Lainu Helping Hands hi An Men Hrimhrim Lo

Banhla Bu 22, Futluan 164, Hmaiphek pung 4, Aithing Bag 3 Kan chanh mi hna cu,an sin tlamtling tein a phan cang. A lamkip in bawmtu hna pakhat cio nan cungah kan i lawm tuk. Lainu-helping hands Fund Kawlnak.

SAC Ralkap Nih Nyaungpinthar Khuami 17 Cu A Bu In An Khangh Hna! Bago ramṭhen, Htantapin peng Nyaungpinthar khuami ngakchia 7 telh in tualchung mi 17 cu SAC ralkap nih mei in an khangh hna, tiah PDF in ralkap pakhat nih a chim. May 10 zinglei suimilam 10:00 in zanlei suimilam 5:00 tiang Nyaungpinthar khua pawng ah SAC ralkap le KNU, PDF kar kahdohnak a chuak i SAC ralkap 20 an thi, ralbawi pakhat telh in ralkap 3 an tlaih hna.

SAC ralkap lei a thimi an tam caah ngakchia 7 telh in tualchung mi 17 cu mei in an khangh hna, tiah theih a si. “May 10 zing suimilam 10:00 in zanlei suimilam 5:00 tiang kahdohnak voi 5 a chuak i SAC ralkap 20 nak tlawm lo an thi, 10 hliamhma an tuar. A thimi an tam caah tualchung mi 17 cu a bu in mei in an khangh hna,” tiah PDF in ralkap pakhat nih a chim.

Nihin May 11 zan suimilam 7:00 in Hakha ah fak ngai in ruah a sur. Khuadawm cu a tam lo nain a sur ning hi a fah ngai caah Mocha Cyclone thlichia le ruah hruaitu a si kho, tiah tualchung mi cheukhat nih an zumh. Nihin zing suimilam 10:00 hrawng ah Yangon peng cheukhat zong ah ruah fak ngai in a sur, tiah Yangon ummi hna nih an chim. Myanmar ramchung le Mizoram lei ah May 13 in Mocha cyclone a hrang kho tiin khuacaan tuaktantu hna nih thawng an thanh i, cozah le zatlangbu hruaitu hna zong nih mipi sin ralrinpeknak an thanh cio hna.

KNU Hmunram in Thla 4 Chung Kahdohnak Ah SAC Ralkap 1,600 Leng An Thi. KNU ramchung, Kawthulay hmunram in thla 4 chung ah kahdohnak voi 1,642 a chuak i, SAC ralkap 1,736 leng an thi, tiah KNU nih nihin May 11 ah cathanh an chuah. Thla 4 chung kahdohnak ah SAC ralkap 1,188 hliam an tuar i KNLA le KNDO lei in ralkap 59 nih ram le miphun ca ah an nunnak an pek. Minung 196 hliamhma an pu i PDF zong tam ngai hliamhma an pu ve, tiah KNU nih an langhter.

KNU hmunram kahdohnak ah SAC ralkap nih nuhrin covo an buar ruangah Karen ramchung um minung sing 4 leng cu ralhrial in an zam, tiah theih a si. Ralhrial mi an tam ruangah 2023 January thawk in KNU nih Karen ramchung ummi minung 85,000 ca ah thla fatin eidin facang an bawmh hna, tiah theih a si. Ralhrial mi hna eidin tirawl an chambau pinah umnak inn le lo, ngandamnak le sii-ai an zong an chambau. Kawthulay hmunram kahdohnak ruangah ralhrial in a zammi tualchung mi hna bawmchantu poh cu lunglawm tein kan in kan cohlan ko hna, tiah KNU nih an langhter.