nakin thil ṭha deuh hmanh kan hmuh khawh mi asi kho. Achan cu Kan Pi Suu limhang a zawr lai lo I, Vawleipi ah pakhat nak ah aatel khawh zungzal ve lai.

Culio ah Vawleipi ah Covid19 rai a tlung rih lo. Ukraine ral zong aa thawk rihlo. Vawleipi nih Rallokap thluk awk ah tutan nakin fakpi in an kan bawmh khawh mi asi lehlam. Kan van nih a kawi ahcun Ukraine an bawmh mi hriamnam vialte zong bawmh khawh kan si rih dakaw. VAWLEIPI nih lungchung ah chiah mi Kawlram Dohthlennak asi ve lai caah mikip au aw cu a thang tuk ve lai. Kawlram Paucan Dohthlennak cu Vawlei pi ah limhang ngeih bik le Hmaisuan bik mi asi ve lai.

Hmape le hmarun cawi piak in palh nak kha Nika pho piak asi lo. Hi kan palhnak cu fim nak ah hmang in, hmailei Dohthlennak lamthluan ah a ṭha bik mi hmuitinh le saduhthah kan ngeih ve nak hnga langh ter duh mi asi deuh. NUG zong nih Vawleipi nih thli le kaa in bawmh mi nak in; Kutke in bawmhchan mi kha si kan duh ahcun: NLD chan ah a tla cikcek mi limhang kha cawi thlir a herh ve bak ko. Cucu Rohingya kong kau ah Vawleipi nih cohlan mi Mumal le Policy cu NUG nih a ngeih hrim hrim a herh tinak asi ko. Rohingya kong kha usa pek le papek in biatak tein NUG nih a phisin a herh hrinhran ko.

Tu Bantukin Credit le power I cuh mi NUCC, ICNCC, NUG, PDF, CDF, LDF tbk cu kansi awk asi lo nain. Laar le Popular I cuh asi lo. Uknak le pennak, bawican I cuh le I zuam cawh asi lo. Rohingya bangin namneh mi vialte le Tlangcung miphun Luatnak: Ralhrang Anaasin phung cu a hram in cawih ding asi ti hi Vawleipi nih an hngalh cikcek nak hnga, I zuam rih a herh. Ramchung le Ramdang um Kawlram mi lawng hnatlak pi nak le bawmhnak lawng in Paucan Dohthlennak pi cu TEI awk a ṭha lo.

Vawleipi nih an kan bawmh nak lai hi nakin fak pi in I zuam rih a herh. Abik in American kan holh ter khawh Abiapi ngai. Vawleipi nih bawmhchan awk ahcun: Mipi zong nih thildik kha kan ṭanh I kan phuang ngam a herh fawn. Aho mithmai zoh a herh ve fawn lo. Thildik le dinfel nak caah Raldoh mi kan si kha Vawleipi nih an hngalh a herh. Cucaah Thildik hi Keimah lawng ka phuang ter ti hlah uh.

Thildik le Dinfelnak ruang ah a thih ngam tu Miphun cu zeitik hmanh ah: an thih bal ti lai lo tiah; Vawleipi mifim pakhat asi ve mi; Sir. Rabin Dra Natdago nih a ti. Kawlram mi cu thildik le Dinfelnak kha Hnuchit Bantukin kan rak si bal ko men lai nain, tu ni thawk in thildik le Dinfelnak a ṭanh tu kan si zungzal a herh cang. Dinfel lonak vialte cohlan lo in adoh tu kan si nak lai, Paucan Dohthlennak hruaitu vialte siseh, mipi siseh, kan I zuam a herh.

Dinfelnak le thildik kha kanmah pumpak le innchung rian ah chiah in dinfel lonak le thil dik lo vialte kha a hram in phoih in cihmih ding ah a doh mi Paucan Dohthlennak ralkapbu le mipi kan si a herh ngai cang. A tla cikcek mi kan limhang cuaithlir ṭhan I zuam usih. Cutin kan tuah khawh ahcun: Kan Pi Suu cu Rohingya le Tlangcung mi kong ah atla cikcek mi a limhang kha kan cawithlirh khawh lai tiah, thawng kan thanh hna. Limhang ngeih tak tak in Paucan Dohthlennak ah TEITU si I zuam usih. ZTC