Pastor Peter – Khamhnak Atlau Kholo Tihi Zum Ko, Lungawtom Ding A Um Lo

Home

Khamh a tlau kho a titu pawl hna an I chirhchanhmi Bible Cacaang pawl: Matt 24:10-.Cu caan ahcun mi tampi nih an ZUMHNAK kha an hlawt lai i pakhat le pakhat an I rawi lai i,pakhat le pakhat an I hua lai. (1Timo 4:1) Hmai lei ahcun mi a cheu nih ZUMHNAK kha an hlawt lai i,lih a chim.i thlarau tu kha an bia an ngaih hna lai I khuachia cawnpiaknak kha an zulh lai tiah Thlarau nih fiangtein a chim. Hi Bible cacang nan rel ahhin maw hnabei dong le lung awtawm in um sual lai u ci!

Fianternak: Zumhnak in khamhnak cu hmuh a si taktak ko. Cun zumhnak lo in khamhnak hmuh khawh a si lo cu a hman taktak ve fawn. Asinain hi Bible ca cang hmun hnih i a chim mi ” zumhnak ” hi “a chan”( Dispensation/ Period ) kha theih a herh. A tik le can thleidang loin lam khat ( One Way ) te lawngin an ruah caah mi lai Rev.Dr.pipi zong nih an i fiang lo i khamh a tlau kho tiah an tinak a si.

Tartlung sampar tiang ruahdomh in Pathian rian a tuanmi mi hmasa kanpa le pawl( tlei cia he tlei rih lo he) ruahning le chiming bang khamhnak hi hei tlau kho sehlaw Jesuh nih zungzal ca i a kan serpiakmi Thisen Biakam nak cu pawkpalong ah pei a can lai cu. Kan i fian khawh deuhnak hnga a chan in zoh hnik hna u sih.

1.Vel Ngeihnak Chan Lio Zumhnak: A tu chan hi Vel ngeihnak chan a si.Cu hmanh ahcun a parpahlek te ah kan um cang.Vel ngeihnak chan ahcun ZUMHNAK ruang ah Pathian nih a vel thawng in luatnak or khamhnak tling a kan pek.Cu khamhnak tling pek kan si hmelchunnak cu Thiang Thlarau a kan pek hi a si ( Efesa1:14).Cu khamhnak cu Jesuh nih a thisen in zungzal biakamnak caah a tuah cang i zeitik hmanh ah a tlau kho ti lo.

Hi hi nupi thihnak puai chung ah meiinn zinan rawn cia he a lutmi ngaknu fim pa nga in a kan hmuhsak.Meiinn nih kan pum a hmuh sak i, zinan nih Thiang Thlarau a hmuhsak.Nupi thitnak puai nihhin tuufa ( Jesuh) nupi thit rawl dangh puai a hmuhsak. Mithiang pawl lawr tikah Thiang Thlarau a ngei mi lawng lak an si lai tuufa nupi thitnak puai chung ah an lut lai.Vel ngeihnak chan I Zumhnak in hmuhmi khamhnak cu a tlau khawh lonak a si.

2.Harsatnak Nganpi Chan Lio Zumhnak: Mithiang pawl lawr an si hnu ah kum sarih harsatnak ( Seven years of Great Tribulation) chung ah luh a si lai i ei le din kong ah harsatnak nganpi a tlung lai.Cu chinchap ah Khrih ral ( Antichrist) nih “Pathian maw na ZUMH lai? No 666 maw nai thim lai? tiah an hal te hna lai. Hi harsatnak hi vawlei hram thawkin nihin ni tiangah a ummi harnak a zeihmanh nakin a let tampi in a fak deuhmi harnak a si( Matt24:21) caah cu can lio i mi tampi nih Pathian an ZUMHNAK kha an hlawt te lai.

Hi lio can I khamhnak tlamtling hmuhnak caah hmelchunnak Thiang Thlarau hmuhnak ding ahhin cun anmah thisen le nunnak in an cawk a hau te lai nak kong kha, nungak hrut pa nga pawl nih nupi thitnak puai chung i luh khawh nak ding caah zinan cawk a herhnak nih khan hman thlak in a langhter.Thil cawk ahcun amah pek a hau cu,si lo maw?

Cu lio can i a ZUMHNAK ai tlaih i a thisen le a nunnak bak in Thiang Thlarau hmuhnak ding caah man a pemi hna cu Khamh an si lai. Asinain thisen le nunnak in man pek a ngamh lomi hna tu cu an ZUMHNAK kha an hlawt lai. Hi harsatnak chan lio ah an ZUMHNAK hi an thisen nunnak bak in a zulhdawi a hau. Jesuh nih” A nunnak humhak a duhmi nihcun a nunnak kha a sung lai” tiah a ti duhmi cu,

A THLARAU NUNNAK KHAMH A DUHMI NIH CUN A TAKSA NUNNAK KHA A SUNG LAI a ti duhnak a si. Thisen le nunnak thap a ngamh lomi pawl cu No.666 kha an caal le an orh lei kut ah khenh an si lai.Cu hna pawl cu Hellmei tili ah thlak an si te lai.ZUMHNAK an hlawt ruang ah an khamhnak an sungh si loin amah pek an ngamh lo ca tu ah khamhnak an hmuh lo bia tu khi a si ko. Khamhnak a hmu lomi hna nih khamhnak an ngei lo nak lak ah cun zeibantuk khamhnak cu dah an va sungh i an va thlau hnga? Sungh ding cu pei an ngei fom lo cu!An zei khamhnak cu dah a va tlau hnga?

Biafunnak: Hi Bible cacang pahnih hi khamh tlaunak kong a si hrim lo.ZUMHNAK an hlawt hnu ah khamhnak an sungh si loin ZUMHNAK an hlawt hlan hrim ah khamhnak kha an rak hmuh bia a si ko. Thlarau leiin mit maw chinchap, Taksa tar mit dum I benh chinchap cang ahcun kan lo ko.