Hakha Khua Mipi Caah UNICEF Bawmhnak Vialte Gate ah An Tlaih Dih

Home

Hakh khua caah bawmhnak Gangaw lam gate ah tlaih a tong- Chin ramkulh, Hakha khua caah UNICEF le Save the Children bawmhnak cu Hakha khua chuahnak Gangaw lam gate ah tlaih a tong tiah Chin Human Rights Organization (CHRO) nih an Twitter cahmai ah an langhter. Atu bantuk in tlaih a tongmi bawmhnak thilrii vialte cu Hakha LIB 266 ah an fim dih tiah theih a si. Thli sinning theitu pakhat nih ” An hren hna cu kan theih, thawng dik a si ko. Sihmanhsehlaw a hnulei thawngpang pawl kan thei ti lo” tiah The Chinland Post ah a chim.

NUG ah PDF battalion 257 le pehtlaihnak ṭha tein ngeihmi dothlennak phu 500 um a si- National Unity Government (NUG), Ministry of Defense kuttang ah PDF battalion 257 a umm i pehtlaihnak ṭha tein a ngeimi dothlennak phu 500 hrawng a um cang caah SAC hrawh ding in timtuahnak ngei uh tiah caan karlak NUG President Duwa Lashi La nih a chim.

“A luanciami um ah formation ṭha tein tuah khawh a si cang caah 2022 hi raltuknak le a dang rian pawl a hram fek tein kan dirh kum a si caah PDF zong battalion 257 tiang a um kho cang. Atu nakin Chain of Command zong ṭha tein kan tuah khawhnak hnga dot khat kai chap in kan ral kan tei khawhnak hnga timhtuahnak ngei hna u sih” tiah cozah phu meeting ah a chim. Cun Min Aung Hliang nih hlennak ah tuah aa timhmi thimnak kan hrawh khawhnak hnga ramkhel lei, raltuknak lei lam 2 in kan kal lai tiah a chim.

“2023 ah Min Aung Hliang hruaimi SAC nih lih le hrokhrawl in tuah a timhmi thimnak zong kan hrawh cikcek khawhnak hnga ramkhel lei le raltuknak lei lam 2 in kan kal ṭi khawhnak hnga a biapi mi timhtuah caan a si. Department zapi rian zong a si. Kannih nih MOD kan si lo caah kan rian a si lo tiah ruat loin cozah ning piin Min Aung Hliang le ralkap phu hrawh ding hi a biapi bik a si caah Department zapi kan lungrual a herh, mipi kan theihter hna a hau, Tha kan pek hna a herh” tiah caan karlak President Duwa Lashi La nih a chim. The Chinland Post