Nai Hakha Ralhrang Meeting ah Ngun San Aung nih Riantuantu Hna Cungah Aa Lawmhnak Bia Achim

Home

Nai te ah Hakha ah ralhrang nih meeting an auh. Mah meeting ahcun Pu Ngun San Aung nih riantuantu pastors le khua upa hruaitu lutlai hna sinah aa lawmhnak bia a chim ti asi. NSA nih a chimmi cu, Nihin tiang biaknak lei pastors le khua upa hruaitu hna he hmunkhat te ah rian kan tuanti hna hi lunglomh awk ngaingai asi tiah a chim ti asi.

 

Ralhrang nih hin mipi sinah bia an chim kho ti lo, nawl an pe kho ti hna lo. Cu caah mipi sin ah bia an chim khawhnak dingah lam pakhat tha bik a um chun cu Pastors te he riantuan ti asi an ti. Cu caah Hakha ah pastors he riantuan tinak an ngei, cu ahcun khuachung upa hruaitu an itel chih. Pastors le khua upa hna he riantuan tinak an ngei ko nain, Nihin tiangah ralhrang nih cun tuah an duhmi kha an tuah ko.

Mah an tuahmi kongah pastors le khua upa nih chim khawhmi relkhawhmi an ngei lai ti hi hmuh khawh cia dih asi. Thantlang khuapi thinphang thlalau  in an um le angki hnipuan hmanh i ken loin an tlikzaamnak zong kha Thantlang khua upa hruaitu santlaihlo le thawng diklo thanh ruangah asi tiah mi tampi nih an chim. Nihin tiangah cun Hakha khuapi cu a him rih, hi hi aruang zohtikah ralhrang le pastors le khua upa hmunkhat ah riantuan tinak ruangah asi taktak ko lai ti hi Pu Ngun San Aung biachim nih alanghter ko rua.

Cu cu nihin ralhrang nih an duh bikmi, mipi fahnak kan pe hna lo, biaknak lei, uknak lei upa he riantuan tinak tha tein kan ngei, fimcawnnak zong tha tein kan kalpi ko ti hi chim an duh bikmi cu asi. Atu hna chinchin cu Hakha sianginn ah ngakchia 2000-3000 hrawng an kai ti theih asi.

Chinram khualipi asimi Hakha ah zeihmanh buainak a um lo i, mipi nih harnak le fahnak an in lo i, fale fimcawnnak tha tein ralhrang nih a kalpi khawh i, Kah-wa-kah zung ah tha tein rian an tuan khawh peng i, Bank ah mipi kan ibut peng rih ko asi ahcun, ralhrang riantuannak cu pakhat hmanh dohtu an um lo caah Chinram khualipi bik ah cozah tha tein an kalpi kho ti hi 100% a fiang ko. Cu caah Pu Ngun San Aung nih pastors le khua upa hna sinah lunglawmhnak bia a chim hi achim ding hrimhrim asi ko.