Naupoi Thlano Thei Mi Nih Abiapi Tukmi Ralrin Ding le Hrial Ding

Home

THLANO THEIH TIKAH HRIAL DINGMI

🔴 Mi tampi nih an chim ka theih tawnmi cu «Thlano na theih ahcun na kaa chuakmi paoh eipiak khawh i zuam, i sum hlah, na paw chung naute nih a hlammi si.» ti hi a si. Hihi a dik ngaimi a lo nain i ralrin a herh ngaimi a si. Kan kaa i a chuakmi kha a ngandammi tirawl, tahchunnak ah thingthei, anhringso le sa te hna an si ahcun a va ṭha tuk ko. Nain a cheukhat cu meihol ei hna in an thlano, lungmot ei hna in an thlano, kuak hna in an thlano i zuu hna in an thlano. Cucaah ka kaa chuak aipat tiah zeipoah kan kaa chung i kan luhter lo ding hi a biapi tuk.

Nule hna i kan kaa chung a lutmi paoh naute chung ah an lut dih ve i, ngandamnak ca i a ṭhami kan ei sile kanmah caah a ṭha i, naute ca zongah a ṭha ve. Ngandamnak hrawktu kan din ei sile kan caah a ṭha lo i, naute ca zongah a ṭha lo. Cucaah thlano kan theih caan i kan kaa a chuakmi paoh khi naute nih a hlammi si tiah kan i zumh lo ding hi a biapi tuk. Naute nih cun a zei kuak le meihol hna cu a va hlam pek lai lo cuh. Cucu nuhrin thluak hmanh khin hei tuak khawh ngaimi a si ko.

Naupawi lio ah kuak zuk te hna hi sibawi te nih hrial uh an ti zungzalmi a si. Kanmah nih zuk cu chim loin kuak a zumi pawng hmanh ah na um lai lo ti a si. Kuak ruang ah paw chung naute aa rawk kho, pum tlamtling loin an chuak kho (tch: cleft lips), an chuah hnu ah ruah lopi thihnak (SIDS) an tong kho, thlatling lo le cuai tling lo zongin an chuak kho fawn i cu nih cun an upat hnu ah ṭhatlonak tampi a chuahpi khawh.

Zuu ruang zongah siseh a lamkip in ṭhatlonak naute caah a chuak kho. Atu i ka rian ṭuannak zong ah hin kan zohkhenhmi nu pakhat cu a nu nih a rak pawi lio ah a nu cu zuu a rak ding tuk i thla tling lo tukin a chuak le a kum rup in a thluak a ṭhang kho lo. Kum 17 a tling cang nain kum 6 minung thluak hrawng khi a keng.

🔵 Cucaah kanmah ruahdomh in thil tuah loin le kanmah bantuk sawhsawh a si vemi nih ruahnak an kan pekmi kha i lak colh loin, eidin kong ah kan lung aa awṭawmmi a um sicun sibawi te fuhpanh hmasa hna usihlaw ruahnak hal hmasa hna usih. Ralrin hi sii ṭha bik a si. Foro fambawl