Israel R. Thang: Thumkomh ah Pakhat Asinak Nih Khuaruahhar Pathian Asinak Alanghter

Home

THUMKOMH AH PAKHAT PATHIAN ASINAK HI KHUARUAHAR PATHIAN ASINAK ASI. Pathian cu Khuaruahhar Pathian asi. KHUARUAHHAR ticu Khua-ruah lengmang zongah a har tuk tinak asi. A sullam cu minung fimnak, theihnak le hngalhnak pinlei ah aum. KHUARUAHHAR ti a sullam cu ASI KHO BAK LO kan timi khi asi ko. Pathian a sining khuaruahhar asinak phumthum in ka chim lai.

(1) PATHIAN CU ZUNGZAL PATHIAN A SI (GOD IS ETERNAL )- Zungzal timihi țha tein na tuak bal maw? Zungzal a sullam cu hramthok a ngeilo i donghnak zong a ngei lo. Zungzal cu caan chungah aum lo. Pathian hi zeitindah aa sem. Zeitik ah dah Pathian cu aa sem?. Pathian cu Zungzal asi. Pathian caah a luan ciami caan, atu caan le hmailei caan (Past, Present and future) a um lo. Zungzal kong hi na ruat deuhdeuh ahcun na buai deuhdeuh lai. Na tuak kho lai lo i na hngal kho fawn lai lo. A SI KHO LO tiah a phi na chuah lai.

Minung kan thluak Țikel 10 hmanh a tlinglo mi nih Zungzal kong cu a hngalh kho hrimhrim lai lo. Asinain Pathian cu Zungzal Pathian asi ko. Cucu Khuaruahhar Pathian asinak asi. Pathian khuaruahhar asinak cu tuak hlah a zumh in zum ko. Asikho bak lomi zumh kha Zumhnak taktak cu asi. 🔹Zungzal cu Tahchunh awk a tha lo. Proof khawh asi lo.

(2) PATHIAN CU TAH KHAWH LOMI PATHIAN ASI. (God is Without Measurement)= Pathian cu zeitlukin dah a ngan i a sang. Aho nih dah a tah khawh lai. Pathian cu pee zeizah dah a sang, Pound zeizah dah a rih? Na hngal kho lai maw? Na mitthlam in na suai tawn mi Pathian muisam khi na ruahnak sawhsawh asi. Pathian cu vawlei pi nakin a ngan deuh i van nakin a sang deuh. cu tluk a lian nganmi Pathian cu zungkhat tling lo kan mit nih a hmu khawh lai ti na zum maw. Pathian cu tung vaang a ngei lo, niam le sang zong a ngei lo. Cucu Khuaruahhar Pathian asinak asi. 🔹Pathian lianngannak cu tahchunh awk atha lo. Proof khawh asi lo.

(3) THUMKOMH AH PATHIAN PAKHAT ASI(GOD IS TRIUNE)-Pathian cu thumkomh ah Pathian PAKHAT asinak Bible nih rel cawk loin a langh. Pathum komh i Pathian si cu Minung thluk le fimnak nih hngalh awk a tha hrim lo. Na tuak deuhdeuh lai i ASI KHO LO na ti ko lai. THUMKOMH AH PAKHAT asinak nih KHUARUAHHAR Pathian asinak a langhter. Thumkomh i Pakhat asimi Pathian cu khuaruahhar taktak khi asi ko. 🔹Thumkomh Pakhat Pathian cu tahchunh awk a tha lo. Proof khawh asi lo.

Pathian cu Khuaruahhar Pathian asi tiah na zumh ko ahcun Thumkomh ah Pakhat (Trinity) zong cu ziah kan zumh khawh lo. Ziah asi kho bak lo kan ti? Na zumh lo ahcun Khuaruahhar Pathian asinak na zum lo tinak asi ko.
Israel R. Thang

Matthai 28:16-20 chung biathli . Mtt 28:19 ah hin, baptisma kha va pe hna u, timi rian fialnâk hi rak um lo in, Pa le Fapa le Thiang Thlarau min in zultu ah va ser hna u, ti lawng rak siseh law cu, Pa le Fa le Thiang Thlarau cu ho dah si tihi theih khawhnâk lam a um ti hnga lo.

Pa le Fapa le Thiang Thlarau min in, Baptisma kha va pe hna u, timi hi a rak um ngelcel tik ah, Pa le Fapa le Thiang Thlarau min cu ho ti dah si ? ti cu Bible chung i baptisma an peknâk le baptisma an ingnâk ah theih khawh a si ko lai.
Cucaah, zultu hna nih baptisma cu an pe maw? ti kha a pakhatnâk subject cu a si. Bia ro vuih a simi hna zultu hna nih Jesuh bia cah tâk mi baptisma cu pentecost Ni in pêk hram an thok taktak.

  • Jesuh Khrih min in baptisma kha ing u! ( Lam 2:38 )
    Bawipa Jesuh min lawngin baptisma pek an si rih. ( Lam 8:16, )
    Jesuh Khrih min in baptisma ing awk kha a fial hna. ( Lam 10:48 )
    Bawipa Jesuh min in baptisma kha an ing. ( Lam 19:5 )

tiah, mah chung ah hin zultu hna nih baptisma ing an fial hna i, baptisma cu an pek fawn hna i baptisma cu an ing bak cang ko hih . Sicun, a pahnihnâk Subject kan kawlmi cu Pa le Fapa le Thiang Thlarau min cu a ho si an ti ? zeitindah an chim ? zeitindah an auh i zeitindah an hman ? tihi si.

Min in ti a si caah PA le FAPA le THIANG THLARAU ti can ah BAWIPA JESUH ti le JESUH KHRIH ti a si i, JESUH Min an chim i JESUH Min an auh i JESUH Min bak hi baptisma nâk ah cun an hmanmi si. Cucaah Pa le Fapa le Thiang Thlarau min cu felfai te le fiang tein JESUH a si ko tihi al awk um lo in, a palh kho lomi zumhnâk tahnâk ah hmanmi Bible nih record a tial ning cu a si. Pa min cu ho dah si ? Fapa min cu ho dah si? Thiang Thlarau min cu ho dah si? pathum maw, pakhat, Bible nih zeitindah a tial ?

Pa min cu Jesuh a si kho maw? Joh 14:9 a ka hmumi paoh PA a hmumi a si. 14:10 kei PA chung ah ka um i, PA cu ka
chung ah a um . a ti. PA cu rak kan hmuhsak an ti i, keimah hmuh hi PA hmuh si ko, a ti caah an hmuh mi Min cu JESUH a si. ( PA ti cu sinâk , Fa ti zong sinâk, )

Fapa min cu Jesuh a si kho maw? Mtt 1:21. Fapa a hrin lai i a Min ah JESUH tiah na sak lai.
1:25 Cun, JESUH tiah Min a sak. Hrin a simi Fapa cu a Min ah JESUH a si .

Thiang Thlarau min cu Jesuh a si kho maw? Lam 16:7. Misia ramri an va phak ah khan Bithinia ram chung ah luh an i zâl i sihmanhsehlaw, JESUH Thlarau nih khan a onh hna lo. Minung nih hin thlarau kan ngei i, a min ah thlarau a si lo, thlarau cu sinâk tu a si. A min cu a putu min kha thlarau min cu a si ko.

tahchunhnâk;- John fready hi ka thih hnu ah, ka thlarau hmu hna sehlaw, ê khi, thlarau an ti lai lo, ê khi, John fready thlarau tiah Min in an chim lai . Cucaah, PA le FAPA le THIANG THLARAU ti can ah JESUH ti an hman caah, PA le FAPA le THIANG THLARAU sinâk a ngeitu Min cu JESUH a si, ticu merh zong hau lo, sarmon len zong hau lo in Bible nih fel fai te le fiang tein baptisma peknâk ah record a tial ko.

Khah, Social media ah cawnpiaktu cheukhat nih, Pa cu JEHOVAH a si nan ti, Fapa cu JESUH a si, nan ti ve, THIANG THLARAU cu THIANG THLARAU a si ko, nan ti than caah, Jesuh nih bia ro a vuih hna i, bia a cahtâk hna ning tein, baptisma peknâk le baptisma ingnâk ah cun, JEHOVAH le JESUH le THIANG THLARAU min in , baptisma kan pek / an pek, timi le baptisma kan ing / an ing, ticu, Bible ah hmuh ding le rel ding a um ne maw?
A si lo ah, a cahtâk hna ning te si lo in, a chim ning te zong in cun teh , Pa le Fapa le Thiang Thlarau min in baptisma kan pek / an pek hna, ti le , Pa le Fapa le Thiang Thlarau min in baptisma kan ing / an ing, ticu, Bible ah hmuh ding le rel ding cu a um ve reng reng maw? tihi, bia i hal cio tuah hna u sih.

Note ; Pa le Fapa le Thiang Thlarau min theih kan duh ahcun, a Lamkaltu hna kha baptisma peknâk ah nan hmang te lai, tiah Bawipa Jesuh nih a ti hna caah, hmun dang ah kawllen ding a si lo. Lamkaltu hna baptisma peknâk le ingnâk ah cun kawl ding si ko. Luk 24:45 Cun, Cathiang an hngalh khawh nâkhnga an lungthin kha a on piak hna.Amen Careltu nan dihlak cungah kai lawm. Cathiang sullam a hngal khomi kan si cio nâkhnga Bawipa Jesuh Khrih kan Pathian nih kan lungthin cu kan on piak cio hrâm hna seh. johnfready