Mah Kong Hi Na Rel Bal Maw…

Home

David Sailo ·-MIZO SPECIAL REPORT· PU LALNUNMAWIA KHA TU THAH NGE? RAMBUAI EPISODE – I, Tu thah nge tih aiin “Tu thahtir nge?” tih hian mitin lairil a fan ngei ang le. Engtik ni ah emaw chuan he zawhna hi chiang fek fawkin Zofate hian an la hre chêk ang!! MNF Vice President ni thei, ram buai hun thim chhah lai (1967, 1968,1969) chho vela ram mu ve tawh si, President ber nuamsaa hmun danga a awm bo daih kara MNF Vice President leh President aiawh nihna chelhtu Pu Lalnunmawia Tuboh leh Chem hmanga a hrawkhrui chhah a nihna ah hian tu in nge mawhphur ang le?

Zoram zalen fe tawh hnu ah, kan Sakhaw rawngbawltu, Pastor pakhat chu a Quarters ah zing ṭawngṭai inkhawm pawh kalna chang hre khawpa a finvar laiin tute Sorkar ah emaw chuan “Mahni leh mahni tuboh a in chhu, chemtea hrawk in zai” ah kan han chhuah maiah!! Thil in pha man, chhui zawn tur kan nei leh ta. Kum 1973 khan MNF khaipa, nuam leh ralmuang china khauphar thawven ve lo, Pu Lalnunmawia chu a nupui damdawiina awm, chaw pe tura kal chu zanah Tuboh leh chemte hmang bawka rawng taka thah a ni. A in ang a sin!!

Kum 1971 khan Pu Laldenga chuan “On behalf of Govt. Of Mizoram, to speak and Act” tih hmangin a DUM PAWL ti a an diriam em em MNF Underground lehkhathiam chin tel vek deuhthaw in mi 80 chuang a mankhawm tir a, awmze nei lovin a chhuah leh a, a chhuah zalente chu an nihna ngai a chelhtir chhunzawm a, chutah chuan Pu Lalnunmawia leh Pu R.Zamawia te chu India Sorkar be turin December 1971 ah khi lehkha inziak keng khian a tir ta a ni.

Rinawm takin an zu dawr a, mahse an rawn haw chuan an hotute (Pu Laldenga & Co..) an hmu zo tawh lova, an zin chanchin, an in dawrna te chu a tirtu hrilh tur an hmu zo lo!! Chhimtawp thlengin an thu hawn hrilh tur zawngin an zin phei a, mahse Pu Laldenga leh Pu Zoramthanga tih angreng chu khawiah nge an bik bo an hre thei tawh lo. Arakan ah VIP chin an thep bo mai mai nge Pakistan(Karachi) ah an thlawk lut daih tawh tih pawh hriat a ni ta lo. “On behalf of Govt. Of Mizoram” lehkha kengtute lo haw chu “KAH HLUM TUR” tih Order an hre zui!! An kalna kawng lo lama an kal hlauh avangin an him ta a ni. He Order hi a chhuahtu emaw, a kengtu emaw hi ṭhangthar ten an hriat ngeina turin tuna la dam, a hria te hian an hriat chin zep hauh lova an puan a ṭul!! Chil chhak tur dik hre turin kan la chhui chip chiar dawn si a!!

India be tura tirhte hi 1972 ah an lo haw a, a hnu kum 1973 ah Pu Lalnunmawia chu rawng taka thah a lo ni ta a ni. Sawi belh dawn chuan sawi tur a tam a, Episode a ni dawn bawka thupui ah lut dawn teh ang. Pu Lalnunmawia rawng taka thah a nihna ah kha kum 2023 thlenga lalna leh thuneihna neih phahna tura thlir thiama hma la an awm angem? Hmanraw changkang zelah FBI meuh pawhin Crime Serious tak tak, tun hnua a chhânna an hriat tak a awm ṭeuh ang hian Pu Lalnunmawia hi a ruang phawrh hial ngai turin ṭhangthar tuihal mek te hian a Victim kan hre châk angem? Pu Lalnunmawia thah avang hian MNF in an hlawkpuina tur leh an chhiatpuina chhan tur a hunlai milin kan ngaihtuah thiam em?

Pu R.Zamawia dahṭha ve lova Pu Lalnunmawia rawng taka dahṭhat a ni hian chhan lian tak a nei angem? An pahnih hian an Delhi dawr haw kha kahhlumna tur Order a awm niin sawi a ni bawk si.
Pu Laldenga kha ṭawngkam thiam tak a ni a, IN MANKHAWM chungchangah pawh an chhuah leh hnu ah “A mantu zak bawk a manate zak bawk” tiin thiam takin an rilru a hneh a ni maithei, a mi leh sa lehkhathiam (Intellectual Circle) tel lo chuan a ngaih a ngam chiah si lova, a dah pawimawh viau chuan a ni aiin an thluak a ṭha tih a hre bawk si a, ṭawngkam thiamna in midang a hneh hmasaa a thlir thiamte chu a thuhnuai ta niiin a lang.

Hetiang deuh chiah hian MNF tun hun hi niin a lang thei a, an Gamaliela ke bula seilian kan CM mek chuan an chhuan tawlawl, thlir thiam, mi chak zinga sawi Dr.R.Lalthangliana leh East Pakistan a ralthuam laa bul lo ṭan zak zak tawh, Pu R.Tlanghmingthanga chu a chhuah chhe khawp mai!! Seilenna nena inanna hi a lo awm zel a lo ni.

Aiawh tur thu ah chuan “Zorama ho a Mizoram in han hruai tur chu ka ngaihtuah mange” lo titu, a pu ngei angin a aiawha, a mize chhawm, a pu ang chiahin a nihna el phak tur dahṭha in “Pu Thlengpaliana, Pu Vanlalzawma ho a Mizoram in han hruai tur chuh!!” ti a amah thlaktu tur chher hauh lova, a tiatpui ni a hriat dah tet kawnga a pu chhûn fahran hian a pu thupui hmang hian a hmawr min bawkpui ve leh mahna… Episode dang ti zel ang