Hakha Ralhrang 266 Tam Ngai An Thi

dailychin

Hakha Peng ah kahdohnak chuak, SAC lei thi an tam. Gangaw lei in a rak kai mi Tatmah 77 hna a dongtu Hakha hrambunh 266 ralkap le Chin ralkap CNA, CDFs hna karlak ah nihin May 13 ah kahdohnak a chuak i SAC ralkap a thi mi an tam tiah theih a si.Ralhmai suang pakhat nih, “Chun ahkhan sau ngai kan i kap.

Kanmah lei cu kan him. Hliamtuar zong kan um lo,” tiah The Chin Post ah a chim. Tatmah 77 ralkap pawl hi a dongtu 266 ralkap hna he Sakta le Zokhua kar tlangbo ah an i tong kho cang tiah khuami sin in kan theih. Khuami pakhat nih, “A langtlang in kan cuanh hna i anmah cu kan hmu lo nain an i kah caan a sau. Meithal le bomb puah thawng a dai lo,” tiah a chim ve!

Cyclone Ruangah Rakhine Ramkulh Chung Khualtlawng Ding Vialte Kham Chung An Si. Rakhine ramkulh khualtlawngmi motor hna cu Mocha Cyclone ruang ah May 13 thawk in dinhter chung an si i ti lam le vanlawng in khualtlawng ding mi hna zong dinhter chung an si, tiah theih a si.

Hmundang in Rakhine ramkulh chung i a lutmi cu kham an si cang nain, Rakhine ramkulh chung ah cun umhmun ṭhialkam ah nihin May 13 tiang khualtlawng an um rih. Sittwe peng in hmun dang ah a kalmi motor cu an kham rih lo, tiah Sittwe um mi pakhat nih a chim. Yangon in Sittwe a zuangmi vanlawng cu thlichia ruang ah ni li chung phihkham a si, tiah vanlawng ticket a zuartu agent pakhat nih RFA ah a chim.

Cun pin ah Yangon in Sittwe a kalmi khualtlawng motor hna cu nicaan rikhiah um lo in an phih, tiah khualtlawng motor khaltu pakhat nih a chim. Rakhine ramkulh chung i ti lam khualtlawnnak vialte zong thlichia ruangah kham dih an si, tiah tualchung mi hna nih an chim. Remdaihnak Phu Hruaitu In New Mon State Party(NMSP) An Chuak! Rampi kahdaih hnatlaknak minthutu tlangcung hriamtlai phufonh Peace Process Steering Team(PPST) hruaitu dirhmun sinak in New Mon State Party(NMSP) cu an chuak, tiah theih a si.

New Mon State Party(NMSP) cu PPST hruaitu sinak in an chuak nain PPST phufonh hna he pehtlai in rian kan ṭuan ko lai, tiah PPST in chimphuannak nawlngeitu Colonel Saw Kyaw Nyunt(KNLA-PC) nih a chim. “PPST Committee hruaitu dirhmun in kum khat leng ṭuanvo a latu NMSP Vice Chairman Naing Aung Min cu pumpak ngandam lonak ruangah le NMSP central committee biachahnak in PPST hruaitu sinak in an i din.

Cuhlan caantling chungtel bantuk si ti loin ṭangṭi phu bantuk lawng in an um cang lai,” tiah a chim. PPST phu cu Nationwide Ceasefire Agreement (NCA) minsen thutu phu 10 nih an dirhmi a si i, SAC nih nawlngeihnak an laak hnu in Karen National Union(KNU), Chin National Front(CNF) le Restoration Council of Shan State(RCSS) cu an chuak. NMSP cu PPST hruaitu sinak in an chuah caah Arakan Liberation Army(ALP), Democratic Karen Buddhist Army(DKBA), Karen National Liberation Army (KNLA-PC), Lahu Democratic Union(LDU), Pa-O National Liberation Army(PNLO) le All Burma Students’ Democratic Front(ABSDF) lawng an taang cang, tinak a si.

PPST hruaitu meeting cu a ra laimi May 17 le 18 khin Thailand ram Chiangmai ah kan tuah lai i, NMSP nih chuahnak ca an ṭialmi hi kan ceih lai maw ceih lai lo ti cu a fiang rih lo, tiah PPST in chimphuannak nawlngeitu Colonel Saw Kyaw Nyunt nih a chim.