Kawlram 2023 Thimnak ah NLD Hruaitu Chungin Thutnak Aa Cuh Ding Tam Ngai Dawh An si

Home

2023 Election In Legitimacy Fir Aa Timh Mi MAH le NgunSanAung- Pu Ngun San Aung nih thimhnak tuah aa timh an ti caah siaherhnak he ka thlah mi asi. Ralhrang Rallokap cu Cozah na si ko tiah phung ning tein Cohlantu an ngei bak lo. Rallokap chung ah MAH cohlan loin CDM tuah mi tampi an um. Tuluk le Russia, India, Thailand, ASEAN, EU, France, Germany, Australia, Japan, Singapore tbk hna cu an ram Sipuazi caah MAH he rian an ṭuan mi tu asi. Cozah asi ko tiah an pom hrim lo.

ASEAN ah Legitimacy aa zuam nain ASEAN biachahnak (5) na hlawhtlin ter lo ahcun: ASEAN palai le Kanpi Suu na tawn ter lo ahcun: Kanpi Suu he bia I ruah uh; Cuhnu ah EAOs le aa tel ding mi vialte he Remdaihnak tuah uh: ti tu aa huah ko. Amah MAH ruangah harsatnak phunzakip le sifah Retheihnak phunkip a tuarmi, mipi cu ASEAN he Humanitarian in ka bawmh hna lai I Cozah tling ah ka cohlan hna seh, ti kha a duh ko nain: American le a Hawikom ram hna nih, Kanpi Suu he I tawn uh law, Democracy ah kir ṭhan uh, Nuhrin covo aum bak ding le Rule of law um ding bak in ram hruai cang uh, ti tu aa huah ve ai.

Tlangcungmi hruaitu hna le EAOs cu nan duh mi vialte kan pek dih hna I kan tuah piak dih hna lai, Peace tuah usih. Federal Democracy zong kan pek hna lai; 2008 phunghrampi zong nan duh ahcun kan remh piak hna lai, a thar zong in kan ṭial lai, tiah a lemsoi hna nain, EAOs hnarcheu lawng a ti khawh hna. NUG le PDF / LDF cu ralhrang an si caah anmah he tawn khawh asi lo, bia ka ruah khawh hna lo, PEACE tuah ṭi khawh zong asi lailo, Ralhrang ansi caah a ti nain: Tu cu a aw an a thlen cang. PDF / LDF cu upadi tang ah rak lut uhlaw, meithal chiah uh, nan duhmi federal ram cu kan ser hna lai, nain 2023 thimhnak tuah hnu ah asi lai tiah a ti cang hna.

Mipi an lungdong sehlaw, ka cohlan hna seh tiah fak pi in an kan hrem, an kan tlaih, an kan thah, thong an kan thlak, tazacuai kan si, Thihdan an kan pek, kan nung buin meiduah kan si, kan khua mei an duah dih, khua mei duah lo mi Rawlruk mei an duh piak hna, nel thuam khawh hna hlah seh tiah caw le na mei an duah chih, Nel thuannak sehthilri vialte mei an duah dih, tbk in Ahmual fak bik mi vialte he tuksapur in an kan hrem ko.

ASEAN Humanitarian bawmhnak cu an kan pek duh lo, pek zong an kan sian ti lo. Thih lo nung loin ka chiah hna lai, an lungdong cikcek sehlaw, ka cohlan hna seh timi MAH Planning asi. Mipi kan lung adong hlei lo. Ralhrang kan thluk hlan lo, kan nunnak le thisen pek in kan doh cang lai an ti lehlam, Kan chan nih a tep lo zong ah a poi lo. Kan techin fapar caah, Ralhrang cu an cihmih cang ding tiah thazang tu a tlung chin. Hnukhirh le ngolh kan I timh ti lo caah MAH le Rallokap cu a sivang tuk cang ko.

Hriamnam in seh ka namh hna a ti ṭhan, Tlangcung mi cihmih nak caah Hriamnam American Dollar 3100 man a cawk cang. Cucun Kawlrawn mi zong ka kah ve hna lai, an thih dih hlan tal ahcun an cohlan ko lai tiah aa ruah ṭhan. American Raltuknak Vanlawng rual a kahthlak khawh mi MiG-29 Jet Fighter lawng tein 31 cu Russia ah acawk, 20 cawk ṭhan aa timh. Raltuknak Vanlawng 280: Tanks 664: Tipil Tilawng 155: he mipi thah dih awk an kan timh tu MAH asi. An kan tei lo ahcun Nuclear le Chemical Weapon hman awk ah Russia sin ah Satellite hman nak nawl a hal lio hna.

Nain, Tlangcungmi le Kan ralkapbu (EAOs), PDF LDF tu kan him deuh, Rallokap tu an thih tam deuh. Rallokap hi 500000 an si an ti tawn nain, 100000 lawng hi Raldoh khawh mi an si. 20000 deng cu mipi nih kan thah cang hna. Cucaah a lungdong tuk ah 2023 ah Thimhnak tuah in Legitimacy zong si, MAH le Rallokap pennak zong chansau ter timi planning tu ah a kal cang.

Amah MAH pumpak in chimh loin, ASEAN Palai Prak Sakkhon le Tuluk Wanyi cu a chimh ter hna. Kanpi Suu thlah ko ding cu Nipidaw thong Inn in Rangoon a Inn ah ṭhial uh: Kanpi Suu le aa tel dingmi vialte he bia I ruah uh; NLD party hrawk hlah, Democracy ah kir uhlaw, mipi uknak chanh uh, cuticun kawlram Daihnak dai ter zawk uh, tiah amah MAH planning kha a chimh ter hna. Mipi uknak chanh timi cu 2023 thimhnak hnu ah uktu cozah ding kha a chim duh mi asi.

Amah MAH he an ṭial aa khat mi Thai PM Prayut cu Blinken, USA Ramdang Vuanci he an I tawn ah a chimh ter. Blinken zong nih Democracy ah kir uh, Kanpi Suu he biaruah uh, Rule Of Law aum mi le nuhrin covo Amakhan mi Democracy ah kir ṭhan uh a ti ve. 2020 thimhnak cu MAH nih a hnawn caah, thimhnak dang a herh tinak asi. Thimhnak loin Democracy Innka ah lut khawh asi lo. 2012 le 2015 bang in Kanpi Suu le NLD telin thimhnak hi tuah ko uh tinak asi.

MAH planning, he aa rup ngai ngai. Amah MAH bia cu a zumh mi an um lo / kan um lo caah Prak Sakkhon, Wanyi, Prayut le Mr. Antony Blinken te in bia achimh mi, MAH le Ralhrang ansi. Wanyi nih Mipi sin ah uknak na pek ṭhan hna lai tiah kan in zumh ko hna, kan in hngak ko hna, ati, thil sining a hngalh cia lo ah hi bantuk a chimh lai lo. MAH Satan Ngian le Ceihngia zia asi lai ti cio asi.

NLD party luban le hruaitu cheuh khat zong 2023 thimhnak ah I tel ding in aa timhmi an um pah len, tam ngai dawh an si. Cazin lak a har ngai caah adikciah in kan langhter khawh lo. Rangoon PM hlun Kio Phio tbk. NLD le NUG cu an lam aa dan I an i ṭhen cang ti khawh asi. NLD cu CEC in an Ukhruai, NLD CEC hruainak in NUG cu a kal lo. NLD nih 25% Rallokap Hlutdaw in dawi hnu lawng ah, Democracy asi an ti.

Cu hnu ah Phungphai, Policy le Phunghrampi kan suaisam lai i Democracy Federal timi Bahu ah Power aum mi in kan kal lai ti kha NLD Policy asi. NUG nih Federal in kan kal colh lai an ti tikah Van le Vawlei in an Policy aa thlau. Cucaah 2021 June ah, NUG le NLD cu aa ṭhen cang ti khawh asi. NLD Policy nih Meithal in raldohnak hi a cohlan lo. Cucu MAH duh ci bak asi. Thimhnak an tuah zong ah NUG sawm dawh an si lo, NLD ah an hlen khawh mi hna he thimhnak an tuah ṭi khawh mi asi.

NLD Palai (MP) cheukhat cu 2023 thimhnak ah’ lut ding in an tha tho ngai tiah media ah thawngpang a len ngai. Rangoon NLD zung onh ṭhan ding ah an hal ko nain Kanpi Suu nih a duh lo caah an dai lan. 2020 thimhnak a thah I mipi le NLD zeirello mi an si ti hngalh buin thil tuah asi tiah NLD Upa Luban rual le CEC upa cheukhat an zai ngai. NLD CEC nih statement an chuak colh, Phungning tein rian le ṭuanvo pek lo mi nih, NLD HQ zung onh khawh asi lo, Ralhrang tuah ding mi Thimhnak cu kan cohlan lo, 2020 thimhnak cu mipi ai awh tu le mipi aw an asi caah Rallokap tuah ding mi thimhnak he aa ralkalh mi asi tiah, 5 July nithla le cakhen Nambar in 9 July 2022 ah than ca an chuak. NLD CEC upa U Kyaw Htwe zong a holh ve.

Ralhrang nih phungning an si lo mi kha phungning in si awk ah thimhnak tuah an duh mi asi. Cucu NLD kha siorawl le mangkhawng ah hmang aduh. NLD nih thimhnak lut an duh lo ahcun: amah tein a tuah lai I, By Election ah Kanpi Suu a thlah te lai. Cambodia Vuanci Prak Sakkhon le Tuluk Vuanci Wanyi nih, MAH cu, Pagan ah an i tawn lio ah: nawlnak (3) an tuah. Kawlram thlennak caah Democracy an I thawk cang lai caah mipi sin ah uknak na chanh hrim hrim hna a herh tiah MAH cu an ti.

Hi hna bia nih hin Mipi an kan viavuan ter ngai. NUG le DPF LDF zong a nawnnawk hna. A ruang cu 2023 thimhnak tuah law, mipi sin in cohlannak (Legitimacy) I lak law, cucun Na thuam phoih law, President maw? State Chancellor maw? Na duhmi kha ṭuan ko tiah thazang an pek nak asi. Mipi Legitimacy sangbik cu Thimhnak asi, UN le Vawleipi cohlan mi asi an ti duh nak asi. MAH nih a thluak in an kan tawngh ka ti mi asi. NLD zong an kan tawngh ve bak.

2023 thimhnak ah NLD le Kanpi Suu an I tel lo ahcun: Sualphawt dantat nak in na luat lai lo caah, anmah le Tlangcung mi hruaitu hna he thimhnak pin lei ah biaruah ding ti an duh nak tu asi. 2020 thimhnak kha an chimh duhmi asi ahcun: mipi nih kan cohlan lai nain, MAH nih a thluak in 2023 August ah tuah ding mi thimhnak dang kha a chimh ter hna asi ahcun: Mipi nih kan cohlan khawh ve lailo. NLD upa luban le CEC cheukhat nih MAH le Ralhrang Rallokap mangkhawng ah i nenh sual lo ding hi a biapi ngai mi asi. An siorawl nan bar cikcek ahcun; LOBAK.

Anasin nih an uknak hmun zungzal nak caah mipi cohlan mi NLD kha tanbo ah an hmang bia asi. Hi Bantukin, an kan hlen hi a uk tam tuk cang. Kum 80 deng asi cang. A intuar mi le a tuahtu minung tu aa thlen lengmang lawng asi. 2008 phunghrampi tang ah kan lut lai I, upadi kan remh lai, Rallokap 25% hlutdaw in kan doi hna lai tiah an I zumh tuk ko nain, an ti khawh lo kha anmah nih an hngalh bik ko.

Cucaah Mi tampi NLD party an chuak tak kha asi. Cuticun lungkhah lo nak le lungrual lonak cu aa thawk. Cucu kan ral MAH te nih an duh bik asi. MAH nih NLD kha TEINAK Phetlap (Joker) ah hmang a duh bia ai. Chuaknak lam a pit dih cang, ahohmanh nih an cohlan ti hna lo, an cihmih in thah nawn dih an duh hna caah, chuaknak lam caah thimhnak an ti mi hi asi. Mipi kut ah uknak chanh kha asilo. Tlangcungmi duhmi Federal zong asi lo. Democracy timi mipi nawlngeih nak cungnung bik sinak zong asilo. Rule OF Law timi Upadi cung ah ahohmanh um lo timi zong asi lo. PEACE ati lai, angah lo ahcun, NLD kha thimhnak lut ding in a fial lai, ahnu bik angah lo ahcun, Kanpi Suu kha TEINAK Phetlap, JOKER in a hmang lai. (U Than Naing, 1975 Prison).

Ralhrang nih fial mi Election Commission cu Party hna phaisa cazin, party Inn, Party minung a um zat, tbk cu an check dih hna. Party 85 an check dih cang hna (SNLD telin). NLD telin Party (7) cu an check rih hna lo. 2023 thimhnak lut awk ah dotlalo an si tiah Rallokap nih an thanh mi Party pahnih cu NLD le Lubawng Thit Democratic Party ansi. Party dang vialte zong 2023 thimhnak ah lut ding in an I timh ngawt dih tiah Zaw Me Lung nih a ti.

CHINMI kan NLD upa luban cheukhat zong thimhnak ah an lut khawh men timi hna kan um. A ruang cu: Henry Van Ṭhio, Zo Bawi, Sui Ṭhio le Soe Htet hna nih buaibainak kan tuah lailo, dai tein kan um lai, Rallokap kan in cohlan hna tiah sen an thuh. Zo Bawi le Sui Ṭhio cu Inn an sak. Soe Htet Nipidaw a nupi sin ah tlung. Soe Htet Anupi cu Ralbawi ṭuan lio mi asi. Zo Bawi Cu NLD nakin USDP kaa bochan dueh hna a ti mi a bia aum cang. Henry Van Ṭhio athih le a nung hngalh khawh asilo. Ui thih in a thi mi cu amah lawng hi aum Paucan Dohthlennak ah. ZTC