Khrihfa Biakinn Aciam Dih Cikcek

KNU Brigade 6 Thla Khat Chung Kahdohnak Ah SAC Ralkap 107 An Thi, Tlangcung Hriamtlai 10 Nunnak Liam. KNU Brigade 6 hmunram Dupalayar pengkomh ah April thla chung kahdohnak voi 29 a chuak i SAC ralkap 107 an thi. Khah Lah Yah 207 Battalion 8 in Battalion Comamnder le Major rank ngei 2 le Captain 1 telh in 85 nih hliam an tuar, tiah Dupalayar pengkomh nih cathanh an chuah. Cu kahdohnak ah SAC ralkap 3 an tlaih hna i KNLA, KNDO le ṭangṭi phu lei in ralkap 10 nih an nunnak an pek ve pinah ralkap 19 hliamhma an pu. Drone pakhat zong SAC ralkap nih an kah thlakpiak hna, tiah theih a si.

April thla chungah SAC ralkap nih vanlawng in voi 31 bomb an thlak i, hriamngan in voi 184 an kah caah cacawnnak sianginn 3, phungki sianginn 1, Khrihfa Biakinn 2, sii khan 2 le tualchung mi inn 387 an rawk i, inn 12 a ciam, tiah theih a si. Vanlawng le hriamngan in SAC ralkap nih an kah ruangah tualchung mi 23,021 ral an hrial. Sah Kah Khah in Battalion Commander Myo Set Aung kuttang, Brigadier Aung Myo Htun kuttang le Khah Lah Yah 32 Battalion Commander Ye Htet Zaw nih an hruaimi phu nih tualchung mi 2 an thah hna leng ah 1 zong an tlaih, tiah Dupalayar nih cun an langhter. Cu pinah hriamngan kahnak in inn zuat saṭil Caw 34, Vok 21, Meheh 20 le a dang saṭil tampi an thi. Tualchung mi inn 12 telh in dum le hau tampi a kang, tiah an cathanh ah cun an langhter.

Nabuaing-Myingyan Lam SAC Leilawng Bomb Puahhnawhnak Ah Ralkap 4 An Thi. Mandalay ramṭhen, Nabuaing-Myingyan lam ah SAC ralkap an i citmi ke 6 ngei leilawng cu bomb in kan puahhnawh caah ralkap 4 an thi, tiah Shwe Chanthar Guerrilla phu in ṭuanvo ngeitu La Kwin Eng nih a chim. May 7 zing suimilam 8:00 hrawngah Nabuaing in Myingyan lei a kalmi leilawng pakhat chungah SAC ralkap 25 hrawng an i cit i, bomb in puahhnawh an ton caah ralkap 4 an thi, tam ngai hliamhma an pu, tiah theih a si. “Bomb in kan puahhnawh hna hnuah an kan kah ve ko nain kanmah lei a thimi le aa hliammi kan um lo. Kan tei hlan lo kan doh peng hna lai,” tiah ṭuanvo ngeitu nih cun a chim.

Madaya Peng Ah Tilawng Aa Cit Mi SAC Ralkap An Tilawng Ai Leh Caah 6 An Thi. Nihin, May 7 deilei suimilam 2:00 hrawng ah SAC ralkap 7 cu Mandalay ramṭhen, Madaya peng Mwayponkan (မြွေပုံကန်) khua ni chuahlei Nyaung tiva an tan lio ah an i citmi tilawng aa leh caah SAC ralkap 6 an thi tiah Wetlet Information Network in ṭuanvo ngeitu pakhat nih a chim. Cu SAC ralkap hna cu a luancia May 4 lio ah Kyattoyway(ကြက်တူရွေး) khua a khangtu an si i, khuachung an khangh hnu ah Teinn khua ah kal in phu hnih ah aa ṭhen mi SAC ralkap an si tiah tualchung mi nih an chim. SAC ralkap hna cu May 6 ah Singu peng Kyattoyway(ကြက်တူရွေး) khua in Madaya peng ah kee in rallam an sial i, May 7 deilei ah a thli in an kir lei ah an i citmi tilawng i lehnak in SAC ralkap 6 an thi tiah theih a si. ” A thi mi SAC ralkap hi zeibantuk rank an si cu theih an si rih lo, an i putmi hriamthil zong ti chung ah a pil chih dih tiah kan theih, SAC ralkap 7 chung ah 6 an thi” tiah Wetlet Information Network in ṭuanvo ngeitu pakhat nih cun a chim. TCP