Mipi Ralkap Kutin Ralhrang Athimi An Tam Bak Hih

PDF Phufonh, ABSDF,  Le SAC Ralkap Kar Kahdohnak Ah SAC Ralkap 61 An Thi, Hriamnam Zeimawzat Mipi Ralkap Nih An Laak. All Burma Students Democratic Force (ABSDF) Column 3 le ṭangṭi PDF phufonh le SAC ralkap kar kahdohnak a chuak i cu kahdohnak ah cun SAC ralkap 61 an thi, hriamnam zeimawzat kan laak khawh tiah ABSDF Column-3 nih cathanh an chuah.

March 31, ah Gangaw peng Gan khua palik sakhan cu Gangaw pengkomh PDF, ABSDF le pahkahphah phufonh nih an kahdoh hna caah SAC ralkap 45 hrawng an thi, 10 nih hliamhma an tuar pin ah G 3 meithal 4, G 4 pakhat le kuanfang zeimawzat mipi ralkap nih an laak khawh tiah theih a si. April 3, ah Myitta tiva hrawn in rallam sialtu SAC ralkap 70 hrawng cu Gangaw pengkomh PDF, Local PDF le pahkahphah phufonh nih Gangaw peng Saidoe khua pawng ah an kahdoh hna caah SAC ralkap 5 an thi tiah theih a si.

Cu pin ah April 5, ah Pale peng Ziphyukone khua in Gantaungh(ကန်းထောင့်) palik sakhan kal aa timmi SAC ralkap le pyusawhti phu hna cu Gantaunghkhua pawng ah ABSDF le ṭangṭi phukomh nih an kahdoh hna caah SAC ralkap 4 an thi. April 7 ni zong ah Gangaw khahlahyiah 50 in a chuakmi SAC ralkap thazaang 100 hrawng le mipi ralkap kar Gangaw peng Lapu khua pawng ah kahdohnak a chuah ṭhan caah SAC ralkap 7 an thi tiah theih a si.

President Rak Si Rih Ning Law Russia-Ukraine Raal Hi Nikhat Ah A Dong Colh Lai. US President hlun, Donald Trump nih president rak tuan rih ning law atulio a buaimi Russia-Ukraine raal hi nikhat ah a dong colh lai, a dai colh lai, tiah a chim. GB timi thawngzamhnak he tonbiaruahnak an rak ngeih lio ah, US president hlun Donald Trump nih Russia-Ukraine kahdohnak le raal kong ah amah pumpak hmuhning cu a rak chim.

Russia President Vladimir Putin le Ukraine President Volodymyr Zelenskyy pumpak an i pehtlaihnak hmang in hi raal an i dohnak hi nikhat chung in ka donghter khawh lai, tiah Donald Trump nih a chim.  Donald Trump cu a ra laimi US President thimnak (2024) ah a dang Republican Party in aa zuam dingmi palai hna nakin mipi nih amah an zumh bik. Thimnak ah teinak ka hmu lai tiin naa ruat maw, tiah GB biahaltu nih a hal tikah, “Teinak hmu ding in ka lam a tluang ngai ko” tiah a leh.

Myaing Peng I Kahdohnak Ah SAC Ralkap 10 An Thi Magway ramṭhen, Myaing peng ah Faw leilawng in a kalmi SAC ralkap hna cu mipi hriamtlai phu nih an kahdoh hna caah SAC ralkap 10 an thi tiah dohthlennak tuahtu ralkap nih an chim. May 4, zinglei suimilam 9:45 hrawng ah Myaing in pyusawhti tampi an umnak Tayat khua a kalmi SAC ralkap hna cu an kir lei ah tualchung hriamtlai phu nih an kahdoh hna caah SAC ralkap 10 an thi tiah theih a si.

SAC ralkap hna cu battalion 17 ṭatkhuai 2 hriamtlai phufonh, Middle Revolution Task Force (MRTF), RPTF, JRT le tualchung hriamtlai phufonh nih an kahdoh hna. Kaphnih i kahdohnak ah tualchung hriamtlai phu lei hliamhma tuarnak um loin hnu an tolh kho tiah theih a si. TCP