Hakha Khualipi Himnak Cu BAWIPA kut ah A Um

Home

HAKHA KHUAPI HIMNAK CHU- PATHIAN a tlau tak lengmangmi Samaria khua cu, Siria ral nih an rak kulh dih i mangțaam, faakpi in a rak tlung. Samaria khua ah Profet Elisha cu zaam lo tein a rak um peng caah, Samaria khua cu raal kut in a rak luat i a rak him! Assiria ral nih an kulh i an tlerh lengmangmi Jerusalem khuapi caah, Profet Isaiah le siangpahrang Hezekiah cu biatak tein thla an cam caah, Jerusalem khuapi cu Assiria ral kut in a rak luat i a rak him!

Profet Samuel umnak khua, Ramah khua ah David a rak zaam tikah, siangpahrang Sawl nih a rak dawi. Sihmanhsehlaw, Profet Samuel le David te nih PATHIAN an Thangțhat i THIANG THLARAU nih Sawl le a ralkap hna cu hrang/cian kho lo dingin a rak tuah hna i, Samuel le David le Ramah khua cu an rak him!

Khuapi, khuate himnak hi ral kut ah a ummi a si lo, BAWIPA kut ah a ummi tu a si. BAWIPA nih misual/mițhalo hna kut ah a pek lomi/onhlomi khuapi le khuate hna cu an him ko hna lai. Sihmanhsehlaw, BAWIPA nih, misual/mițhalo hna kut i a pekmi/onhmi tu cu kan veng kho hlei lai lo.
Hakha khuapi a himnak le a him lonak cu ral kut ah a ummi a si lo i BAWIPA KUT ah a ummi tu a si.

Carson le Laura Luruh nih a hngahmi khua caah, PATHIAN nawl a ngaimi minung 50nak tam an um ko! Cu hna nihcun, Profet Elisha bantuk in zaam lo tein khua an hngah i, Profet Isaiah le siangpahrang Hezekiah bantukin biatak tein thla an cam lengmang ko.

Profet Samuel le David bantukin BAWIPA cu biatak tein a Thangțhat tu an um fawn ko caah, nan thinphang hlah u, Hakha khuapi hi misual/mițhalo hna kut ah, BAWIPA nih a tlaakter lai lo i, a KUT in a kan Huhphenh i a kan ven ko. BAWIPA tu hi țihzah in upat ko hna u sih. BAWIPA Vel le Daihnak nan cungah um ko seh. KHRIH sal le a lamkaltu Tluang Lian (Martar)