Hakha Khuapi Kahdohnak ah Chungkhar Hliamtuar Minung 4 cu Ralhrang nih Siizung ah An Kalpi Hna

Home

(Nihin August 30 Zing Hakha Khuapi Kahdohnak Update)-SAC Ralkap Nih Hriamngan An Kah Ruangah Naupawi Nu Pakhat Le Midang 3 Hliamhma An Pu! Nihin August zing sml 6:30 hrawng ah Hakha thar lamruk tonnak ah kahdohnak a chuak i, SAC ralkap nih hriamngan an kah ruangah Nahau tlang um Hranhring khuami, Pu Lai Hram inn a khen pinah minung 4 hliamhma an pu, tiah theih a si.

Hakha ummi pakhat nih cun, “SAC ralkap nih hriamngan an kah ruangah Nahau tlang sianginn sang um, Pu Lian Hram te chungkhar cu rawl an ei lio ah an inn kudawng cung in hriamngan kuan a tlak caah nu 3 le pa 1 hliamhma an pu,” tiah The Chin Post ah a chim. An nu hi a lu ah aa khawng i, an fapa le a nupi hi an keng ah hliamhma an pu. An fapa nupi hi naupawi liomi a si i, fa a ngei deng cangmi a si. SAC ralkap nih sii-inn ah kan zul u an ti hna i, an kalpi hna, tiah a chim chap.

Mithmutu pakhat nih cun, “SAC ralkap nih motor nganmi in sii-inn ah an ratpi hna i, ralkap hliamhma pumi 3 an si. An ban in an hruai hna i thlopbulnak an tuah hna,” tiah The Chin Post ah a chim. A luancia 2021 September 16 zan sml 11:30 hrawng ah SAC ralkap hriamngan kuan nih Hakha thar Lungphun tlang sang ummi inn a rak khen caah nu pakhat zong a lu le a hnakhaw ah hliamhma a rak pu cang. TCP