Mi Pakhat nih US $ 10,000 Thawk Ti Cu Atam Bak Hih

Rev.Dr.Sikhia nih tulio kan dohthlennak nih a herh taktak mi Drone cawknak dingah Dollar 10000 a hlut. Mah kongah Sui Kor nih hitihin a tial,- “Sui2 pa,na dam lo bu in na ttial mi ca uk man $ 10000/- na pekchanh mi,Bawipa nih kan miphun luat nak caah a lak a si ter lai lo,ram 3 nak um mi kan nun aa phuhrung i kan ning a zah tuk ttung,dam nak tling Bawipa nih in pe ko seh law” tiah a ti.

Falam-Hakha Lam Ah A Tlaumi 2 Cu Zarhkhat Leng A Rau Cang Nain An Hmu Rih Hna Lo. Chin ramkulh, Tedim khua Luaibual sang um Obed House ngakṭah sianginn ah rian a ṭuanmi Cin Hau Vung(kum 37) le Hakha sii-inn ah rian a ṭuanmi Lian Za Thawn(kum 32) cu a luancia May 2 ah Falam in Hakha lei ah motorcycle in an kal i, zanlei suimilam 6:00 in nihin May 12 tiang ah an pehtlai kho ti hna lo, tiah theih a si.

Pu Lian Za Thawn cu Hakha um a chungkhar hna he a donghnak an i pehtlaih lioah Chuncung khua an phanh deng tiang lawng theih a si. An chungkhar le chungkhat sahlawh rualchan hna nih an kawl len ko hna nain an thawngpang zeihmanh theih a si ti lo. An catlap le an hruk-aih thilri belte cu Thlanrawn khua thar pawng lam kam ah ṭhenṭhek dih cang in khualtlawngmi hna nih an char, tiah theih a si. Jerome Lian Za Thawn le Cin Hau Vung hna cu an chungkhar nih an dirhmun thei ti loin le an thawngpang zong an theih khawh ti hna lo caah thinphang ngai in an ca ah i bawmhchanh cio ding in nawlnak an tuah, tiah theih a si.

Suimilam 6 Chung Ah Mocha Cyclone Thlichia A Zual Kho! Bangladesh nichuah thlanglei in aa semmi Cyclone Mocha thlichia cu suimilam 6 chung ah thazaang a ṭhawng ngai mi Cyclone thlichia ah a cang kho i, May 14 ah Bangladesh ram Cox’s Bazar le Rakhine ramkulh, Kyaukphyu kar Sittwe khuapi pawng tiang a phan kho, tiah khuacaan tuaktantu hna nih nihin May 12 zinglei ah an thanh.

Mocha thlichia cu suimilam pakhat ah meng 60-70 tiang a kal kho, tiah zumh a si. India khuacaan tuaktantu zung nih, Mochia thlichia cu nihin May 12 zinglei in a thazaang a ṭhawng chin khomi a si i, meng khat ah 135 tiang a hrang kho, tiah an ruahdamh.Mochia thlichia cu Rakhine ramkulh, Chin ramkulh, Ayeyarwaddy ramṭhen, Magway ramṭhen le Sagaing ramṭhen tiang a phan lai, tiah khuacaan tuaktantu Win Naing nih a chim.