Min Hram ah “Dr” Tial Tlak Asimi le Tial Tlak Lo
Doctor Degree Phun-3: Fimcawnnak he aa pehtlaimi doctor degree a sangbik mi phun 3 an um i cu hna cu Academic Doctorate, Professional Doctorate le Honorary Doctorate hna an si.
Academic Doctorate- Hihi a tawinak in Ph.D kan ti tawn mi kha a si. Ṭha tein cawn hnuah lak mi dikari a si. Hi dikari he aa pehtlai mi dikari phun 2 an um. Ph.D. in Medicine le Ph.D. (Management) hna an si. Hi dikari hi fawitein lak khawh mi a si lo. Doctor dikari lak ah a har bik mi a si tiah a cawng cang mi hna nih an chim. Ṭha tein cawn dih hnuah thesis ṭial, cu ṭial mi cu thiamsang hna nih an zohfel lai i bia an hal lai. Cu an hal mi vialte kha an duhning tein a leh khawh hna lawngah dikari cu an pek lai.
Professional Doctorate- Hi dikari he aa pehtlaimi dikari phunphun an um. Tahchunnak ah Doctor of Medicine, Doctor of Engineering, Doctor of Laws, Doctor of Business Administration, Doctor of Management tibantuk hna an si. Ph.D nakin thesis ṭial a fawi deuh ti a si.
Honorary Doctorate- Hi dikari cu sianginn kai i cawn mi a si lo. Rianṭuan mi cungah upatnak in pek mi dikari a si. Hi dikari cu rianhalnak ca (CV) i cawnnak (qualification) ah langhter phung a si lo. Auh nak zongah hman phung a si lo. Cu bantukin minṭialnak zongah hman phung a si lo. Dikari an pek lio, caan hman chung lawngah min hmai ah an hman chih i caan hmannak a dih cun an hmang ti lo. University, College, Baibal sianginn le khrihfabu nih pek awk a tlak tiah an ruahmi kha upatnak ah an pek mi dikari a si.
Note: Prof. Dr Myo Min Oo nih a ṭialmi kha a tawifiannak in ka lehmi a si. Biatenh: Chin/Laimi cheukhat nih upatnak in pekmi dikari le a laang in lak mi (Kawl nih sape-sazu an timi khi) dikari kha auhnak ah siseh, minṭialnak ah siseh an hman tawn mi khi ruah deuh cu a hau ko rua. TCP
Aliamcia kum 30 hrawng ahcun Laimi kan ule, kan pale chungin Rev.Dr. hi an rak tlawm taktak. Rev., timi hna khi upa lungfim sam par pah cang mi an si deuh hna. Cun, pastor kum caan saupi a tuan cangmi, khua mi le khua chingchan Area le tlang nih upatmi le minchiatnak a ngei lomi hna sinah upatnak in pekmi asi. Rev., an duh ko zongah aliamcia caan ah zeimaw minchiatnak tete a rak ngei cang mi hna caah Rev., hmuh cu a fawi lo.
Doctorate (Dr.) timi tu cu fimcawnnak thiamnak bakin hmuhmi degree asi I, Ph.D taktak hi cu barawhzat hmanh an rak um lo. Phaisa tampi adih, kum tampi cawn hau mi asi caah a har khun. Amahbel mi pakhat cu Pathian rian a rak tuannak kum caan a sauh ngai ahcun cubantuk ruang ah cun minthat upatnak ah Dr. hei lak khawh asi ve sawk.
Atu kan chan 2000-2010 karlak ah Laimi kan ule, kan pale tampi nih Rev.Dr. an kan lak piak. Cu lio hrawng ah a rak lar ngaimi pakhat cu, a min hram ah Rev. a um hnu ah Dr. aa chap mi hna cu Hakha Thantlang, Kalay kalnak Bus ticket tin a fawi tuk an rak ti tawn. 2010-2023 chungah Laimi Pathian riantuantu chungin Rev.Dr. timi an tam ngaingai. An tam ruangah ilawmh ding cu kan si, cuhlannak in kan thangcho deuh tinak asi. Kan thangcho ti lio ah cheukhat cu afawinak rumro in thiltuah riantuan mi an tam.
Tuchan ahcun Doctorate hna hi innchung in online in hei thai luklak hnu ah doctorate degree rak la cang ti asi ko. Cubantuk thiamthiam in khrihfabu, khuatlang, area nih pakhat hmanh theihpinak um hlenglo in Reverend (Rev.) zong lak asi ko. Hibantuk tete ruangah cheukhat an Rev. le Dr cu mipi nih sunlawihpiak le upat piak phu ah an ruat tuk hna lo. Fawituk in lak khawhmi Rev.Dr. hna cu lamkam ah a tamtuk cang ruangah Rev.Dr. tampi Laimi kan ule kan pale zong nih an itlaih I an min hram te ah an ichiah khawh venak asi theo lai ti zumh asi.
Hibantuk ruangah sersat le zeirello in kan um awk cu asi hnga lo. Zeitintiah mi pakhat nih atha tiah aruah I atuahmi kha upat piak ve ding asi. Zeihmanh tuanmi, cawnmi ngeilo piin Rev. le Dr. timi hi an ibunh ve lo. Kan ruah awk pakhat tu cu, sinak leng in minthat duh ruah men ah, lar duh ruah men ah Rev. le Dr. timi min hi Nengpi Ki phurh in kan phurh lo hi a biapi. ceuuk