Paletwa Ralhrang Sakhan Chuahtak Mi Kongah LUNG AHRING tuk Cang

Home

Paletwa Peng, Tan-taung khua sakhan ralhraang nih an chuah tak ca ah khuami a himnnak ah i thial ding in CDF Dai nih cathanh chuah. Chin Ramkulh, Paletwa Peng chung ah kahdohnak a fah ca ah Tan-taung khua hrambunh SAC hna nih an sakhan cu an chuah tak in an i thup ca ah pawngkam um khuami hna a him nakding ah i thialkam ding in CDF-Dai nih August 26 zaan ah cathanh an chuah.

Cathanh an chuah mi chung ah, “Tan-taung khua pawng um ralhrang Byohar sakhan cu SAC hna nih an chuah tak i an thup. Hi bantuk in an I thup ca ah kan hmuhnak poh ah I kah kho kan si. I kahnak hi a chuak khomi a si ca ah pawngkam khua nih a him nakding ah nan kan thialkam, nan kan zaampiaknak lai ralrinnak le thawngthanhnak kan in pek hna,” tiah aa tel.

Hi kong he pehtlai in Paletwa khua mi pakhat nih, “An sakhan ah minung an um ti lo. Zeitik caan ah an chuah tak ti cu kan thei ve lo. A thli tein an chuak i, hmun khat ka ah an I thup men lai ti kan zumh. Cu a si lo hmanh ah pakhat khat an I timh mi a si lai ti kan zumh. An chuah tak hi zaan ah a si theu lai ti zumhnak kan ngei,” tiah CCN ah a chim.

Atu hi Paletwa Peng chung ah SAC ralhrang le Rakhine ralkap AA hna karlak ah kahdohnak a fak. Hi bantuk in kahdohnak a fah ca ah Tan-taung ralhrang hna hi eidin lei an chambau cang ca ah an chuahtak mi a si lai tiah micheukhat nih an zumh. CCN