Mizoram I Mitsur Dum le Mitsur Zu Tuahmi Cu An Lungrawk Ngaingai

Home

WINE CHUNGCHANGAH HIAN KAN TI LUTUK TA MAH MAH LO MAW?


1. THU HMA:- News lamah Mizoram Excise & Narcotics Dep’t Champhai grape chingtute thar chhuah, Wine-a an siam tak an man thu a lang chuai chuai a. Thuneitu sang zawk aṭanga thupek an hmuh avanga man niawm tak an ni.
Heng thuneitu sangte hi tute nge ni ang aw? A phenah hian politics, vote zawnna tur a inrawlh em? Nge sakhaw politics inrawlhin, Sakhaw mi ṭha em em, mahni unaute dinhmun leh kha leh chen an lo thawhrimna pawh ngaihtuah miah lova, an thar chhuah ngei pawh mantir hmak hmak tura thuneitu sangte nawr thiam riau an awm em ni? tihte hi mipui hriat chak a ni.

2. BIBLE-AH WINE (ZU) KHAP BURNA DAN CHI 2 CHAUH A AWM, MIZO MIPUITE MIN HUAM LO VE VE!!- Sawi fiah law law ang aw, Bible behchhan deuh roh si, a changa Bible thupek bawhchhe hreh leh miah si lo, a lang a mawia Kristian ram, Kristian ṭha tak ang a inchhal, chhungril lama pamham leh em em site kan inenfiah nan!
Bible a zu khap burna dan (Total prohibition) chi 2-te chu:

  • i) NAZARIT MI TAN: Pian tirh aṭanga Nazarit mi ni tura serh hran hrim hrim (eg, Samsona, Zawlnei Samuela) te ang tan khan wine (zu) reng reng khap tlat a ni a. Hei bakah hian, hun eng emaw chen chhung Nazarit mi ni tura “thu tiam” neite tan wine (zu) hi “khap bur” a ni. Amaherawh chu, hun eng emaw chhung chauh atana Nazarit thu tiam neite hian, an thu tiam hun chhung a ral hunah wine an in leh thiang vek a ni. (Num.6:2-3)
  • ii) PUITHIAM (KOHEN) TE’N INTHAWNA SERH LEH SANG AN KHAWIH DAWNIN:- Levia chu Puithiamte khan dan pangngaiah chuan wine (zu) an in thiang a, amaherawh chu inthawina serh leh sang an khawih tura Lalpa Biakbuk an luh dawnin, wine în hi ‘khapsak bur’ an ni thung. (Lev.10:9)

3. BIBLE A WINE (ZU) IN PHALNA TE:-Khingte bak khi Bible-ah Wine (Zu) khap burna dan a awm lova. Khita Wine a khapsak mi chi hnih, Nazarit mi (thu thiam vang or piantirh aṭanga Nazarit mi) leh, Puithiam (Kohen/Priest) ang khi Mizo leh Jentail ringtu hrim hrim zingah, tumah an awm tawh loh avangin, Bible ringtu Kristian sorkar kan nih chuan, Bible behchhana Wine (zu) hi khap bur theih a ni miah lo.

Chumai a la ni hleinem, Deuteronomy bung 14:22-26 ah phei chuan, malsawmtu Pathian hnena lawmthu sawina atan, Jerusalem Temple-ah mahni thar chhuah sawma pakhat va ken khawm a, Wine emaw, Zupui nen emaw hlim taka va ei tura thupek a chuang nghe nghe a ni. (Tute emaw chuan helai thu hi Bible aṭanga pawhthlak daih an duh ngei ang)

Khing bakah khian, Israel fate’n Pathian thu an awih phawt chuan, Pathianin mal a sawm ang a, an buh leh thlai thar chhuah bakah an Wine thar chhuahte chu nasa takin a tipung dawn a. Pathian pawi an sawi erawh chuan an thlai thar leh an wine thar chuahte chu an ei lo thung ang!! Tichuan, Israel mite tan Wine hi Pathian malsawmna a ni ang chiahin, an wine thar chhuah ang zel kha Pathian biak bukah, inthawina thil hlan rualin an va hlen leh zel tur a ni cheu bawk.

4. ISRAEL RAMAH CHAUH HMAN TUR A LAWM!!- Wine chungchanga inhnialnaah hian, ‘wine chu Israelte chaw (food item) chi khat a ni a, Mizorama hman ve theih a ni lo, Israel ramah chauh hman tur a lawm,” tiin an sawi fo ṭhin a. A dik lo ka ti miah lo. Chutih rualin, Sawma pakhat leh thawhlawm pek pawh hi, Bible zirtirna ang chuan, Israel ramah, chutah pawh TEMPLE ngeiah va pek tur a ni a, Israel ram pawn, Jentail ramah va hman tur a ni ve lo!! Mahse kan khawn chur chur miau si a nih hi.

Kan duh chin chinah hian Bible zirtirna hi kan pawm a, kan duh loh chin chin hi kan hnawl leh hmak si ṭhin a nih hi!!
Kan Kristian thurin, inkhaihhruiana leh pawl hrang hrang doctrine te hi, Bible aṭanga X-ray ngam tak tak kan awm ta lo va, mahni pawl kalphung hi dik ber leh ṭha ber, tling ber angah kan ngai a. Kan pawl roreltute thu chhuak chu “Pathian thu hliah hliah” angah kan ngai ta vek a nih hi.

5. MIZORAM (KRISTIAN MI ṬHA RAM) CHU NI SE!- Lal Isua khan Kana khuaa inneihnah Wine a tipung a, kha kha vawiina Mizorama thil thleng chu ni ta sela, Excise & Narcotic Dep’t te’n Lal Isua kha an man ang a, inneihnaa Wine in tute kha an um darh duh hial ang!! Thuneitu sang, Politician leh a phena nawrtu MKHC te’n thubuai an siamsak ang a. Lal Isua lawina kohhrante’n Lal Isua chu Wine a tihpun avangin an thunun ang a, rawngbawlna chelh thei lo turin an phuar ang!!

Mizoram rawngbawltu rualte chuan, a hnuaia mi ang hian Lal Isua chu an hêk zui bawk ang: Matthaia 11:19 (MGB) “Mihring Fapa a lo kal a, a eiin a in a, ‘En teh u, chaw heh mi, uain heh mi, chhiahkhawntute leh mi sualte thian saw!, an ti si a..” Nova zu ruih chungchang kan sawi lar hlur a. Nova zu rui lo dawng sawngtu, a fapate chungchang erawh tumahin an sawi duh lo. Nova zu rui dawng sawngtu, a fapate chanchin ka sawi chak viau nang a, Post a sei lutuk loh nan ka insum rih mai ang e. MSR