Kan Unau Hna An Buaining Afak Chin Lengmang Cang

Breaking News. Meitei Le Zomi, Kuki An Buai- India ram Manipur State chung i a um mi Zomi (paihte) ,Kuki, Hmar le Thado hna umnak hmun cu Manipur cozah nih hramlak ti in an phuan ruangah Chin miphun chungtel Zomi le Kuki hna nih duhlo nak lamzawh duhphorhnak an nei ị, Meitei miphun le Zomi, Kuki karlak ah buainak a chuak. Manipur cozah nih Kuki le Zomi hramlak tin a ti hna caah Zomi le Kuk umnak khua hna cu hrawhpiak khawh dir hmun ah an um. Cutikah Kuki le Zomi Paihte hna cu Lamzawh nak an nei ih Meitei lei nih an rak zoh sawh khawh lo caah faak ngai in buainak a chuak.

Buainak a chuah caah Manipur state chung in District 5 hna cu zan ah leng chuah lo dingin nawl an chuah i ni 5 chung internet an phih piak hna la.May 3 ah kuki, Paihte Zomi le Naga miphun hna nih cun Manipur cozah nih nawl an chuah mi duh loin lamzawh nak an nei, khat lei ah Meitei miphun hna nih cun Paihte an umnak Kangvai khua cu Mei in an rak khangh hna I hngakchia pakhat a thi.
Tamu ramri Mohre lei zongah buainak a linsa ngai i mipi nih meithal puah thawng zong an theih. Meitei lei in meithal tiang an hman caah a tu nak in buai nak a linsa chin kho tiah thawng kan theih. CBN

KIA/PDF Nih SAC Ralkap Sakhan Pahnih An Laak, Ralkap 35 Hrawng An Thi .Sagaing ramṭhen, Humalin peng SAC ralkap le Shanni National Army (SNA) an sakhan pahnih cu KIA/PDF nih May 4 zinglei ah an laak, tiah tualchung mi pakhat nih a chim. “Humalin peng Naungpuaung(နောင်ပိုအောင်) leikap ah May 4 zing suimilam 4:00 in 7:50 tiang kahdohnak a chuak i SAC ralkap le SNA sakhan TaungOo le Taungbuhla cu KIA/PDF nih an va kah i an laak khawh,” tiah tualchung mi pakhat nih cun a chim.

Tualchung mi pakhat zong nih, “SAC ralkap sakhan cu KIA/PDF nih an laak khawh pin ah hriamnam le kutcheh bomb hna zong tampi an chuh hna. SAC ralkap 35 hrawng an thi i, KIA/PDF lei in aa hliammi an um hraw lo,” tiah a chim. Humalin peng SAC ralkap sakhan KIA le PDF nih an laaknak kong he pehtlai in KIA chimphuannak nawlngeitu Colonel Naw Bu le Humalin PDF ṭuanvo ngeitu hna cu dohthlennak media pakhat a simi People’s Spring nih pehtlaihnak an tuah ko hna nain an pehtlai kho rih hna lo, tiah theih a si.

Myanmar Rammi Pahnih Cu Mizoram Palik Nih Bing He An Tlaih Hna. India ram, Mizoram ramkulh Champhai ah a ummi Kalay peng Chinsuh khuami pahnih cu Mizoram palik nih bing 25 gram he May 1 ah an tlaih hna, tiah theih a si. Tlaih a tongmi Lal Nun Mawi(kum 25) le Biak Tin Thang(kum 24) cu Champhai khua New Champhai sang an umnak inn ah an tlaih hna, tiah theih a si. Tlaih a tongmi hna cu rithaisii dohnak upadi le ramdang upadi in palik nih taza an cuai hna lai, tiah theih a si. TCP