MDF/MATC cu Pu Htet Ni le Dr Sasa nih An Thei Hna Lo

Home

Vaurawng Zunnthli nih CDF-Mara Fundraising Committee hruaitu le CDF-Mara ralbawi interview an tuah hna. Abik in an halmi hna cu MDF kong a si. Kanram Dothlennak kongah Mara cu kan theih bantuk in phu hnih an ithen. Cu cu CDF Mara le MDF ti asi. Hi kongah anmah Mara chungah buainak men lo a um. Cu ruangah MDF nih CDF Mara cu meithal in an rak kah hna i CDF Mara pakhat a thih pinah midang 3 hliam an rak tuar. Nihin tiangah remnak a um kho lo. CDF Mara cu zeidah an si i, MDF cu zeibantuk dah an si  ve?

CDF Mara cu nihin ah kan Chinram dothlennak a tuahmi, CNA thithruainak tangah tha tein a ummi an si. Mah CDF Mara cu Dr.Sasa le CNA Spokesperson Pu Htet Ni nih an dirkamhmi phu a si. CDF Mara cu CJDC ah tha tein aa funtommi, miphun le ram ca taktak ah hriam aa tlaihmi an si. Tulio i CDF Mara General Secretary atuan cuahmah mi hi law adihmi asi i, aliamcia caan ah Dr Sasa rian arak bawmtu asi.

MDF cu dothlennak a tuahmi phu an si ve ko nain CNA thithruainak tangah a um lomi le theihpi lomi an si. MDF nih cun Min Aung Hlaing ralhrang he idoh aduh lomi le, cuhlan cozah rian atuanmi hna CDM tuahnak kongah aduhmi tuah ko ulaw, aduh lomi cu tuahlo ko u, nanmah nawl asi tiah a titu an si. Cu cu MDF ralkap lutlai bik nih a rak chim bal. MDF cu India Mizoram Mara he riantuantti a duhmi an si.

MDF cu Min Aung Hlaing doh hau lo, kan doh zongah kan tei kho fawn lai lo. Cu caah CDM tuah zong hau lo, CDM atuahmi zong nan duh cun kir dih than ko uh. CDM tuah ahcun zeidah kan ei lai, CDM nan tuahlo ruangah harnak nan ton ahcun kanmah kan um ko an ti. MDF cu khuachung ah a um deuhmi le India Mara base in a cawlcangmi an si. India Mara khuachung ah a um deuhmi an si caah online computer tonghtham a thiam deuhmi an si caah anmah nih thawng an thanhmi kan hmu deuh.

CDF Mara tu hi cu ramtang ah hriamtlai bakmi an si hna caah online zong atongtham thiammi an um lo caah an konglam theih ding a tlawm deuh. Nain thil sining kan theih tikah cun MDF si loin CDF Mara hi kan support a hau tiah kan ti i US ah committee kan thawk colh. US ummi Mara hi 90% hi CDF Mara kan si hna tiah Pu Bei Lua US nih a chim.

CDF Mara cu Thantlang peng lawng an si tiah an ti i, kan hlat tikah Thantlang peng lawng si loin Matupi, Petletwa lei tamtuk an rak um rih. Cu cu ka theih cangka in Global Mara kan dir colh hi asi. MDF kongah kan hnabei asei ko, zeitintiah tuan ah CDF Mara sinah an ra kir te ko lai. Aruang cu an policy adiklo ti an theih ko caah sau an rau lai lo, kanmah CDF sinah an rakir te ko lai tiah a chim chap.

Pu Beilua nih a Vaurawng Zuunthil le Chin mipi sinah nawlnak a tuahmi pakhat a um. Cu cu a biapi taktak. Atimi cu, Nan kan theih bantukin Mara CDF cu hriamnam le chawva leiin thazaang adermi kan si. Atu hi hriamnam kan herh ngai ngai. Aruang cu MDF nih kanmah Mara ramchung ah Camp 5 hrawng sak an timh. Mah Camp ahcun ralhrang zeimawzat an um te theo lai. Cu cu nihin ah thawngpang vupvap kan theih ning asi caah hriamnam kan herh ngai ngai. Chin mipi le Vaurawng Zunnthil nih kan philh hram hlah ulaw, kan dirkamh ko u tiah a ti.   vaurawng zuunthil