Nunnak Pekin Ralhriam Chutin Teinak A hmuh mi Hi Vietnam le Chin Ralkap Pasalṭha Hna Lawng Vawlei Tuanbia Ah Aum Rih

Nunnak Pekin Ralhriam Chutin Teinak A hmuh mi Hi Vietnam le Chin Ralkap Pasalṭha Hna Lawng Vawlei Tuanbia Ah Aum Rih. Vietnam ral lioah Vietnam cu hriamnam an ngeih lo caah Nunnak tampi pekin USA Sakhan an lak I hriamnam anngei khawh ti asi. Timit Ritkuang tlang le Chuncung ah Chin Ralkap Pasalṭha rual nih Nunnak pek in Kawlte Ralkap Uirual Hriamnam an lak mi cu Vietnam bak kan si ve ko. Dollar le Drone a bau caah??? USA he hriamnam aa thlau tuk ko nain kut lawngin USA sakhan lak awkah an kal. Tampi an thih hnu ah USA Sakhan cu an lak I Vietnam cu Meithal an ngeih ve. USA nih vanlawng a ṭhabik in an kah hna nain Chin bangin thingram le tiram nih a khamh hna. A hnu bik ah USA cu an tei. Hriam tling nei MAH kan tei lailo ti hlah.

Vietnam ral lio ah meithal cawkpiak tu cu USA le Ramthumnak ah an um rih lo. 1948 Zalonnak an hmuh in Arab ram 15 nih Israel cihmih awk ah an I timh lio ah Israel ral tei piaktu cu American Jews ansi. CBCUSA, CC, bantukin Zionist phu cu USD thawh ah kuri tu ansi. Zionist luzik cu Stephen asi. American Jew nih duhning in an thawh lo caah Kum 18 lawng asi rihmi Judah Lengdawh Mr. Golder Meir cu USA ah aa thawh. Tubak ah USD 25 million ka herh. Ral kan sungh ahcun Vawleipi ah Judah mi kan tlau dih lai. Ram ngeih lo kan si lai. Saal sinak maw Dollar thawh dah nan duh I thimh uh a ti hna. Ni 2 ah USD 25 million a tling. Kannih Chin mi cu CC nih Kum 2 leng 27 million kan aupi nain a tling khawh rih lo. Kan Pasalṭha hna nih nunnak pekin Ral sakhan an lak mi nan ruahah na Bukbau um na dollar he na siarem ko maw Chin Unau hna?

Drone in Kawlte Ralkap kan tei tuk hna timi kan hngalh dih ko nain Drone le Vanral vennak ah tlangau mi Vaurawng nih an hlawhtlin I Kawlte ralkap kan tei cikcek nak lai nan Bukbau um Dollar he Chinland le Chin miphun hi nan kan khamh lai lo maw? Chin Pasalṭha hna nunnak zeizat kan pek ah dah na Bukbau Dollar na chuah ve lai Unau hna. Hriamnam duh ah nunnak le thisen tiang kan pe, na Bukbau na hun rih lailo maw? Hakha le Falam Karlak ah Drone in kan ral kan nawn dih hna ti cu Vawleipi hngalh asi nain Chinmi kan dollar kan sian rih lai lo maw? Drone kan herh tuk caah Vaurawng le CC ah Dollar tampi he kan ram le miphun nunnak tampi hi nan kan khumzual lai lo maw? Drone in Kan ralkap an him ti cu hngalh cio mi, Drone in MAH kan tei cikcek khawh dakaw??

American pi ral an sung ballo. Vietnam le Afghanistan lawngah Ral an sung rih. Ral a sung bal rih lomi hi Chinmi lawng kan um ve rih. Kanmah tein khuakhan Lairel le uknak kha Mirang nih an cohlan caah Chin Ral a dai. Ral kan sung caah asilo. Karen nih Kawlram kan timi vialte an lak dih. Rangoon lawng a tang. Innsein tiang khi Karen nih an lak dih. U Nu Te cu Rangoon Cozah an ti hna. Chin Rifles 1 & 2 nih Karen cu kan tei I a tu an umnak Thailand ramri tiang kan dawi hna. Chin Miphun thawng in tuchan kawlram an umnak hi asi. Karen uknak in Chin nih kan luat ter. Kannih bel Saal sirih lai!

Khuaci Mui In Kan Ngaichiat Bak Ko. Kan Lungdong Cikcek Ko. Nain Dirh Awk Kan Ṭha Lo. Ngawl Awk A Ṭha lo. Mipun Le Ram Caah Kal Awk Ah Fial Mi Kan Si. Vawlei Tuanbia ah aum ballo mi, hi hnu zong ah aum ti lai lo mi tuksapur Ṭio nak nih khuaci mui lak in an kan tuah cang Kannih Thantlang Fanau rual cu: Vawlei fimthiamnak nih an ti khawh lo mi le an bang khawh lomi, Chun Mui a tlung cang ko lo mei ka ti ko. Hrut law law ning law a ṭha deuh hnga, kaa lungsak khawh dueh lai, Thantlang kong ruah loin ka um khawh hnga ka ti tawn. Ka hnachet sehlaw, a ṭha deuh mi, Thantlang thawngpang theih kan ngamh ti lo mihring sinak nih ka ti. Mit caw law law sehlaw, Ka Retheih zawnzai nak le nganfak nak hi ka hmuh khawh lai lo i, Pathian khuakhan nak tiah kaa lungsak khawh dueh hnga ka ti can zong aum Unau hna. Kan Khualipi vutcam ah aa cang dih, Dawttu le Dawtmi vialte Khuapi ah an um khawh ti lo, panh nak hngalh loin, kan hmai lei ah kan kal thluahmah I Riaklang va kan hluan ko. Lungrawn khua le Runrep lo Ruun Inn tlun can nikhua rel in, Pipu le nupa tampi nih liamh tak dih ngawt kan si. Lungrawn khua khirh can ah Cazin kan bau ruang mang cang lai maw ka thin hi. Lungdo hma he nithla kan rel hna. Rawl ei chung pil khawh lo le ṭuanzuam lo hi kan nunnak asi cang rua. Zion ngai in kan ṭap I innhliam kung ah Ṭinṭang kan bah I Maw Thantlang khualipi kan in philh sual ahcun kan lei hi kan dang ah I benhseh kan ti hi Babilon Sal tan Isreal mi nak in kan zual deuh saumau ko. Sal tan loin le sal silo buin salsi kan in hua. Sal hna nak in a niam deuh mi nun kha kan hluan cang. Salnun kan cawng ti awk in. Vanrang tawi thang Thantlang fanau ve lo bang le maw ka thin hi aw. Ka tuar khawh ve hrim lo ee nanmah cio bang. Bawmhtu le Chanchuahtu van hai in nithla kan rel. Bawmhtu dang an um tilo.

Thantlang Deirel Arfi ceu kan fanau hna dah ti lo cun, Chanchuah tu thlah piak kan si ti lo ai. Kan ZION Khualipi caah nunnak le thisen pek cia kan fanau zat zat kha, Liamcia ram dawtu le phuntung tu hna chumtual ah rauthla an leng cang lai mu. Kan mifim, Khua nupa lawng silo, tuukhal tiang zalam tlang ah nawng piak mi kansi. Kan Pathian Inn vialte an ciam dih cang Darsoser thiam pa kut in. CHINRAM CHURCH Farther semchuak nak TBC tal hi Bawipa nih a khumzual lai tiah zumh fek nak ka ngeih ko dakaw, TBC a ciamh cu ka zumh nak a tlau ve cang. Pathian Salpa tuukhal le CHIN Mifim tampi chuahsiamtu TBC le TABC si caah. Pathian Biak Inn a nehsawh tu le a hrawk tu cu anmah zong hrawk cikcek an si tawn kha Baibal ah kan hmuh. Pathian Biakinn ah zu din sa ei in a duh poah in aum mi Babilon le Midean SPH hna cu caw bang tak lawng in ram lak ah an vak I hram an ei. Ahnu bik ah an pen nak chut asi, an hngawng tan si ve.

Maw Bawipi nangmah nih kan phu kan hlam ko cang. Bawipa rung ṭum cang. Na fanau le kan temtuar tuk ngamsam cang. Kan celh hrim tilo. Bawipa tho law, ral kan doh piak . Ral kan tei piak law. CDF kutke le thazang kha Nangmah kutke le thazang ah siter cang law, TEINAK kan pe cang maw BAWIPA. Alamkip in a tlamtlin lomi CDF si ko hman sihlaw, na ṭhawnnak le na thazang in SAMSON le DAVID na thuam hna bang CDF cu kan thuam cang ko sawh BAWIPA.  Kan lungdong tiah hnu khirh awk le lam tanṭim ah dirh awk kan ṭha tilo. TEINAK kan hmuh hlan tiang, kan kal a herh. BAWIPA nangmah nih kan kalpi law, ral kan doh pi law, Ral kan tei piak cang ko sawh. Izip le Babilon kan I bochan in bawmhnak le ral TEINAK an ra tilo. Nangmah thawng in le CHIN MI thawng in RAL TEINAK LIANNGAN nan kan pek duh caah asi BAWIPA. Kan kal tak hlah, kan um pi ko, Kan sin ah riak ve ko BAWIPA, na caah hmun aum. Na caah kan thinlung vialte kan in pe dih MAW BAWIPA. Maranatha BAWIPA rung ṭum cang ko. Kan intuar afak tuk I intuar nawlh a har tuk cang. TEINAK CU BAWIPA ASI. BAWIPA TA asi. SRK

India Manipur Ramkulh Ah Meitei Le Chinmi Karlak Buainak Ruang Ah Moreh Khuapi Le A Dang Khuapi Hna Ah Meithal Thawng He Kangh-uhnak A Chuak, India ram, Manipur ramkulh Meitei le Chinmi Kuki, Paite (Zomi) kar, nihin May 3 ah buainak chuak in Moreh le a dang khuapi hna ah kangh-uhnak chuak in pengkomh 5 ah zan chuak lo ding in nawl an chuah. Manipur Acozah nih Chinmi Kuki le Paite (Zomi) hna an umnak ram hna cu pawngkam zohkhenhnak hmunram ah chia in le cuhkalh ruang ah atu bantukin duhlonak langhter in buainak a chuah hi a si. Cu phungphai ruang ah Chinmi hna umnak hmunram hna cu hrawhralpiak ding tiang dirhmun an phan. Cucaah May 3, zinglei ah Kuki, Paite le Naga hna cu lamcung ah chuak in duhlonak langhter in Meitei le Paite hna an umnak Imphal pengkomh Kangvai khuachung ah kangh-uhnak chuahter in ngakchia pakhat zong a nunnak a liam phah. Myanmar ramri Moreh khuapi zong ah Kuki nih duhlonak langhter in Moreh dawr cheukhat zong an khangh i meithal thawng zong theih a si. Cu kong he pehtlai in Manipur pengkomh 5 ah zan chuah lo ding in nawl an chuah hnu ah ni 5 chung Internet line phih ding zong in nawl an chuah chih. Cu phungphai he pehtlai in Mizoram ramkulh zatlang phu le siangngakchia hna zong nih Manipur Acozah nih tlangcungmi cung i a thiltuahmi kong ah duhlonak an langhter.

Ohphu Peng Ah Rallam A Sialmi SAC Ralkap Bomb Puahhnawhnak Ah Ralkap 3 An Thi; Bago ramṭhen, Ohphu peng Towertaing khua um SAC ralkap sakhan ah a kalmi ralkap cu bomb in kan puahhnawh hna pin ah 40mm in kan kah hna caah ralkap 3 an thi, tiah Tharyarwaddy pengkomh PDF in ṭuanvo ngeitu pakhat nih a chim. May 2 zanlei suimilam 3:40 hrawng ah Towertaing khua um sakhan ah rallam a sialmi SAC ralkap 80 hrawng cu, Chaungsauk khuahlun le Kaingchugyi khua in hmun 2 ah an i ṭhen i, Kaingchugyi lei ah a kalmi SAC ralkap cu Tharyarwaddy PDF Battalion 3802, Company 4 Ohphu Guerrilla nih bomb lung 7 in an puahhnawh hna leng ah 40mm lung 5 in an kah chap hna caah ralkap 3 an thi i, hliamhma pumi an tam, tiah theih a si. Chaungsauk khuahlun in a kalmi SAC ralkap cu PDF nih hriamngan le hriamhme in an kah ve hna caah kaphnih kar kahdohnak a fak ngai. SAC ralkap hna cu hmai an nor khawh ti lo caah bawmtu ralkap 15 hrawng an phan. PDF nih hnu an kirtak hna i anmah lei in a thimi le hliam tuar an um lo, tiah theih a si. “Inn 60 hrawng a umnak Towertaing khua cu SAC ralkap nih an khangh caah khuami zong an um ngam ti lo. An sakhan zong laak ṭhan an i timh khawh caah kahdohnak a zual kho,” tiah Tharyarwaddy pengkomh PDF in ṭuanvo ngeitu pakhat nih a chim.

Bawlakhe Khua Um SAC Ralkap He Aa Pehtlaimi Zung 4 Cu PDF Nih An Kah Caah Ralkap 7 An Thi, Meithal Zun 2 An Laakpiak Hna Karenni ramkulh, Bawlakhe khua um SAC ralkap hlun zung, Lah Wah Kah zung, Myoma palik sakhan le muicawl thawngthanhnak zung cu PDF nih May 1 ah kan va kah caah ralkap 7 an thi, tiah Bawlakhe PDF in ṭuanvo ngeitu pakhat nih a chim.May 1 zinglei suimilam 4:50 ah Bawlakhe khuachung ah suimilam 2 chung kahdohnak a chuak. Ralkap zung zong PDF nih an khangh pin ah Lah Wah Kah zung zong an laak khawh. Battalion 430 in SAC ralkap cu an hawile bawmh ding in an kal caah zing suimilam 7:00 ah PDF cu hnu an tolh, tiah theih a si. SAC ralkap a thimi hna ruak le hliamtuarmi hna cu May 2 ah Helicopter in a laak hna. PDF nih G4 zun 1, AK 22 zun 1, G4 kuanbawm 6, AK kuanbawm 3, kutcheh bomb le meithal khua tlawmpal zong an laakpiak hna, tiah theih a si. “A thimi hna ruak cu kahdohnak a daih in an laak hna nain hliamtuarmi hna tu cu May 2 ah Phasaung khua um SAC ralkap nih Helicopter in an rak laak hna,” tiah Bawlakhe PDF in ṭuanvo ngeitu nih cun a chim. Cu kahdohnak ah Bawlakhe PDF No. 1105 Battalion le Phasaung PDF No. 1108 Battalion hna i bawm in an kah hna i, Bawlakhe PDF No. 1105 Battalion in ralkap 2 nih an nunnak an pek i, ralkap 1 hliamhma fak ngai a pu ve, tiah theih a si. TCP