Khamhnak Kong Lungawtom In Na Um Ahcun Hihi Rel Hrimhrim

Home

Zeiruangahdah A Cheu Khamh An I Fian Lo. Johan 8:32 = Biatak nan hngalh lai i biatak nih cun an luatter hna lai.
Khamh co le khamh fian hi zei i na rel lo le na dai thlanh ahcun na zumhnak thaten nai chek a hau. Rawl chuan ding facang kan ngei maw ti le phaisa ken ngei ti maw ti chek hmanh kan i rep dom ahcun khamh co le khamh fian chinchin cu biapi tuk in kan ruah ding asi. Mi cheu nih mah kong zei i kan rel lo cu Satan nih kan lungthin mit a cawtter caah asi tawn,2Kor 4:3,4. Zeiruangahdah mi cheu khamh an i fian lo tinak kong he pehtlai in nihin ka tial chan
cu khamh a co rih lomi hna caah asi lo.

Khamh a co cangmi hna chung in ai fiang lomi hna caah asi. Johan chan lio te khan, khamh a co ko na in ai fiang lomi an rak um. Mah lio chan ahcun Knostic cawnpiak nak nih zumtu tam tuk a buai hna. Vanlei fimnak nan ngeih lo ahcun a ngah lo an ti hna. Lamkaltu hna cawnpiaknak ah ai tel lomi bia te hna an uarpi hna. Atulio dirhmun i tahchunh ah cun kanmah pawl hrinthan ka i, ” Hmangaih ram a lut lomi cu thlarau lei ah an niam tuk ti le holhtheih lo a ngei lomi cu Thiang Thlarau an co lo,” ti i mi cawnpiak ban tuk asi. Hmangaih ram kong cu a dai cang nain holhtheih lo a ngei lomi cu an hrinthan loh, khamh an si loh ti cawnpiaknak cu atutiang a dai lo. Cucaah nihin ah khamh a co ko na i khamh ai fiang lomi hna an i fian lonak a ruang ka van langhter ta lai. Thlacam buten rak ka relpiak u ti kan nawl hna.
An I Fian Lonak A Ruang Pali-

  • 1. Thiang Thlarau tehtekhannak an i fiang lo,Rom 8: 16.
  • 2. An hrinthan kum le thla le ni le caan an hngal fiang lo.
  • 3. Ur-er, asi lo ah, pup-pep le zuai-zei an or. Phundang i chim ahcun thinlung cawl- cangh an hngak ( Feeling/ emotion an or).
  • 4. Baibal biatak cungah an i thum lo.

Paul bia:” Pathian Thlarau le kan thlarau cu hmun khat ah an i fon i Pathian fa kan sinak kha tehte an khan,” Rom 8:16. Kan hrinthan paoh ahcun Thiang Thlarau kan chungah a nung. Hiti zong in ti khawh asi, ” Jesuh Khrih thawng tha kan theih i Jesuh Khrih kan zumh le caangka Pathian nih Thiang Thlarau a kan pek i Amah ta kan si tinak ah caa a kan khenh.” Efisa 1:13,14 hi thaten rel hmanh. Thlarau kan co tikah kan chung ah aw in ‘ Pathian fa na si,’ a kan ti lo. Kan co bal lomi lawmhnak le daihnak kan ngei. Mah tikah Baibal rel duhnak, hlasak duhnak, pumh duhnak, Khrih kong ceih duhnak thlacam duhnak le tehtekhan duhnak kan van ngei. Hihi Thiang Thlarau
tehte khannak ah an i tel.

Cun, chungkhat le hawikom siaherhnak hna kan ngei. Hi zong hi Thlarau kan ngeih caah asi. Cupin ah midang nih pianthar a soisel tik hna ah khin kan ngaih a chia. Cun a piangtharmi hna sin thut le bia ruah kha kan duh cang.
Hirinthami pawl, kan nun van i dap hmanh usih. Acung lei ka tialmi hi nan tem cio ko lai. Cucaah hi thil hna na nunnih a tem ve ahcun, khamh ka si ko mu hi ti law Bawipa thangthat ko cang. Mi a cheu an i fian lo cu Thlarau tehte khannak kan cawnpiak hna lo ruang ah a rak si. A dang pathum zong hi peh khawh ka van i zuam lai. Bawipa nih a tha a tining paoh in thluachuah kan pekpiak than ko seh.