Kan Biakinn Chungah Ralhrang An Zudin le An Rawlchumh Khi…

Ralhrang nih Malsawm, Vantlang, Khuapi hrawng cu khuachung ah khuami an um ngam ti lo. Malsawm khua hna cu ralhrang jet fighter bomb thlak mi nih inn tamtuk a hrawh, cheukhat inn hna cu hmuh ding pakhat hmanh um lo tiang in a rawk. Baptist biakinn chungah an i dor, rawl an chum, zu an ding, biakinn cu bomb an thlak hnawh rih i a rawk dih. Uico ralhrang hna hi Biakinn chung an um zongah kan ralkap zong nih biakinn a si caah ti in ithlachiatnak lo tein bomb bak in ciam dihlak in thlak hnawh ve ding an si ko cang.

The Chin Post | 11 May 2023. SAC Ralkap Jet Fighter Nih Khuapi Ah Bomb A Thlak Ṭhan!
Senthang peng Khuapi khua ah SAC ralkap Jet Fighter nih nihin May 11 zinglei ah bomb a thlak ṭhan, tiah theih a si. Tuzinglei suimilam 12:05 ah SAC ralkap Jet Fighter nih Khuapi khua le
CDF-Senthang Headquater ah bomb a thlak ṭhan. Cu ruangah Hakha-Matupi lam a him rih lo caah caan karlak chung kan kham, tiah CDF-senthang nih cathanh an chuah.

“Nihin May 11 zinglei suimilam 2:00 hrawng ah SAC ralkap Fighter nih CDF-senthang Headquarter ah bomb a thlak ṭhan ruangah sakhan cu a rawk dih. Minung tu cu aa hliammi an um lo,” tiah min langhter a duh lomi pakhat nih The Chin Post ah a chim. Fighter nih Khuapi khua ah a voihnihnak bomb a thlak ṭhan ruangah khua kiangkap a ummi khuami hna cu a himnak hmun ah rahrial in an zam hna, tiah theih a si.

KNU Hmunram in Thla 4 Chung Kahdohnak Ah SAC Ralkap 1,600 Leng An Thi, KNU ramchung, Kawthulay hmunram in thla 4 chung ah kahdohnak voi 1,642 a chuak i, SAC ralkap 1,736 leng an thi, tiah KNU nih nihin May 11 ah cathanh an chuah. Thla 4 chung kahdohnak ah SAC ralkap 1,188 hliam an tuar i KNLA le KNDO lei in ralkap 59 nih ram le miphun ca ah an nunnak an pek. Minung 196 hliamhma an pu i PDF zong tam ngai hliamhma an pu ve, tiah KNU nih an langhter. KNU hmunram kahdohnak ah SAC ralkap nih nuhrin covo an buar ruangah Karen ramchung um minung sing 4 leng cu ralhrial in an zam, tiah theih a si.

Ralhrial mi an tam ruangah 2023 January thawk in KNU nih Karen ramchung ummi minung 85,000 ca ah thla fatin eidin facang an bawmh hna, tiah theih a si. Ralhrial mi hna eidin tirawl an chambau pinah umnak inn le lo, ngandamnak le sii-ai an zong an chambau. Kawthulay hmunram kahdohnak ruangah ralhrial in a zammi tualchung mi hna bawmchantu poh cu lunglawm tein kan in kan cohlan ko hna, tiah KNU nih an langhter.