MAH ralbawi Pakhat Cu Ralram A Um Caan Asau Tuk Cang Ruangah Amah le Mah Aa That Lawlaw
Ralhmai Ah Kum 2 Chung A Ummi SAC Ralbawi Pakhat Cu A Chungkhar Ngaih Tuk Lungrawk In Amah Le Amah Ai That. Karen ramkulh Myawaddy peng chung ralhmai ah kum 2 chung a ummi SAC ralbawi pakhat cu a chungkhar a ngaih tuk hna i lungrawk in May 19 ah amah le amah meithal i ai kap i a thi Khit Thit Media nih a ṭial. Chungkhar ngaih tuk lungrawk in amah le amah ai that mi ralbawi (Corporal/တပ်ကြပ်) cu Rakhine miphun Lwin Chain (kum 53) a si. A nupi le fanu pahnih a kaltak hna.
Corporal Lwin Chain cu miṭha le midaidam ngai a si. A umnak ah a kuttang ralkap hna cu raldohnak ah an kal dih caah rian a ummi vialte amah nih a ṭuan dih. A re a thei ngaingai. Cunglei nih hrocer le rianfial a tong peng. A chungkhar sin a tlun lonak a sau cang. Hi thawng hi a lengah chuahter hrimhrim lo dingin cunglei nih nawl an pek hna tiah an kiangkap a ummi pakhat nih a chim.SAC ralkap hna cu an tlawm chin lengmang caah ralbawi si hna seh, ralkap sawhsawh si hna seh chungkhar si tlun le caankarlak i dinh zong an kham tiah theih a si.
Hakha Ah Pyusawthi Tam Ngai An Um Tiah Tualchung Mi Nih An Chim! Chin ramkulh, Hakha khuachung ah kawl lei in a rak tlung mi pyusawṭhi tam ngai an um, tiah tualchung mi nih The Chin Post ah an chim. Hi kong he pehtlai in Hakha ummi pakhat nih cun, “Hakha khuachung khuasa ve mi Kawl pa pakhat nih atu hi Hakha ah pyusawhṭhi tampi an phan, tiah a chim. si-kan an ngeih lo pin ah an ning a hngal taktak rih, lamkam ah kawlmi pyusawṭhi a si lai tiah zumh mi 6/7 hrawng an um tawn, zoh ah mit kem ngai an si i, khoika lei in a ra mi an si bel fiang in theih a si lo tiah ka sin ah a chim,” ti in The Chin Post ah a chim.
Hakha khuachung ah pyusawhṭi an phan timi kong he pehtlai in Hakha um ve ṭhiammi midang pakhat nih cun, “Hakha ah pyusawthi an tam caah cuhlan nakin kan biachim le kan ṭhutdir ningcang ah tampi i ralrin kan herh. Pyusawṭhi a si lai tiah zumhmi kawl mi 9/10 hrawng an umkal tawn. Hi kong hi midang sin zong in theih a si cang caah kan i ralrin a herh ko,” tiah The Chin Post ah a chim ve. Hi kong he pehtlai in The Chin Post nih Hakha ah pyusawthi an um le um lo kan fehter khawhmi cu a um rih lo.
Mocha Thlichia Ruang ah A Thimi Cazin Dik Tein A Thanh Lotu Poh Tazacuai An Si Lai – SAC. Mocha thlichia ruang ah inn rawkral le nunnak liam kong ah lih le hrokhrol in a thimi cazin a thanhtu poh tazacuai le dantat an si lai, tiah SAC nih tlerhkhawnnak cathanh a chuah i, thlichia ruang ah a thimi minung 400 leng an si cang timi zong thawng dik lo a si, tiah an thanh. Cathanh an chuah mi chung ah, “A thi mi hi an dihlak cu minung 145 an si. A thimi hi a tam deuh cu Rakhine ram in an si i a thimi chung ah Rohinjia ralzam camp chung in minung 91 an i tel,” tiah an langhter. Hi cathanh hi thlichia a hran ni 5 a rauh hnu ah SAC nih a voi khatnak cathanh an chuahmi a si.