Min Aung Hlaing nih Suu Kyi kong le Dirhmun Fiang Ko In Achim

Home

Daw Aung San Suu Gyi he pehtlai in biakhiahnak cu biaceihnak a dih tik lawngah chim khawh a si lai SAC hruaitu nih a chim. Hren lio a simi State Counselor Daw Aung San Suu Gyi he pehtlai in thlennawn awk a ummi biakhiahnak cu atu chim ding ah a tuan tuk rih i biaceihnak a dih tik, thilsinning a dih tik lawngah chim khawh a si lai tiah SAC hruaitu General Min Aung Hliang nih a chim.

Russia ram a phak lioah Russia thawngzamh RIA he biaruahnak an ngei i Daw Aung San Suu Gyi cu a inn thong in thong taktak ah an kuat hnuah zeibantuk thlennak dah nan tuah rih lai timi biahalnak cungah SAC hruaitu General Min Aung Hliang nih a lehmi hna a si. Thimnak a phichuak kha ṭha tein zoh ṭhan law tiah voi tampi kan chimh ko nain 2021 February ah ram buainak a chuahter tiah General Min Aung Hliang nih a chim.

“Buainak a chuah cang caah tette kan langhter a hau. Cu bantuk cu amah rian a si kha phung nih a langhter ko” tiah Russia thawngzamh sinah a leh. Cu lengah a thahmi hna minung 4 kong he pehtlai in Russia thawngzamh biahalnak a leh hna tikah, a hlan ah hi bantuk hi kan tuah bal lo nain anmah ruangah minung tamtuk an thi i minung tamtuk nih harnak an tuar caah an thahnak hna a si tiah a leh hna.

Cun thimnak tuah le tuah lo kong zong hi daihnak le sipuazi cungah aa hngatmi a si caah chim dingah a tuan tuk rih i thla 5 a tan rih ko caah a dirhmun zoh in biachahnak kan tuah te lai tiah a chim. Ramchung ah a cangmi hrawhnak, thahnak hna zong hi a luancia April thok in a zor deuh cang nain cheukhat peng hna ahcun a tang rih ko caah a daih chinnak hnga kan tawlrel lio tiah General Min Aung Hliang nih a chim. The Chinland Post