Nu Zong Khrihfabu ah Pastor Atuan Ve Awk Asi

Home

Kum zabu 1 nak hrawng ah Jews miphun thinlung chung ah Nu cu sal menmen, hlawhhlang ding menmen ah ruah an si. Cu caah Jewish pa pawl nih Pathian sinah thla an cam tikah “Bawipa, Gentile mi, Sal/ Nu ka rak si lo caah na cungah kaa lawm tuk” Many Jewish men prayed each morning, “God, I thank you that I am not a Gentile, slave, or a woman.” tiah zing chiar thla an cam. Nu cu fa hringtu men lawngah an thahnem timi lungput Jewish nih an rak ngeih lio caan ah Paul nih historical background/context zoh buin Nu le Pa kong a tial hi asi. Cucu Timothy sin cakuat ah tampi hmuh khawh asi.

Kum Zabu pakhat 1st Century lio minung lungput kha nihin 21st Century ah kanmah Jesuh Khrih a zumtu hna nih hin kalpi peng atha lai maw ti hi ruah a cu. Tuchan ah nu cu fahringtu men lawngah kan ruah peng rih ko hna si ahcun Nu cu hruaitu NGO, Organization, khrihfabu Department tbk hruaitu ah thim lo ding an si ko hnga. Khrihfabu cheukhat ah nu cu bu chung activities vialte (thawngthachim, chair person tlaih etc) an tuahter dih ko hna nain nu bible sianginn kaimi pastor riankhinh, pastor timi title pek cu a duh in an duh lo.

Laitlang khrifabu cheukhat ahcun Nu cu cawnpiaktu/pastor tbk rian khinh cu a duh in an duh lo, bible nih a onh hna lo ti bak asi. Cubantuk khrihfabu ah Nubu department ti lengmang mi khi an um a herh lo, Church School cawnpiaktu dingah Nu zong an um awk a herh hnga lo. Asi kun ah cubantuk khrihfabu ahcun Nubu hruaitu an um maw? Nubu department an um maw? Nubu nih biakinn ah Chair person an tlai bal maw? An um sual ahcun an khrihfabu thithruaining cu ningcang tlailo, bochantlaklo an si hnga.

Khrihfabu cheukhat ah nu cu bu chung activities vialte (thawngthachim, chair person tlaih etc) an tuahter dih hoi ko hna nain nu bible sianginn kaimi pastor riankhinh, pastor timi title pek cu a duh in an duh lo. Cubantuk bu cu Nonnok khrihfabu timi cu an si. Zeicatiah bible ah an duhmi lawng kha an zulh i, an duhlomi poh an hlonh men.

Khrihfabu hruaitu le pastor zong si ve ko nain, nu hrimhrim nih Pa hi an kan cawnpiak awk asi lo, kanmah nakin an san deuh awk asi lo timi ruahnak a ngeih ahcun anupi cu zaangfak taktak khi asi hnga. Zeitintiah alungput ah pei anupi cu fahringtu menmen, sal bantuk menmen lawngah a hmuh tinak asi hnga cu. Jewish pa pawl bantuk le an thlacam mibantuk a si ko hnga. Cubantuk khrihfabu ah a ummi nupawl zong zaangfak tuk an si.

Pathian nih Amah riantuantu dingah a duhmi le athimmi hna cu Nu asi ah, Pa asi pekah an tuan awk asi ko. Cu cu minung nih Pathian ariantuantu ding minung kongah Pathian cu ri khiah piak khawhmi zeihmanh kan ngei lo. Pathian nih atha atimi kha atha bik ko. Bible biakam hlun le biakkam thar chung zohtikah Prophets le Pathian riantuantu Nu an rak um ko. Cu cu el awk tha asi lo.

Amahbelte mibu hruaitu dingah cun nu nakin pa cu an khohcho deuh, an raltha deuh, an lungpuam deuh, a thazaang thawng deuh I huham angei deuh mi an si. Chungkhar ah nu le va ipehtlaihnak lungput le khrihfabu, organization ithithruai ning lungput khi aa lo lo. 1st Century lio Nu an zoh ning tein nihin tiang na lungput asi ahcun, kan nupi le hna khi pumhnak an kalah an hmai khuhter dih ding an si. Cucu Paul nih a chimmi cu asi. ceuuk ceuuk