Hakha Ralhrang nih Agape Sii-Inn An Lut I Nurse 4 An Tlaih Hna

SAC Ralkap Nih Agape Sii-inn Ah Nurse Pali(4) Le Cawbuk Sang Ah Pa Pathum(3) An Tlaih Hna! Chin ramkulh, Hakha hrambunh Agape sii-inn ah SAC ralkap nih Nurse pali(4) an tlaih hna, tiah theih a si. May 22 zinglei suimilam 2:00 hrawng ah SAC ralkap nih Agape sii-inn cu an luhhnawh i nurse pali(4) cu an kalpi hna. Nihin May 22 chun tiang ah an thlah rih hna lo, tiah tualchung mi pakhat nih The Chin Post ah a chim. Nurse pali hna hi zei ruang ah dah an tlaih hna ti cu hngalh a si lo. Agape sii-inn ah hin nihin May 22 ah mizaw operation tuah ding zong an um, tiah theih a si. Cupinah May 21 zan suimilam 11:00 hrawng ah Cawbuk sang cu SAC ralkap nih chungkhar cazin an check hna i, pa pathum(3) an tlaih hna, tiah theih a si.

Hi kong he pehtlai in tualchung mi pakhat nih, “Cawbuk sang Moe Hein pinlei khi SAC ralkap nih chungkhar cazin an check hna i, pa pathum(3) cu chungkhar cazin ah nan i tel lo an ti hna ruangah an tlaih hna i an kalpi hna,” tiah The Chin Post ah a chim. Bungzung lei in a rak kaimi Tatma 77 SAC ralkap pawl cu Hakha an phan cang tiin thawngpang a len hnu in May 20 zan Keitheibo sang ah minung pahnih(2) nih chungkhar pakhat cu an hrocer hna i an phaisa Kyats sing hra (1,000,000) hrawng zong an chuh hna. Pa pakhat zong a or ah nam in an tuk i a hliamhma he sii-inn a phan. Cu bantuk thil a can hnu May 21 le 22 zan ah Agape sii-inn ah Nurse pali(4) le Cawbuk sang ah pa pathum(3) cu SAC ralkap nih an tlaih hna, tiah theih a si.

Pau Dohthlennak Chung ah Chin National Defense Force(CNDF) In Ralkap 32 Nih An Nunnak An Pek Cang. SAC nih nawlngeihnak an laak hnu in CNO/CNDF ralkap 32 nih ram le miphun ca ah nunnak an pek cang, tiah CNO/CNDF nih cathanh an chuah. Kum 2 tlin camtuak Chin Miphun Martyr Ni, May 21 ah CNO/CNDF nih Chin miphun zalonnak, tlukruannak le mahte khuakhan lairel khawhnak ca ah rian kan ṭuan lai tiin nunnak a pe cangmi hna sinah biakamnak tuah in cathanh an chuah.

Chin Miphun Martyr Ni kan tuahnak sullam cu hriamnam in raltuk a rak i thawk hlan ah rawn lei kan unau hna nih nunak an rak pekmi philhlonak ah a si, tiah an langhter. CNDF cu Falam khua he aa pehmi ramri poh ah SAC ralkap a doh cuahmahtu kan si i, ṭangṭi phu hna he zong ral kan dohṭi. April thla lio Falam peng Var khua um SAC ralkap sakhan laak lio zong ah SAC ralkap 10 leng an thi i, 14 kan tlaih hna, tiah an langhter. CNDF chimphuannak nawlngeitu Salai Cung Ngai nih, “Kum 2 chung ah kahdohnak voi 122 a chuak i zen-kuan le hriamnam zong kan chambau ngai nain hmai kan nor chin ko,” tiah a chim.