Mindat Khuachung ah CDF le Ralhrang An I Kap, Ralhrang an Dirhmun Achia

Home

Mindat khuachung ah kahdohnak a chuak, SAC ralkap 5 an thi-   Chin ramkulh, Mindat khuachung, June 14 zinglei ah SAC ralkap le CDF-Mindat karlak ah khuachung kahdohnak a chuak i SAC ralkap 5 hrawng an thi tiah theih a si. SAC ralkap pawl hmunhma an khuarnak Mindat khua luhnak gate cu CDF-Mindat nih an kah, bawmh ding in a raami SAC ralkap pawl zong lah-wah-kah zung pawngah an kah hna i 3 an thi, 5 nih hliamhma an tuar tiah CDF-Mindat nih thawng a thanh.

Zinglei sml 9:30am ah SAC ralkap le CDF-Mindat karlak ah kahdohnak a chuak i SAC ralkap 2 an thi i 3 nak tlawm lo nih hliamhma an tuar tiah theih a si. Kahdohnak a chuah hnu ah, Mindat khuachung Infantry 274 le Kyaukhtoo lei in hriamngan voi 9 hrawng an kah i 2 cu Baunghtee khua pawngah a tlak caah a rawkmi um le um lo theih hlathlai lio a si tiah CDF-Mindat nih a thanh. The Chinland Post

Ann Khuapi Um SAC Ralkap Officer CDM A Tuah- Rakhine ramkulh, Ann( အမ်း) khuapi nitlaklei Military Headquarters, No. 946 Construction Division (Engineer) in a chuakmi SAC ralkap Officer pakhat cu mizapi he hmunkhat ah ṭangṭi in CDM a tuah tiah Loikaw – PDF nihin June 14 ah a langhter. Cu SAC ralkap Officer cu a luancia May thla ah PDF- Loikaw sin ah pehtlaih nak a tuah i CDM a tuah hnu, nihin ah mizapi sin theihter nak cathanh an chuah hi a si.

SAC ralkap officer hi Loikaw – PDF Battalion nih a herhmi eidin thilri zapi cu tuanvo kan lak lai caah ram thumnak kal a duh a si zong ah kan tawlrel piak ko lai tiah mizapi ralkap phu nih an langhter. SAC ralkap nih mipi cung ah phungning lo in tlaihkhih, hremnak, kahthah nak cu pehzulh in an tuah nak ah i tel duh ti lo in le an zoh kho ti lo caah a kenkip ah kal in nifatin titluk in CDM a tuahmi an um ko tiah an langhter.

Hramhram nawlngeihnak latu SAC ralkap dohnak caah hmual a ngei bik mi cu CDM tuah hi a si caah mipi cung ah harnak fak a petu SAC ralkap hi kaltak in CDM nan tuah nak lai kan in nawl hna tiah LoiKaw – PDF nih cathanh ah an langhter. Myanmar ramchung ah SAC ralkap nih nawlngeihnak an lak hnu kumkhat leng chung ah SAC ralkap kaltak in CDM a tuah tu Ralkap le palik 10000 leng an si cang tiah April thla chungah an tuahmi NUG cozah i kumkhat tlin nak cathanh chung ah an langhter.

2021 February 1 hramhram nawlngeihnak an lak thok in kumkhat leng chung ah SAC ralkap nih meiduah in an hrawh mi mipi inn 20000 hrawng a si cang tiah Data For Myanmar nih cathanh an chuah. TCP