Kan Biakmi Pathian cu TRINITY Asi

Home

Jahovah Pathian le Jesuh Khrih le Thiang Thlarau kongah Bible biatak cawnpiaknak;-  Dawtmi u le nau hna minung si nakin cun kan Pale hna hi rak hngalhlo zongah fale hna hi hngalh dih khawh a si ko. Asinain Pathian sinak tu ah hin cun Jahovah Pathian kan Pa hngalhlo ahcun a Fapa Jesuh Khrih hi aho setset dah a si ti hna hi hngalh khawh a rak si loh. ( Mathai 16 : 17 ).

Cu nih cun a langhtermi pakhat a um i cucu Thiang Thlarau aa ngeihmi kan si taktak maw, si taktak lo timi kha a si. Zultu Johan nih cun, “Pathian Thlarau a si le si lo cu hitihin nan hngalh khawh lai: Jesuh Khrih cu minung in a ra, tiah a timi paoh kha Pathian sinin a rami Thlarau a ngeimi cu an si,” tiah a ti. ( 1Johan 4 : 2 )..

Hi biatak hna hi zeicaahdah ka van langhter duh tiah cun Jahovah Pathian le Jesuh Khrih le Thiang Thlarau hi Pathian sinak ah pakhat an si bantukin Jahovah Pathian le Jesuh Khrih le Thiang Thlarau cu Pathian sinak pakhat aa hrawmmi an si ti zongin kan chim khawhmi cu a si. Zeicatiah van sunparnak cu phun khat lawng a si caah khan a si. ( 1Korin 15 : 40 ). Cathiang zong nih a rak timi cu Pathian cu zei he hmanh tahchunh khawh le hmuh khawh a si loh tiah a rak ti. A dikmi a si. Pathian cu sinak a si caah zeibantuk he hmanh tahchunh khawh a si lo i hmuh khawh zong a si fawn loh..

Kan hngalhfiannak dingah cun Fambawl hi sinak a si caah zeibantuk hmanh he tahchunh khawh a si lo i hmuh khawh zong a si loh. Asinain cu Fambawl cu pakhat lawnglawng kha a si fawn. Fambawl sinak ah hin mi tampi zong hi um ko hmanh u sihlaw cu Fambawl cu a zungzal in zungzal tiang pakhat peng a si ko lai. Cucu vawlei sunparnakphun dang a simi chungin phun khat te a si ve caah a si.

Cu bantukin Pathian sinak zongah hin Jahovah Pathian le Jesuh Khrih le Thiang Thlarau hi um ko hmanh hna sehlaw Pathian cu pakhat lawnglawng kha a si zungzal ko lai ee. Cun cu Pathian sinak cu Fapa Jesuh Khrih thawngin aa hrawm ve dingmi kan si zong kha philh hrimhrim hna hlah u sih. Cu dingah cun dawh atu tein Jahovah Pathian nih cun a sunaprnak zong cu a kan hrawmh cuh. ( Rom 8 : 28 – 30 )..

Cun Jahovah Pathian le Jesuh Khrih le Thiang Thlarau cu Pathian pakhat sinak aa hrawmmi an si ve bantukin Thlarau pumsa sinak ah a dangmi zong kha an si. Jahovah Pathian le Thiang Thlarau hi cu Thlarau pumsa hrimhrim an si. Asinain Jesuh Khrih tu hi cu Pa Jahovah sunparnak in thawhtermi a si bantukin le Cathiang nih a ruh pakhat hmanh nan khiah lai loh timi biatak tlinnak ding caah sunparnak pumsa in thawhtermi zong kha a si.

Cucaah cun dawh Jesuh Khrih hrimhrim zong nih a zultu hna sinah a rak chimmi cu, “Ka Pa Jahovah sinin a rami Bawmtu, biatak Phuangtu Thiang Thlarau cu a ra lai. Ka Pa Jahovah sinin nan sinah ka rak thlah lai i keimah ( Jesuh Khrih ) kong kha an chimh hna lai. Cun nannih zong nih a hramthawk tein ka sin i a ummi nan si caah keimah kong kha nan chim ve lai,” tiah a rak chimh hna khah. ( Johan 15 : 26 – 27 )..

Khrih ah dawtmi u le nau hna nihin ni tiangah hin Jahovah Pathian le Jesuh Khrih le Thiang Thlarau hna hi pum pakhat simi ah kan ruah zungzal rihmi hna hi cu Pathian kan Pa a simi Jahovah kan hngalh taktak lo caah Pathian sinin a rami Thiang Thlarau kan ngeih lo biatu kha a rak si ko. Satan hmanh nih cun pei Jahovah Pathian le Jesuh Khrih le Thiang Thlarau hna cu a dangmi an rak si a hngalh ve hna i Jesuh Khrih vawlei a rak um lioah khan, “Nangmah cu Jahovah Pathian Fapa na si ahcun, vawlei ah khin vung zuang tuah;

zeicahtiah Cathiang nih pei, ‘Jahovah Pathian nih nangmah kong ah a vancungmi kha nawl a pek hna i annih nih an kut in an in cawi lai i na ke cu lung ah naa khawng lai lo,’ a ti kha,” tiah a rak ti kha. ( Mathai 4 : 6 ). Hi lioah te ah hin Jesuh Khrih chungah Jahovah Pathian kan Pa hi Thiang Thlarau hmangin a rak um rih lo ti cu a fian ko..

Cucaah cun kannih zong nih hngal hna u sih ti ka duhmi cu Jahovah Pathian kan Pa hi a si. Amah kan hngalh lo a si ahcun Jesuh Khrih kan hngalh kan timi hna hi cu Lih taktak kha a rak si lai. Cucu Jahovah Pathian sinin a rami Thiang Thlarau kha kan ngeih lo caah a si ko. Cun kan dohnak leiah van chim than ka duhmi cu Jahovah Pathian le Jesuh Khrih le Thiang Thlarau hi a dangmi an sinak cu Jahovah Pathian nih vawlei a ser lioah khan Jesuh Khrih cu a Fapa a si nakin a pawngte bakah a ummi zong a si. ( Phungthlukbia 8 : 30 – 31 ). A chungah a ummi a si a ti loh.

Cu lawng si loin Thiang Thlarau zong kha Rilipi cungah a chonk tiah Cathiang zong nih fian taktak in a kan cawnpiakmi cu a si fawn ko. ( Genesis 1 : 2 ). Dawtmi u le nau hna Pathian sining hna hi kan hngalh lo a si ahcun kan zumhnak le kan zumhning hna hi cu pakpalawng a si ti fu a fian ko..

Zumtu tha zong ka si kan i ti bak ko a si ahcun Jahovah Pathian le Jesuh Khrih le Thiang Thlarau kongah Bible biatak cawnpiaknak hi cohlang taktak ve cang hna u sih tiin kan sawm hna. Cun a hleiin kan i lawmhnak a tling ve khawh nakhnga ding caah Jesuh Khrih min in Thiang Thlarau hna hi Jahovah Pathian kan Pa sinah hal hna u sih. Kan hal bak ko ahcun a kan pek hrimhrim fawn ko lai.

Zeicatiah cun a halmi paoh cu pek ( Mathai 7 : 7 ) an si bantukin Jesuh Khrih zong nih a kan timi cu, “Hi tluk i nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa Jahovah nih cun amah kha Thiang Thlarau a halmi cu zeitluk in dah a pek chinchin hna lai,” tiah a kan ti. ( Luka 11 : 13 ). A biathiang aa hrawmmi zumtu nan dihlak cungah Fimchimtu Thiang Thlarau um zungzal ko seh. Amen.. Thank You For All; Johnly Fambawl