NUG Cozah Prime Minister Mahn Win nih PDF camp ah A Len Hna
NUG Cozah Prime Minister Mahn Win Khaing Than nih raal ram PDF camp pakhat ah kal in PDF ralkap pawl a va ton hna- NUG Cozah Prime Minister Mahn Win Khaing Than cu raal ram PDF camp pakhat ah a kal i PDF ralkap pawl a va ton hna, thazaang a va pek hna tiah NUG Cozah thawngzamhnak PVTV media nih a thanh.
“Dai tein fimnak a cawng ding mino hna nih ram nih aan herh hna lio ah raal ram ah kal in dothlennak ah nan i tel mi hi kan upat hna i nan cung ah ka lawm… CDM a tuah mi hna zong nih atu caan tiang an kan dirpiak ca ah upat tlak taktak an si,” tiah Prime Minister nih PDF ralkap pawl sin ah a chim.
Dohthlennak teinak hmu ding in Tlangcungmi hna he lungkhat tein kan dohti lai ti zong Prime Minister nih a chim.
Raal ram ah a um mi PDF ralkap hna he PDF thantaar upat peknak, Vawlei cung pawngkam zohkhenhnak ni thingkung cinnak zong a tuahpi hna tiah theih a si. #TheHakhaPost
Thih ding tiah nawl chuahmi le thongthlak ding a simi 209 an um tiah ISP nih a thanh- Myanmar ram ah hramhram in uknak lak a simi a dohtu le thongtlak ding in nawl chuah a simi 1,200 leng chungah a fak bik dantatnak a simi thihnak le nunchung thongtla ding in nawl chuah a simi 209 an um tiah Institute for Strategy and Policy (ISP-Myanmar) nih June 6 ah a thanh.
Minung 209 chungah Yangon ramṭhen in minung 202 an si i adang hi cu Irrawaddy ramṭhen in an si tiah cathanh chungah a telh. Cu chungah Yangon ramṭhen, chaklei Okkalapa peng ah thihnak dantat a simi 52 le nunchung thongthlak ding in nawl chuah a simi 12 an um caah Myanmar ram pumpi ah a tambik a si tiah cathanh chungah an telh chih.
A pahnihnak a tambik hi Hlaingtaya peng in an si i thihnak dantat a simi 17, nunchung thongtla ding 30 le thihnak he nunchung thongtlak ding he dantat a simi 3 an um tiah a chim. A fak bik dantatnak pek a simi 209 chungah tlaih a tong i thihnak le nunchung thongtlaknak dantat a simi 6, thihnak dantat a simi le tlaihding in nawl chuah a simi 117, tlaih hnu ah nunchung thongthlak a simi 86 an i tel tiah a langhter. Thihnak datat a simi chung in kum 18 tling lo pa 2 zong an i tel tiah a langhter.
Thihnak dantat a simi chung in 88 siahngakchia hlun U Kyaw Min Yu @ U Jimmy, NLD hluttaw palai hlun U Phyo Ze Ya Thaw, U Hla Myo Aung le U Aung Thu Ya Zaw hna cu hriawh in thahding tiah an fehtermi cu UN telh in American le France ram hna nih an cohlan lonak kong an langhter. The Chinland Post