Nancy Pelosi cu Taiwan Kal Aa Tim, US Nawlngeitu An thinphang

Home

US House Speaker Nancy Pelosi cu Taiwan ah a kal lai tiah thawngtheih asi. Amah Pelosi zong nih ka kal lai nain keimah pumpak security a him sual lai lo caah a ni le caan belte cu ka chim lai lo arak ti. Pelosi cu Taiwan ah  kal aa tim ti asi ruangah US Secretary of State hlun Mike Pompo nih keimah he hmunkhat te ah kan kal ti lai tiah nizan ah sawmnak a tuah.

Tuzing ah AP thawngzamh nih thil sining hitihin alanghter, Pelosi Taiwan ah kal aa tim hi a caah tihnung asi, zeitintiah aa citmi vanlawng hi China nih a kah piak khawh mi asi tiin US officials nih a chimmi cu a langhter. US official nih Pelosi caah security a him lo, China hi tihnung an si tiah achim mi nih Pelosi hi Taiwan kal athulh te hnga dek maw…

Atu hi China nih Taiwan cu a detkhawt ngaingai lio caan asi tikah Biden nih Taiwan kal hi a caan asi rih lo ati. Nain Pelosi nih kal chih aa tim. Vawleicung mifim le ram sining dothlatu hna nih cun, Taiwan hi China nih a tuk hrimhrim te ko lai an ti. China nih hin duhsah tein South China Sea leiin a naih chin thluahmah. Achel ahcun China raltuknak vanlawng nih Taiwan airline red-zone alonh can a tlawm ti lo. Pelosi nih a chimmi cu, Taiwan nih US lei ibet i US he riantuanti aduh le duhlo cu amah nawl asi ko tiah a ti.